Матӧ 5 миллион шайт вичмӧдіс «Монди Сыктывкарса ЛПК» Сыктывдінын социальнӧй юкӧнын да экономикаын ёсь гӧрӧдъяс разьӧм могысь. Тайӧ сьӧм весьтас районын лои ньӧбӧма выль техника, дзоньталӧма школа-библиотекаяс да отсалӧма вӧр овмӧсса ветеранъяслы. Олӧма войтырлы кӧ воддза воясас котыртлісны гажа рыт-аддзысьлӧмъяс, пандемия кадӧ найӧс нимӧдісны мӧд ног.
Кыдзи юӧртісны Сыктывдінса администрацияын, «Монди Сыктывкарса ЛПК»-кӧд социальнӧя ёртасьӧм кузя сёрнитчӧм серти 2020 воын районлы вичмис 4,897 миллион шайт. Сьӧмсӧ юкисны кык нырвизь серти.
Ӧти-кӧ, отсӧгыс вичмис ичӧт да шӧр бизнеслы уджсӧ кокньӧдӧм да производствосӧ сӧвмӧдӧм могысь – 2 миллион 938 сюрс шайт. Та весьтӧ Сыктывдінысь ас вылӧ кык уджалысь вермисны ньӧбны техника – фронтальнӧй погрузчик да «Газель». Вузасянінъяс коланаторйӧн ас кадӧ могмӧдӧм ради «Сыктывдін» потреб-общество лӧсьӧдіс «ГАЗ» автомобиль. Нӧшта ӧти компанияын пыртісны уджӧ машина кузов дзоньталан цех, мӧдын выльмӧдісны лым вывті ветлан техника. «Монди Сыктывкарса ЛПК»-сянь сьӧм весьтӧ выльмӧдісны сідзжӧ фермерско-крестьянскӧй овмӧсын оборудование да ньӧбисны вузасян автолавка.
Мӧд нырвизьыс – социальнӧй юкӧн. Сідз, «Монди Сыктывкарса ЛПК»-лӧн сьӧма отсӧг весьтӧ Яснӧгса библиотекаын выльмӧдісны биӧн могмӧдан тэчас: нюжӧдісны сутуга-кабель, ладмӧдісны лампа-светильникъяс, би чуткан-розетка да с.в. Уджыс пуӧ и Яснӧгса школаын. Велӧдчанінын став урчитӧмторсӧ помавтӧм на, но октябрь шӧрсянь нин дзоньталӧны пусянінсӧ да сёян-юанінсӧ.
«Монди Сыктывкарса ЛПК» отсӧгӧн шуӧма збыльмӧдны социальнӧй юкӧнын и мукӧд уджтас. Торйӧн кӧ, Мандачын, Яснӧгын да Гарьинскӧйын урчитӧма котыртлыны вӧр овмӧсса вӧвлӧм уджалысьяслы гажа рыт-аддзысьлӧмъяс да нуӧдны районса ветеранъяслысь «Тӧжд» форум. Коронавируса висьӧм паськалӧм вӧсна уна йӧза чукӧртчылӧмсӧ кӧ оз лэдзны котыртлынысӧ, комбинатӧн вичмӧдӧм сьӧм весьтӧ ньӧбасны ветеранъяслы козинъяс да бергӧдасны Сыктывдінса культура учреждениеясын кутшӧмсюрӧ дзоньтасян удж.
«Миянлы зэв колана да тӧдчана «Монди Сыктывкарса ЛПК»-сянь отсӧгыс. Аттьӧалам комбинатӧс уна во ёртасьӧмысь да доя гӧрӧдъяс разьны отсалӧмысь», – висьталісны Сыктывдін районса администрацияын.
* * *
2019 воын «Монди Сыктывкарса ЛПК»-лӧн Сыктывдін районкӧд ёртасьӧмлы тырис 10 во. Медводдза сёрнитчӧмсӧ вӧлі кырымалӧма да вынсьӧдӧма 2008 воын: сэки комбинат вичмӧдіс районса шӧр бурдӧдчанінлы сьӧм. 10 воӧн муниципалитетлы отсӧгыс воис 40-ысь унджык миллион шайт дон. Сы весьтӧ лои видзӧма 132 уджалан места, лӧсьӧдӧма 76 выльӧс (62-ыс – пыр кадся, 14 – недыр кежлӧ). Ас вылӧ уджалысьяс вермисны збыльмӧдны 43 проект.
Снимокъясыс Сыктывдінса администрацияысь.