2014 восянь быд ар Кӧрткерӧс районса олӧма йӧз чукӧртчылӧны Адзорӧмса ты дорын туристъяслӧн фестиваль вылӧ. Таво волісны 9 сикт-посёлокысь ветеранъяс. Кӧть асывнас кынмалӧма-пужъялӧма, ставным вӧлім нюмбанаӧсь, геройсьыс-герой кыпыд ловруаӧсь.
Великӧй Отечественнӧй война помасьӧмсянь 75 во тырӧмлы сиӧм тавося гаж-ордйысьӧм вылӧ воысьясӧс чолӧмалісны районса ветеранъяслӧн сӧветӧн юрнуӧдысь Сергей Васильевич Изъюров, райадминистрацияӧн веськӧдлысьӧс вежысь Константин Владимирович Карпов, районса коми культура шӧринын уджалысь Татьяна Борисовна Кашапова, Пезмӧг сиктса администрацияӧн юрнуӧдысь Александр Александрович Торопов.
Медводз коліс бивак лӧсьӧдны-сувтӧдны, сэсся лыддьыны война йылысь кывбур. Миян командасянь Роза Геннадьевна Панюкова висьталіс Александра Мишариналысь «Мед енэжыс вӧлі век лӧз» кывбур.
Та бӧрын и ордйысьӧмыс заводитчис. Быд командалы коліс палатка сувтӧдны, бипур пестыны да ва пузьӧдны, гӧрӧдъяс гӧрддзавны, туристъяслысь сьыланкыв ливкйӧдлыны. Вӧліны тшӧтш и «Ориент-шоу» да туристъяслӧн эстафетаяс, «Победители» интеллектуальнӧй турнир. Ми, Ыджыдвидзса команда, казьтыштім, мый война вылӧ сиктысь мунӧма 603 морт, кыксё комын нёльыс бергӧдчӧмаӧсь бӧр, сё ветымын нёль салдатлӧн гортас воӧма налӧн усьӧм йылысь юӧр, кыксё кыкӧн вошӧмаӧсь некутшӧм юӧртӧг. 158 салдатлысь олан туйсӧ вӧлі тӧдмалӧма бӧръя воясӧ. Ӧні сиктаным олӧ тылын 9 уджалысь да 37 морт, кодлӧн челядьдырыс веськаліс война воясӧ. Школаса музейын чукӧртӧма фронтӧвикъяс да война кадся олӧм йылысь уна гижӧд, кытысь тыдовтчӧ, мый ыджыдвидзса тшӧтш пуктӧмаӧсь Победаӧ ыджыд пай. Чӧсмӧдлім жюриӧ пырысьясӧс и война кадся коми сёянӧн: паренчаӧн, лязйӧн, тупыля картупельӧн, сола тшака картупельӧн, рача няньӧн, шаньгаӧн, мортпувйӧн, мырпомӧн, турипувйӧн. Дасьтіс сёянсӧ Ия Васильевна Симпелева.
Ордйысьӧмсӧ котыртысьясӧс аттьӧалам бура дасьтӧмсьыс да сьӧлӧмсяньыс нуӧдӧмсьыс.
Бӧрас пасйисны вермысьясӧс, вичмӧдісны козин-кубокъяс. А ме эськӧ став командаыслы медводдза местасӧ сеті, зэв кыпыда, ӧта-мӧдыслы отсасьӧмӧн ордйысисны да. Пыр кыліс шмонь-серам, долыд сёрни. Но конкурс кӧ, сідзкӧ, и вермысьяс эмӧсь: медводдза местасӧ шедӧдісны ыджыдвидзсаяс, мӧдсӧ – пӧдтыбоксаяс, коймӧдсӧ – лӧкчимдінсаяс. Ошкана гижӧдъяс сетісны одыбсалы, висерсалы, мордінсалы, шойнатысалы, кӧрткерӧссалы да калятысалы.
Гудӧкӧн ворсіс Владимир Трошев, а ми сьылім, кодсюрӧ и йӧктіс на.
Нимкодь, мый олӧма йӧз эз повзьыны арся кӧдзыд поводдяысь, «карнана» висьӧмысь, лунтыр кежлӧ эновтлісны гортгӧгӧрса уджсӧ да волісны Адзорӧмса фестиваль вылӧ. А ми, ыджыдвидзсаяс, сьӧлӧмсянь аттьӧалам став ордйысьысьсӧ да миянлы отсасьысьясӧс: «Исток» видз-му овмӧсӧн веськӧдлысь Надежда Владимировна Макароваӧс, механик Андрей Владимирович Макаровӧс, Галина Николаевна Лапшинаӧс да Валентина Николаевна Ждановаӧс, библиотекаын уджалысь Наталья Андреевна Павловаӧс, сиктса школаын музейӧн веськӧдлысь Ольга Ивановна Мишаринаӧс. Аттьӧалам и Михаил Пантелеймонович Игушевӧс да Михаил Иванович Симпелевӧс машинаӧн миянӧс новлӧдлӧмысь. Дерт жӧ, ошкана кывъяс окота висьтавны и Сергей Васильевич Изъюровлы, коді эз повзьы нинӧмысь да котыртіс фестивальсӧ.
Анна Александровна Попова,
Ыджыдвидзса ветеранъяслӧн сӧветӧ пырысь.
Кӧрткерӧс р.
Снимокъясыс Юлия Михайловна ПоповалӦн да ӧтуввезйысь.