Александра Ногиевалӧн сьыланкывъясыс бура тӧдсаӧсь миян республикаын олысьяслы. Сылӧн медся нималана «хитъясӧн» лоисны, буракӧ, «Ёртлы» да «Эн пов». Том ныв ачыс гижӧ кывбуръяс вылӧ шыладсӧ.
Чужӧма-быдмӧма сійӧ Сосногорск карын, ӧні уджалӧ Сыктывкарса школаын, велӧдӧ челядьӧс роч кывйӧ да литератураӧ. Став прӧст кадсӧ сиӧ музыкалы.
–Буретш во сайын ме лэдзи ассьым сольнӧй альбом, – висьталӧ ныв. – Сійӧ – менам творчествоын, уна вося уджын медтӧдчанатор.
Таво гожӧмнас Александраӧс да сылысь «PopCorn» котырсӧ корӧмаӧсь петкӧдчыны Эстонияса фестиваль вылын, но коронавирус торкис-дзугис том йӧзлысь дум-кӧсйӧмсӧ.
–Суйӧр сайын петкӧдчӧмыс – артистлӧн олӧмын мӧд, ыджыдджык тшупӧд, – юксьыштіс мӧвпъяснас Александра. – Эска, регыд помасяс пандемияыс, олӧмыс бӧр ладмас, да ми збыльмӧдам став кӧсйӧмнымӧс.
Ирина Терентьева. Снимокыс Наталья РузняевалӦн.