Mondi котыр да Россияын WWF вӧр-ва видзан ставмирса фонд водзӧ збыльмӧдӧны Коми Республикаын да Камчатка кӧджын войвывса кӧр лыд содтӧм могысь проект.
Мирын кабала да тубрас вӧчан медся вынйӧра Mondi котыр сёрнитчис Россияын WWF вӧр-ва видзан ставмирса фондкӧд «Видзам войвыв кӧрӧс ӧтув» уджтас збыль-мӧдӧмсӧ 2021 вося августӧдз нюжӧдӧм йылысь.
Тайӧ проектыслӧн могыс – содтыны Россияса тундраын да парма-ягын, тшӧтш и Коми Республикаын, кӧні уджалӧ «Монди Сыктывкарса ЛПК», войвывса кӧр лыд. Ёртасьӧмнас шуӧма разьны ёсь гӧрӧд – видзны войвывса пемӧсъясӧс горшасьысь браконьеръяс да мортлӧн вывтіасьӧм вӧсна чинӧм-бырӧмысь.
Россияын WWF фонд босьтчис збыльмӧдны войвывса кӧр лыд содтӧм кузя уджтассӧ 2019 вося гожӧмын Mondi котыр отсӧгӧн. Программаыслӧн аслыспӧлӧс пасӧн лоис «Монди Сыктывкарса ЛПК»-ын вӧчӧм «Снегурочка» офисса кабалалӧн брендыс. И кӧть компания оз запты вӧрсӧ войвывса кӧр вӧдитчанінъясын, проектыс сылы гӧгӧртас видзӧм могысь зэв тӧдчана.
Талун кежлӧ бергӧдӧма нин ыджыд удж. Торйӧн кӧ, Камчаткаса Кроноцкӧй заповедникын босьтӧма пемӧсъяслысь биоматериал, мый серти лоӧ туялӧма кӧръяслысь дзоньви-дзалунсӧ да урчитӧма налысь лыдсӧ содтан туйвизь. Коми Республикаса «Югыд ва» национальнӧй паркын вит кӧрлы пысалӧма сьыліас дом, медым спутниксянь воан юӧр серти тӧдмавны стада ветлан туйсӧ да урчитны пемӧсъяссӧ йывмӧмысь видзан лӧсялана нырвизь.
Mondi отсӧгӧн 2020 вося гожӧмын учёнӧйяс босьтчисны збыльмӧдны Коми Республикаын туясьӧмлысь мӧд юкӧнсӧ. Сы серти шуӧма: юасьны войвыв муын олысьясӧс, тшӧкыда-ӧ аддзывлӧны кӧръясӧс; нӧшта кӧкъямыс пемӧслы пысавны сьыліас дом; дасьтыны стада ветлан туй индалан карта; босьтны генетика анализ вӧчӧм могысь биоматериал да урчитны войвывса кӧр вӧдитчанінъяс видзӧм кузя туйвизь.
Тайӧ уджсӧ водзӧ нуӧдасны таво.
–Ми аттьӧалам Mondi компаниясаӧс зэв аслыспӧлӧс да тӧдчана уджтас збыльмӧдны отсалӧмысь. Войвыв кӧртӧг Арктикаса вӧр-ваын экологияыс торксяс. Та вӧсна колӧ вӧчны тайӧ мича пемӧссӧ дзикӧдз бырӧмысь видзӧм могысь став позянасӧ, – висьталӧ Россияын WWF-ын фондлы отсасьысьяскӧд удж кузя директор Ирина Воробьёва.
–Войвыв кӧр йывмӧмысь видзан уджыс экология видзӧмын зэв колана. И тайӧ могыс миян медся тӧдчанаяс лыдын, та вылӧ индӧ и «Снегурочка» кабалалысь брендсӧ проектлӧн пасӧн бӧрйӧмыс, – тӧдчӧдӧ «Монди сэйлз СНГ» ООО-ысь генеральнӧй директор Алексей Шамин.