Анджела, Аджика, Ангелика…
Квайтӧд классянь нин ӧтнам карад лэччывлі. И мыйлакӧ медводз вӧлі пырала музейӧ. Ку-тшӧмӧ веськала. Ӧти кадӧ матыссаяс «музейӧн» вӧлі и нимтӧны. Сэсся искусство училищеад пырны ӧтнам жӧ лэччи. Ӧтар киын чемодан, мӧдарас – дипломат. Дипломатыс шкапын, гашкӧ, во вит куйліс, ассьыс кадсӧ виччысис! (Заводитчӧ газетлӧн май 28 да июнь 4-ӧд лунся номеръясын)
Дирижёрӧ велӧдчыны мунны юрын эз вӧв. Артисткаӧн ӧд лоны кӧсйи! А миян рӧдысь сӧмын тайӧ училищеас тӧдса велӧдысьыс вӧлі – Ангелина Симонова. Ангелина Андреевнакӧд ми училищеын нин тӧдмасим, сыӧдзсӧ эг аддзыв весиг морттӧ. Дирижёрско-хорӧвӧй юкӧнад сэки босьтлісны музыкальнӧй школатӧг (ме коддьӧмсӧ), да сійӧн и веськалі.
Зэв сьӧкыд, дерт, первойсӧ вӧлі. Нотаяссӧ весиг эг тӧд, кысь нин ворсны кыкнан киӧн! Сэтшӧм сьӧкыд вӧлі, мый медводдза вонас нин кӧсйи эновтчыны, весиг мамӧс корлісны сёрнитны.
Аттьӧ бара-й ставныслы, коді терпитіс менӧ, помӧдзыс вайӧдіс. Веськыда кӧ шуны, училищеад меысь, дас вит арӧса йӧй нылысь, верстьӧ мортӧс вӧчисны. Юр-сьӧлӧмын став тӧдӧмлунлӧн подулыс – сэсянь. Не кӧ буретш тайӧ нёль воыс, эськӧ вӧлі ме ёна гӧлиник гижысьӧн. А, колӧкӧ, и гижысьнас эг вӧв весиг. Ӧд мӧд курсын гижи «Медводдза муслун» поэмаӧс. Ок, и кузь вӧлі! Дерт, шог радейтчӧм йылысь. «Тэ менӧ шыбитін, а ме тэнӧ радейта…». Кутшӧмкӧ бакенъяс на сэн вӧліны… Рочӧн гижи. Сэки ӧд ме дзик нин роч вӧлі. Кӧть общагаад ӧтвылысь олысьясыд и тӧдім, коді комиыс, но ас костаным мам кывнымӧс эг лэдзлӧй. Сералісны сэки комияс вылад, чуньнас петкӧдлісны, эльтчисны, янӧдісны. Рочӧн гижнытӧ и босьтчи. Хорӧн веськӧдлысь Наталья Георгиевна Ростовалы сӧмын кывбуръясӧс петкӧдлі. Сылӧн Роч муын тӧдса журналистка вӧлі да, сійӧ сэсся сылы вӧлі петкӧдлӧ. Тадзи кыкӧн найӧ и вайӧдісны менӧ, позьӧ шуны, кывбуралӧмӧдзыд. Ме ӧд сэки весиг поэзиясӧ терпитны вӧлі ог вермы, проза вылӧ усьласи.
Коркӧ литература урок вылӧ воліс роч кывбуралысь Александр Алшутов. Сійӧ сэки оліс Вылыс Максаковкаын, уджаліс библиотекаас. Ме пӧ, шуліс, ас бердын котырта том гижысьяслысь кружок сяма да корис и менӧ сэтчӧ волывлыны. Но велӧдчыштны ыджыд поэтлысь сідз эз и мойви. Мыйлакӧ тай эг и паныдасьлӧй-а…
Училище бӧрын ме неуна уджалышті Шойнатыса шылада да шӧр школаясын, сэсся музыкальнӧйсӧ тупкисны, и ме локті гортӧ. Мамӧй ньӧбис клубӧ пианино (сэки сійӧ культура керкаӧн нин веськӧдліс), вежаньӧй – садикӧ электропианино. Челядькӧд нокси, концертъяс дасьті. А рытъяснас нуски-гижи. Смелмӧдчи да, ысті кывбуръясӧс «Молодёжь Севера» газетӧ. Воис вочакыв: кывбуръясыд пӧ свежӧсь, но миян газетлы оз лӧсявны. Сиам пӧ творчествоад ыджыд вермӧмъяс. А «Красное знамяын» нёль кывбур йӧзӧдісны. Сэтысь буретш менӧ казялӧма Володя Цивунин (висьтасьліс коркӧ). Районса «Звезда» газетын куті тшӧ-кыдакодь петкӧдчыны.
Ӧтчыд мамӧй вӧзйӧма менӧ «Звездаса» шӧр редактор Надежда Николаевна Быковскаялы, мед сійӧ босьтас менӧ газетас. Босьтіс со… Статья-ястӧ кӧть и комиӧн нин велӧдчи гижны, а кывбуръяснад век на рочаси.
Сэк кежлӧ и клубса пианиноыд дзикӧдз торксис, и электроыд садик сорыс сотчис нин…
Кӧрткерӧсса газет редакцияӧ кор-кӧ кежаліс роч кывбуралысь Александр Суворов. Ошкӧма кывбуръясӧс, но мыйлакӧ эз синмӧ тайӧс висьтав, а мукӧдыслы. А ассьым сӧмын юаліс, мыйла пӧ коми морт, да рочӧн гижан? Кыдз нӧ, мися, ас кежысь мӧвпала, ме коминас гижа, кор роч морт?! Со и университетса роч филология юкӧнын велӧдча… Но, буракӧ, Александр Васильевичыдлӧн кывъясыс кыдзкӧ да йиджисны. Первой шочиника, а сэсся пыр тшӧкыдджыка та йылысь мӧвпавны понді. А сэсся и олӧмыс гӧгӧр вежсьыны кутіс – коми войтырыд юрсӧ кыпӧдіс, чатрасьны кутіс, асьсӧ петкӧдлыны. Кывбур гижӧмысь эновтчыны ме эг нин вермы, ӧд сытӧг ме эськӧ вӧлі некод… Бура дыр майшаси, маитчи, матайтчи. Сэсся шы-ӧдчи Енмыс дорӧ, отсав, мися, инды, мый водзӧсӧ керны: рочӧн гижны али комиӧн. И ӧтчыд вӧтын кодкӧ быттьӧ вашкӧдіс пельӧ: комиӧн! Сідзкӧ, шуи, бӧрйӧма. А ачым тірала полӧмӧйла: кытысь нӧ коми рифмасӧ эськӧ кута корсьны, коньӧрушкаӧй?..
Тіралан киӧн заводиті первой ассьым роч кывбуръясӧс комиӧдны. Сэсся выльясӧс гижны. И лолӧй быттьӧ воссис! Чужан кывйӧй, кодӧс ме сы мында во пӧдті йӧз кывйӧн, кыськӧ быттьӧ ылькнитіс да разаліс вир сӧнъясӧд! Татшӧм кокниа некор на кывбуръясӧй эз гижсьывны!
Анжелика Елфимова.
(Водзӧ лоӧ на).