Россияса Оланподулӧ вежсьӧмъяс дасьтан котырысь сопредседатель, Федерация Сӧветысь комитетӧн юрнуӧдысь Андрей Клишаслӧн кывъяс серти, Конституцияӧ вежсьӧмъясыс петкӧдлӧны йӧзыслы, мый государство век кутас нуӧдны социальнӧй нырвизя политика.
ВЦИОМ-лӧн туялӧм серти, буретш социальнӧй юкӧнлы, а сідзжӧ вӧр-ва видзӧмлы, наукалы инман вежсьӧм-вӧзйӧмъяссӧ йӧзыс шуӧны медся тӧдчанаясӧн. Сідз, 95 прӧчент войтырыс пӧ ошкӧны медицина отсӧг бурмӧдӧм, 93%-ыс — государствосянь челядьлы отсӧг сетӧм, 92 прӧчентыс — пенсияяс быд во быть индексируйтӧм йылысь вӧзйӧмъяс.
Ошкӧны йӧзыс и судзсьытӧма олысьяслы отсалӧм, социальнӧй пособиеяс содтӧм йылысь вежсьӧмъяс, а сідзжӧ и сэтшӧмъяссӧ, кӧні индӧма государстволы кывкутны уджалысьяслысь правояс дорйӧм вӧсна да тшӧктӧма медічӧт удждонсӧ урчитны овны судзсьымӧн мындаысь абу этшаджык.
Страналӧн асшӧрлун йылысь Конституцияӧ вежсьӧмъяскӧд йитӧдын 88 прӧчент войтырыс шуӧны коланаӧн пасйыны Оланподулӧ, мый оз позь вежлавны Россиялысь граница, а 84%-ыс — мый Россия лоӧ странаяс костын зык-вентӧг олӧм ёнмӧдысь государствоӧн.
84 прӧчентыс жӧ чайтӧ, мый чина мортлы оз позь лоны мукӧд странаса гражданинӧн да видзны озырлунсӧ суйӧр сайын, 81%-ыс лыддьӧ, мый и судьяяслы оз позь видзны сьӧмсӧ суйӧрсайса банкъясын.
Россияын олысь войтырысь 75 прӧчентыс сулалӧ сы дор, медым Россияса Конституциялӧн выныс вӧлі странаяс костын кырымалӧм сёрнитчӧмъясысь ыджыдджык.
Историяын лоӧмторъяс дзугӧмлы паныд сулалӧ 89 прӧчент войтырыс. 85%-ыс чайтӧ, Оланподулын пӧ колӧ индыны, мый роч кыв лоӧ государство ӧтувтысь войтырлӧн кывйӧн.
ВЦИОМ-лӧн туялӧм серти, странаын 78 прӧчент олысьыслы тӧдчана пасйыны Конституцияӧ, мый Россия Федерациялы аслас мутасын вуджӧма СССР-лӧн став правоыс.
***
Казьтыштам, Россияса президент Владимир Путин кырымаліс странаса Оланподулӧ вежсьӧмъяс пыртӧм вӧсна гӧлӧсуйтӧмсӧ июль 1 лунӧ нуӧдӧм йылысь индӧд.
Страналӧн шӧр оланпасӧ вежсьӧмъяс пыртӧм вӧсна позяс гӧлӧсуйтны сизим лун — 2020 вося июнь 25-ӧдсянь июль 1 лунӧдз. Гӧлӧсуйтны позяс быдӧнлы аслас бӧрйысян участокын.
«Мобильный избиратель» услуга серти позьӧ вежны гӧлӧсуйтанінсӧ. Та могысь июнь 5-21 лунъясӧ колӧ шыӧдчыны «Госуслуги» порталӧ, МФЦ-ӧ либӧ кар-районса избиркомӧ, а июнь 16-21 лунъясӧ — участокса избиркомӧ.
Шӧр бӧрйысян комиссияын тшӧктӧны, медым коронавирусысь видзчысьӧм могысь быд учас-токын часнас ассьыс гӧлӧссӧ вермис сетны 8-12 морт. Участокӧ найӧ пырасны ӧти ӧдзӧсӧд, а петасны мӧдӧд. Ставныслы сетасны маска, перчатки да ӧтчыдысь вӧдитчан ручка.
Кыдзи висьталӧ ЦИК-ӧн веськӧдлысь Элла Памфилова, гортын гӧлӧсуйтігӧн комиссияын зільысьяс да гӧлӧсуйтӧм бӧрся видзӧдысьяс оланінӧ оз пырны.
Роспотребнадзор вӧзйӧ бӧрйысян участокӧ мунігӧн босьтны сьӧрсьыд паспорт, маска, перчатки да ручка; участокын мукӧд йӧз дорӧ 1,5-2 метрысь матӧджык сибӧдчыны оз ков; паспортсьыд снимоксӧ видзӧдлігӧн маскатӧ ковмас пӧрччывны, та дырйи паспорттӧ участокса комиссияӧ пырысьлы сетны оз ков; гӧлӧсуйтанінын 15 минутысь дырджык овны оз ков; участокысь петігӧн маскатӧ да перчаткитӧ колӧ шыбитны вевта контейнерӧ, а китӧ зыравны антисептикӧн.
Гӧлӧсуйтан бюллетеньын быд вежсьӧм вӧсна торъя пасйӧд оз ло. Гӧлӧстӧ позяс сетны сӧмын став вежсьӧм вӧснаыс. Юалӧмыс лоас ӧти: «Ті ошканныд Россия Федерацияса Конституцияӧ веж-сьӧмъяс?». Вочавидзны позяс «Да» либӧ «Ог».