-Ассьым уджӧс зэв ёна радейта, став сьӧлӧмсянь, весиг со синваӧй доршасьӧ, кор та йылысь висьтася, – буретш тайӧ кывъяссяньыс и заводитіс сёрнинымӧс Вера Васильевна Плехова. Мелі гӧлӧса, яндысьысь видзӧдласа анькӧд сӧмын на тӧдмасьӧм бӧрын пыр и гӧгӧрвоан, мыйта сыын шаньлуныс да вежавидзӧмыс.
Вера Васильевна витӧд во уджалӧ юркарса нывбабаяслӧн консультацияын операционнӧй медсестраӧн, таысь ӧтдор нӧшта на и процедура вӧчан, ЭКГ да УЗИ кабинетъясын зільӧ.
Луздор районса Черёмуховкаын чужлӧм ань ичӧтсяньыс кӧсйӧма лоны медикӧн. Но олӧмыс кежӧдӧма тайӧ нырвизьсьыс бокӧ – Вера помалӧма юркарса педколледж да пырӧма уджавны кагульничаӧн детсадйӧ. Но бурдӧдысьлысь профессия босьтӧм йылысь дум-кӧсйӧмыс пыр вӧлӧма юрас. И кыдз сӧмын тӧдмалӧма, мый медколледжын заводитӧмаӧсь велӧдны рытнас – пыр жӧ и сдайтӧма сэтчӧ колана документъяс. А сэсся нёль во детсадйын уджсьыс орӧдчывтӧг велӧдчӧма медсестраӧ. И кӧні сӧмын абу прӧйдитлӧма практикасӧ – енбиа аньӧс виччысьӧмӧн-виччысьӧмаӧсь, ӧд аддзӧмаӧсь, мый сылӧн синмыс ӧзйӧ сьӧлӧмыслы лӧсялана удж вылас да и тайӧ профессиясӧ босьтӧма, кыдз шуласны, тӧдӧмӧн нин.
Со и тані (уджъёртъясыслӧн висьталӧм серти) Вера Васильевна зільӧ став сьӧлӧмсяньыс да кывкутӧмӧн.
-Миян уджалан котырным зэв бур, ме ставнысӧ радейта да пыдди пукта. Кӧсъя, мед эськӧ ӧдйӧджык нин помасяс тайӧ коронавируса майшасьӧмыс. Ставныслы сиа лоны дзоньвидзаӧн, торйӧн нин аньяслы кӧсъя шуны – видзӧй асьнытӧ да ас кадӧ шыӧдчӧй бурдӧдысьяс дорӧ.
Галина МАКАРОВА.
Снимокыс авторлӧн.