Сыктыв районса Палаззяын пӧдлассьӧма начальнӧй школа. Велӧдчысьясӧс кутасны новлӧдлыны шогмытӧм туйӧд Поёлӧ, 25 верст сайӧ. Та йылысь «Коми мулы» юӧртісны Палаззяын олысьяс.
Бать-мамлысь эз юавны
–Ми эськӧ ёна нин дорйысим, сулалім школа пӧдлалӧмлы паныд, но йӧзсӧ эз кывзыны. Кӧть эськӧ сиктын школа видзӧмсӧ кольӧмвося ноябрын «Коми войтыр» ӧтмунӧмлӧн районса конференция дырйи пасйылісны медшӧр могъяс пӧвстын. А ӧні весиг бать-мамкӧд некод эз сёрнит, сӧмын юӧртісны – пӧдлалім пӧ. Уджалысьяссӧ кабалаӧ кырымӧдісны да гортаныс ыстісны, – висьталіс сиктсаяс нимсянь Палаззяса администрацияӧн вӧвлӧм юрнуӧдысь Людмила Попова.
Тайӧ пӧ миян дзик выль благоустроитӧм стрӧйба, водзӧ висьталӧ Людмила Егоровна. Начальнӧй школа-садсӧ кыпӧдлӧмаӧсь 2010 воын. Алӧй ленточкасӧ орӧдны волӧма республикаса сэкся юралысь Вячеслав Гайзер. Сэки садйӧ ветлӧма 13 дзолюк, начальнӧй школаӧ – кӧкъямыс. Витӧд классянь зонпосниӧс новлӧдлӧмаӧсь Поёлса школаӧ.
Дас во кольӧма сэксянь да, челядьыс сиктын абу и содӧма. Ӧні пӧ 1-4 классъясын тӧдӧмлун босьтысьыс нёль морт. Со и мӧвпыштӧмаӧсь чинаяс, мый ныв-зонлы гортын велӧдчӧм дорысь бурджык ветлыны 25 километр сайӧ…
–Детсадсӧ пӧдлалісны жӧ?
–Эз. Сэтчӧ ӧні ветлӧ сизим кага. А посни классын велӧдчысьясӧс выль велӧдчан воӧ кутасны новлӧдлыны Поёлӧ. Ӧні нин новлӧдлӧны (асылын нуӧны, рытын вайӧдӧны), неважӧн сэні гожся шойччан лагер восьтӧмаӧсь да. Бать-мам майшасьӧны, туйыс ӧд кузь да шогмытӧм. Телефоныс оз кут. А мыйкӧ кӧ лоӧ ӧтарӧ-мӧдарӧ ветлігас?..
Палаззясалӧн начальнӧй школасӧ бӧр восьтӧм вылӧ лачаыс абу нин. Велӧдысьяссӧ ыстӧмаӧсь нин шойччыны, пенсия арлыдаӧсь да. Томъясӧс пӧ оз виччысьны.
Чинаяслы эськӧ вӧзйылӧмаӧсь школасӧ кольны. Орчча Бӧртӧм-База посёлокын пӧ гоз-мӧд велӧдчысь эм жӧ да, позис найӧс татчӧ вайны, но Поёлӧ жӧ новлӧдлыны шуӧмаӧсь.
Бордтӧгыд он лэбав
Ӧні Палаззяын олысьясӧс майшӧдлӧ сиктъяс костын шогмытӧм туйыс. Сэті пӧ верстьӧджыкъяс зӧркйысисны, а ӧні и посни челядьлы ковмас.
Таво гожӧм эськӧ босьтчылӧмаӧсь дзоньтавны вӧлӧксӧ. Неуна «дӧмлыштӧмаӧсь», а сэсся ӧвсьӧмаӧсь. Да и, йӧзлӧн висьталӧм серти, выль «дӧмасыд» нин заводитӧма киссьыны. Тыдалӧ пӧ, асфальтсӧ сідз-тадз и шняпйӧдлісны гуранъясас.
–Туйыс республикалӧн дӧзьӧр улын, а со кутшӧм лёка тӧждысьӧны. Асфальтыс пасьмунӧма, кӧть сэсся енэжті лэбав, да бордтӧмӧсь, – висьталӧ Людмила Егоровна.
–А мыйла эз ставнас дзоньтавны, босьтчылісны кӧ? Да и челядьӧс шогмытӧм туйӧд новлӧдлӧны школаӧ…
–Миянлы вочавидзисны, тайӧ туйыс пӧ локтан восянь лоӧ федеральнӧйӧн, восьтасны Визинсянь
Перымӧдз туй да. Со и дугдісны дзоньтасьнысӧ. Орчча Гагшорӧдз весиг эз воны. Локтан восӧ виччысьӧны. Но ӧд туйыс миянлы ӧні колӧ! Быд здук колӧ кодлыкӧ кытчӧкӧ мунны.
Людмила Поповалӧн кывъяс серти, палаззяса гижӧмаӧсь восьса письмӧ Коми Республикаса юралысьлысь удж вӧчысь Владимир Уйбалы. Шыӧдчӧмаӧсь и ГИБДД-ӧ. Но вочакывйыс некодсянь абу на.
Екатерина МАКАРОВА.
Сыктыв р.