Чолӧм, пыдди пуктана лыддьысьысь! Выль 2021 воӧн!
Чайта, унаӧн виччысисны, кор нин тайӧ сьӧкыдысь-сьӧкыд да нӧшта на и кассяна 2020 воыс помасяс. Помасис, слабог. Выль 2021-ӧдыс тыр ӧдӧн нин заводитіс восьлавны. И миян пӧвстысь быдӧн кутӧ лача, мый тайӧ воыс лоас кольӧмсьыс бурджык. А нӧшта пыр бурланьӧ вежсьӧмъяс виччысям…
«Коми му» газетын со во заводитчӧмсяньыс нин кутшӧмсюрӧ вежсьӧм лои. Ог тӧд сӧмын, бурланьӧ али мӧдарӧ. Ӧти-кӧ, ТВ-программасӧ чинтім джынвыйӧ – колим медшӧр телеканалъяс. Дерт, медводз юасим лыддьысьысьяслысь, кутшӧм налы колӧ. А такӧд тшӧтш лои позянлун содтӧд нёль лист бокысь лыддьыны уна сикас гижӧд-статья. Чайта да, гажтӧм программа дорсьыд тайӧ бурджык…
Мӧд-кӧ, тавосянь ог кутӧй лэдзны «Тысяча мелочей» содтӧд петаснымӧс. Мыйла? Бара жӧ, медводз лыддьысьысьяслысь юасим, «Ордым» лавкаӧ волысьяслысь тшӧтш и. Унджыкыс шуисны, «Тысяча мелочейыс» пӧ ёнасӧ оз и ков, сэн и тан пӧ тай быдсикас татшӧмсяма роч журналсӧ вузавлӧны, да и ӧні ставсӧ тайӧс позьӧ лыддьыны ӧтуввезйысь. Град йӧр вӧдитысьяс сӧмын ёна корисны, «Лунный календартӧ» пӧ быть йӧзӧдӧй. Йӧзӧдам, дерт! А «Тысяча мелочей» пыддиыс комиӧн кутам дасьтыны быдсикас жӧ, позьӧ шуны, «шылльӧ-мылльӧ-сӧ». Вӧзйӧй и ті, пыдди пуктана лыддьысьысьяс, нӧшта мый йылысь колӧ гижны (гусьӧн висьтала: коми кроссворд-сканворд да сёян-юан рецептъяс тай корисны нин йӧзӧдны-а).
Сэсся сідз шусяна официальнӧй юӧр-выльторсӧ шуим сетавны «Дженьыда» рубрикаӧн кык-куим сёрникузяӧн, ӧд та йылысь газет петтӧдзыд ёна водзджык позьӧ тӧдмавны телевизор пыр да ӧтуввезйысь.
А сэсся – бара пыр водзлань. «Коми му» редакцияын зільӧны тӧлка да уджач йӧз (а мыйта на миян енбиа внештатнӧй авторыс!), сідзкӧ, и водзӧ тіянӧс виччысьӧ уна сикас выль да интереснӧй гижӧд-статья. Ми эскӧдам, мый ставсӧ кутам вӧчны сьӧлӧмсянь, медым тіянлы окота вӧлі босьтны кианыд Коми Республикаса медся важ газет (таво «Коми мулы» тырӧ 103 во!) да став лист боксӧ помӧдзыс лыддьыны.
Став бурсӧ сиӧмӧн,
Галина МАКАРОВА,
«Коми йӧзӧдчан керкаӧн» веськӧдлысьӧс вежысь да «Коми му» газетса шӧр редактор.