Кулӧмдін районса Ручысь 43 арӧса Николай Пименовлысь керка йӧрсӧ видзӧны кӧрт черань, пон да демон. Мужичӧй аслыспӧлӧс мыгӧръяссӧ мастеритӧ ковтӧм кӧртысь – металлоломысь.
Восьса енэж улын музей
Вит во сайын Николай Иванович ньӧбӧма сваритчан аппарат пывсянӧ пач вӧчны. Кыдзи сійӧс сваритны, «велӧдӧма» ӧтуввез, ӧд таӧдз мужичӧй кӧртысь абу вӧчасьлӧма. Кузнечавны ковмӧма велӧдчыны аслыс.
Пачыд артмӧма, и Николай ыззьӧма. Водзӧ босьтчӧма мастеритны аслыспӧлӧс мыгӧръяс. Важ песласян машинаысь, «Жигули» карбюраторысь да кӧрт прутъясысь вӧчӧма кузь кока чераньӧс, коді ӧні «везъясьӧ» пу вожъясын.
Дружокӧс дорӧма жугалӧм «Дружба» пилаысь. Николай Иванович висьталӧ, тайӧ пӧ Даша нылӧйлы козин. «Робик» робот видзӧ сарай ӧдзӧс. Тэчӧма сійӧс важ мотоциклысь: кокыс рессораысь, гыркйыс – бензобакысь, киыс – глушительысь. Повзьӧдчысь демонлӧн «лысьӧмыс» циркулярнӧй пила дискысь, мотоцикл бензобакысь, а бӧжыс – важ пила чептысь.
Вӧчалӧма Николай Иванович и пушка, пулемёт, пищаль. Юалі, мися, код вылӧ ӧружиенас мӧдӧдчан?
–Кӧрт чачасьыд ӧд лыйлыны он вермы, – вочавидзис Николай Иванович.
Мастерлӧн киын ставыс лоӧ аслыспӧлӧс. Шуам, ывла вылын кӧрт пач, кодӧс ломтылӧны гожӧмнас, мамонтӧ пӧрӧма.
–Николай Иванович, мый ради вӧчаланныд кӧртысь мыгӧръяссӧ? Гашкӧ, тайӧ тіян восьса енэж улын аслыспӧлӧс музей да? – юалі сылысь.
–Некутшӧм мог менам абу. Мыйкӧ юрӧ воас да, вӧча. Да и мастерӧдзыс ылын на, унатор на ог сяммы, – вочавидзис мужичӧй.
Сиктсаыд ачыс велалӧ
Ас йывсьыс Николай Иванович висьталіс коса да дженьыда. Чужлі пӧ Аныбын. Бать-мамыслӧн быдмӧмаӧсь кӧкъямыс чоя-вока. Николай медся ичӧт пи. Школа бӧрас водзӧ абу велӧдчывлӧма. Мыйла пӧ меным сійӧ, сиктын олысьтӧ олӧмыс ачыс велӧдӧ быд уджӧ.
Карантинӧдз вахтаӧн уджалӧма Сыктывкарын. Сиктса мужичӧйяскӧд ветлӧдлӧма стрӧитчыны, плӧтничайтӧма. Ӧні пӧ гортын пес тэча. Елена гӧтырыс ас кодьыс жӧ киподтуя ань, зільӧ школаын пусьысьӧн. Ӧтка нылыслы 19 арӧс, велӧдчӧ Сыктывкарса госуниверситетын.
–Кодлы карын керкасӧ лэптанныд, кӧзяеваыс корӧны жӧ, мед налы мыйкӧ кӧртысь вӧчан? – юалі Николай Ивановичлысь.
–Ме ӧд некодлы ог ошйысь та йылысь. Дерт, корасны кӧ асьныс да лоӧ мыйысь вӧчнысӧ, мастерита…
Екатерина МАКАРОВА.
Кулӧмдін р.
Снимокыс Артур ГАРНОВЛӦН.