Кольӧм вежонӧ «Монди Сыктывкарса ЛПК» да Коми Республикаса правительство кырымалісны социальнӧй да экономика юкӧнын ёртасьӧм кузя сёрнитчӧм дорӧ содтӧд. Сы серти комбинат 2021 воын регионын туй дзоньталӧм-нюжӧдӧм, дзоньвидзалун видзӧм, культура да спорт сӧвмӧдӧм могысь содтӧд вичмӧдас 550 миллион шайт.
Сёрнитчӧм дорӧ тайӧ документсӧ вынсьӧдісны республикаса юралысь Владимир Уйба да предприятиеса генеральнӧй директор Клаус Пеллер.
–Миян комбинат быд во вичмӧдӧ Коми Республикаын йӧзлы тӧдчана уджтасъяс збыльмӧдӧм вылӧ сьӧма отсӧг.
Сёрнитчӧм сертиыс уджсӧ урчитам регионса правительствокӧд да кӧкъямыс районын, кӧні ми уджалам, олысьяскӧд ӧтув. Ӧд миянлы зэв тӧдчана, медым тайӧ отсӧг весьтас лои збыльмӧдӧма регионын медся колана удж-мог, – пасйис «Монди Сыктывкарса ЛПК»-ысь генеральнӧй директор Клаус Пеллер.
Сідз, 2021 воын комбинатӧн вичмӧдан инвестиция весьтӧ нюжӧдасны да капитальнӧя дзоньталасны Сыктывкар – Кудымкар – Перым туйкостын Веселовкасянь Перым мукӧд границаӧдз юкӧн; уджӧдасны тайӧ жӧ туйкостас Сыктыв ю вомӧн Заозерьеӧ вуджан НМ-13 ва выв пос; лӧсьӧдасны-весаласны Кулӧмдінсянь Керчомъя пыр Дзолльӧдз машинаӧн ветлан туй да с.в.
Культура да спорт сӧвмӧдан юкӧнын сьӧма отсӧгыс вичмас Коми Республикалы 100 вося юбилей пасйӧм вылӧ; футболӧн ворсан «Новая Генерация» да «Строитель» хоккей клубъяслы.
Та весьтӧ жӧ эштӧдасны «Бумажник» стадион выльмӧдан-бурмӧдан уджтаслысь мӧд юкӧн, а сідзжӧ дасьтасны Эжваын парк лӧсьӧдан-мичмӧдан проект (сійӧс збыльмӧдны шуӧма 2022 воын).
Таысь ӧтдор, социальнӧй да экономика юкӧнын ёртасьӧм йылысь сёрнитчӧм серти «Монди Сыктывкарса ЛПК» отса- лас республикаса районъяслы, кӧні комбинат пӧрӧдӧ-заптӧ вӧр да бергӧдӧ мукӧд удж. Тайӧ Кулӧмдін, Кӧрткерӧс, Сыктыв-дін, Луздор, Сыктыв, Удора, Койгорт да Сыктывкарса Эжва районъяс.
Регионлы тӧдчана сьӧма отсӧг вичмӧдӧм кындзи «Монди Сыктывкарса ЛПК» видзӧ вонас шӧркодя 500 миллион шайт предприятиеса ӧнія да вӧвлӧм уджалысьясӧс, налысь семьяяс да вӧр заптан районъясын олысьясӧс социальнӧя дорйӧм могысь.