Март 4 лунӧ «Коми йӧзӧдчан керкаӧн» веськӧдлысь Инесса Орёл чукӧртліс коми газет-журналысь внештатнӧй авторъясӧс, медым аттьӧавны найӧс ёртасьӧмысь.
Ыджыд аттьӧ И.А.Куратов нима музейӧн веськӧдлысь Диана Григорьевна Холоповалы миянлысь гӧсьтъясӧс вочаалӧм-сибӧдӧмысь, а тшӧтш и интереснӧй экскурсия нуӧдӧмысь.
Экскурсия бӧрын Инесса Николаевна чолӧмаліс внештатникъясӧс да аттьӧаліс локтӧмысь:
–Татшӧм традициясӧ – аддзысьлыны внештатнӧй корреспондентъяскӧд – ми заводитім кольӧм во. Таво ми дасьтім квайтымын аттьӧалана гижӧд, кольӧм во дорысь ёна унджык. Лача кута, мый локтан воӧ нӧшта на унджык отсасьысь миян лоас. А важся ёртъяскӧд радпырысь мӧдам кутны топыд йитӧд.
«Коми йӧзӧдчан керкаӧн» веськӧдлысь бӧрын гижысь ёртъясӧс чолӧмалісны коми газет-журналса главнӧй редакторъяс: Галина Макарова, Анжелика Елфимова да Алексей Полугрудов. Быдӧн на пӧвстысь тӧдчӧдіс, мый буретш внештатнӧй авторъяслӧн гижӧдъясыс зэв ёна колӧны коми петасъяслы, ӧд татшӧм статьяясыс ёна торъялӧны редакцияын уджалысь журналистъясысь: сӧмын татшӧм авторъяслӧн олӧм вылас мӧдджык видзӧдласыс, сӧмын найӧ вермӧны мӧд синмӧн казявны-донъявны да аслыспӧлӧса гижны лоӧмторъяс, бур йӧз да уна мукӧдтор йылысь.
А сэсся чай юигмоз гӧсьтъяс тӧдмасисны ӧта-мӧдныскӧд, ӧд мукӧдыс первойысь на аддзысисны тані, кӧть эськӧ ним-вич-ов да гижӧд-статья сертиыс важӧн нин тӧдсаӧсь быттьӧ.
Со мый аддзысьлӧм бӧрын пасйӧма «ВКонтактеын» аслас лист бокын Удора районысь миян внештатнӧй гижысь Галина Ивкучева:
–Аддзысьлӧм вылӧ чукӧртчылісны зэв аслыспӧлӧс йӧз: туялысьяскӧд орччӧн пукаліс общественник, сиктса велӧдысь бокын – нималана кывбуралысь, асшӧр гижысь дорын серпасасьысь, тані жӧ коми газет-журналысь главнӧй редакторъяс… Мый вермӧ ӧтувтны тайӧ войтырсӧ? Дерт жӧ, – миян ай-мамлӧн чужан кывным, сы дорӧ муслун, пыдди пуктӧм да ыджыд кӧсйӧм водзӧ видзны-сӧвмӧдны сійӧс.
Миянлы, коми газет-журналын зільысьяслы, зэв нимкодь, мый буретш татшӧм шань, водзмӧстчысь, тӧлка, чужан кыв пыдди пуктысь-видзысь йӧз – миян внештатнӧй авторъяс. А ми водзӧ кутам зільны-уджавны, йӧзӧдны интереснӧй да коми войтырлы сьӧлӧм вылас воана да колана гижӧд-статья.
И со кутшӧм стӧча тӧдчӧдіс аддзысьлӧм дырйи «Чушканзі» журналлӧн главнӧй редактор Анжелика Елфимова: «Мед кӧть петасъяс судзӧдысьыс дзик ӧти морт коляс – ми кутам лэдзны-дасьтыны коми газет-журнал!». Сідзкӧ, водзӧ ёртасьны да зіля уджавны мӧдам!
Галина МАКАРОВА,
«Коми йӧзӧдчан керкаӧн» веськӧдлысьӧс вежысь да «Коми му» газетса главнӧй редактор.