Бызӧвӧй грездӧдз Печора карсянь 20 гӧгӧр километр. Грездыс нималӧ палеолит кадся стоянкаӧн: 2000-ӧд воясын археологъяс туясьӧмаӧсь сэні да аддзӧмаӧсь мамонтъяслысь колясъяссӧ да неандерталечьяслысь уджалан ӧрудиеяссӧ. И тайӧ кадсяньыс мамонт лои Печора районлӧн символӧн. Тайӧ пемӧс костюма аниматоръясӧс позьӧ аддзывны карса гажъяс да уна сикас чукӧртчылӧм-аддзысьлӧм вылын.
Нималӧ Бызӧвӧй грезд и семейнӧй музейӧн. Музейсӧ асланыс керкаын лӧсьӧдӧмаӧсь Апанасенко гозъя.
Ӧшинь уланыс найӧ лэптӧмаӧсь збыльысь кӧрдорса чом да, дерт жӧ, овмӧдӧмаӧсь кӧръясӧс. Чомйыд ӧд тайӧ пемӧстӧгыс лоны оз вермы! Тӧв и гожӧм Апанасенкояс дорӧ волывлӧны туристъяс, медым малалыштны паськыд сюра пемӧсъяссӧ, мыччыштны налы китыр нитш да пыравлыны кӧр видзысьяслӧн оланінӧ. Музейсьыс жӧ позьӧ аддзывны Сӧвет кадӧ гортын вӧдитчан эмбур: патефон, утюг, уна дозмук. Гозъялы зэв дона асланыс семьялӧн нэмӧвӧйся реликвияыс – 150 гӧгӧр во сайын нин вурлӧм изьва сос. Кӧзяйкаыслы сійӧ кольӧма пӧчьяссяньыс.
Ичӧтик сиктыс пӧся чолӧмалӧ гӧсьтъясӧс и Печоралӧн медшӧр праздник – «Черинянь гаж» вылын. Нимӧдӧны чериняньсӧ быд во июнь тӧлысьлӧн бӧръя вӧскресенньӧӧ. Тайӧ лунас Бызӧвӧйын лудъяс вылын паськӧдчӧны ворсан-вузасян площадкаяс. Гажыслӧн шӧр юкӧныс – квест: сэтчӧ пырӧдчысьяс ордйысьӧны командаӧн асланыс тӧдӧмлун-сямӧн да вын-эбӧсӧн. Медся тэрыбъясыслы вичмӧ медшӧр козиныс – сьӧмгаа ыджыд черинянь.
Грездас олысьыс чинӧ воысь-во, ёнджыксӧ дачникъяс коллялӧны сэні гожӧмсӧ. Тӧвйӧ сӧмын 30 кымын морт. Но та вылӧ видзӧдтӧг войвывса ичӧтик грездас кыскӧ и туристъясӧс, и газет-телевидениеын зільысьясӧс. Волывлӧны татчӧ и суйӧрсайса экспедицияяс. Шуам, некымын во сайын вӧлӧмаӧсь Германияысь да Финляндияысь гӧсьтъяс.
А кыдз эськӧ артмис, мый ме, изьваса ныв, татшӧм бура тӧда Печора вожысь тайӧ грезд йывсьыс?
2018 во. Университет помалӧм бӧрын чайті аддзыны уджсӧ Комилӧн юркарысь. Эз артмы. Во помланьыс Санкт-Петербургса «Российский север» форум вылын тӧдмаси этша лыда войтыръяскӧд, кодъяс, чайта, гипнотизируйтісны менӧ асланыс сьылӧмӧн да бубенӧн ворсӧмӧн. Чукчаяскӧд, эскимосъяскӧд, якутъяскӧд, эвенкъяскӧд сёрнитӧм-ёртасьӧм бӧрын гӧгӧрвои, мый кӧсъя мунны Ылі Войвылӧ. Ёна-ӧ войвылӧ? Видзӧдалі сідз шусяна вакансияяс Анадырысь, Магаданысь, Петропавловск-Камчатскийысь. Ӧти киӧн ысталі Сыктывкарӧ резюме, а мӧд киӧн корси «гуглысь» Якутскӧ мунан туйсӧ.
Юкси матыссаяскӧд аслам дум-кӧсйӧмӧн. Кодкӧ тшӧктіс думыштны лунвыв йылысь, мӧдъяс йӧюкӧн шуисны, коймӧдъяс «Еду в Магадан» сьыланкыв сьылісны. Сёрниті мамӧкӧд, мися, эн дивуйт, муна кӧ кытчӧкӧ. Мам шуис: «Он жӧ ӧд сэтшӧм ылӧдз мун». Мися, мунны кӧ – муна, ачыд тӧдан. Мам сьӧкыда лолыштіс, мый пӧ сэсся йӧйыдкӧд вӧчан.
Ачым шмониті ас вылын, мися, нылыд Сыктывкарысь уджсӧ эз аддзы, пырис депрессияӧ да муніс Анадырӧ.
Тӧлысьысь дырджык ме олі войвыв йылысь мӧвпъяснас, тӧді нин, кытчӧ мыйӧн мунны, кӧні кутшӧм вакансия вӧзйӧны, кутшӧмӧсь удждонъясыс да вузасянінъясас донъясыс. Но сэсся матыстчисны выльвося шойччан лунъяс да недыр кежлӧ тайӧ мӧвпъясысь эновтчи: муні гортӧ удж корсьӧмысь шойччыштны.
И буретш тайӧ выльвося лунъясас сюри меным Печораса этнопаркысь вакансия. Дыр думайттӧг ысті резюмеӧс. И ӧд звӧнитісны меным, корисны сёрнитыштны. А мӧд лунас висьталісны, мый босьтӧны менӧ удж вылӧ. Юаси матыссаяслысь, звӧниті ёртъяслы, мися, мый шуанныд ме кӧ Печораӧ уджавны муна. Вочавидзисны: «Аттьӧ, мый абу Магаданӧ».
Со тадз олӧм туйӧй и вайӧдіс менӧ «Бызӧвӧй» этнокультура паркӧ, кӧні уджалі кык гӧгӧр во. Этнопарксӧ стрӧитӧмаӧсь Бызӧвӧй грездсяньыс ӧти километр ылнаын. Уджавны заводиті культорганизаторӧн, сэсся «быдми» отделӧн веськӧдлысьӧдз. Шӧр могыс менам вӧлі гижны сценарийяс да нуӧдны гажъяс, дасьтыны проектъяс, дерт жӧ, ноксьыны быдсикас документӧн.
Эм этнопаркын и гостиница, кытчӧ войковтны тшӧкыда сувтлӧны туристъяс, кодъяс мӧдӧдчӧны Урал вылӧ. Шуам, сӧмын кольӧмвося тулыснас волісны Санкт-Петербургысь, Перымысь, Барнаулысь, Йошкар-Олаысь гӧсьтъяс.
Таво уси ыджыд шуд пырӧдчыны гранта конкурсӧ. Этнопаркса коллективӧн шедӧдім кык ыджыд вермӧм. «Народный бюджет» конкурсын национальнӧй политика министерство сетіс Ёма бабалысь керка кыпӧдӧм вылӧ грант, а культура министерство вичмӧдіс пуысь вӧчӧм скульптураяс вылӧ сьӧм. Арнас нин этнопаркса йӧрын аслас керкаӧ «овмӧдчис» мойдысь петӧм Ёма, кодлы «отсасьӧны» парма-ягса кӧзяин Ош да ставсьыс полысь Кӧч.
* * *
Век шоныд сьӧлӧмкылӧмӧн казьтыла тайӧ кадсӧ: уджъёртъяскӧд ёртасьӧмсӧ, ӧтвылысь зільӧмсӧ, йӧзӧс гажӧдӧмсӧ.
И ӧнӧдз ачым ог вермы гӧгӧрвоны, мыйла ме эновті этнопарксӧ. Быттьӧ сьӧлӧмам йиджис дум-кӧсйӧм, мый колӧ мунны водзӧ. Уджъёртӧй шуис: «Чайта, тэнад юрад пукалӧ кузь уска ыджыд тӧрӧкан, коді радейтӧ быдсяматорсӧ тэныд шӧпкӧдны. Тӧрӧканыд окотитӧ войвылӧ – тэ мунан сэтчӧ, кӧсйӧ Сыктывкарӧ – тэ локтан татчӧ».
Думышті да, збыльысь ӧд – тӧрӧканыд и ыджыдалӧ ме вылын. Ӧні со «Коми му» газетӧ вайӧдіс. А мый лоӧ водзӧ? Ог тӧд. Уджала. Гора кывъястӧг да гырысь планъястӧг. Тӧрӧканыд, дерт, коркӧ бара на мыйкӧ шӧпкӧдас, но, кыдз шуласны, олӧмыс сэсся ставсӧ петкӧдлас…
Ирина Терентьева.
Снимокъясыс ӧтуввезйын «ВКонтактеын»
«Бызӧвӧй» этнокультура парклӧн группаысь.