Социальнöй туялöмъяс нуöдан институтын (ЭИСИ) «гöгрöс пызан» сайын чукöртчылiгöн
экспертъяс пасйисны, мый Россияса Оланподулö вежсьöмъяс вöсна гöлöсуйтны позяс, тöдöмысь, гожöмнас.
–Окота эскыны, мый сэк кежлö эпидемияыс дугдас паськавны, – висьталiс странаса минздравысь главнöй внештатнöй эпидемиолог Николай Брико. – Но гöлöсуйтiгас йöзыслы век жö ковмас видзчысьны öта-мöд дорö матö сибöдчöмысь.
ЭИСИ-ысь департаментöн веськöдлысь Екатерина Соколовалöн кывъяс серти, май помöдзыс кö коронавируса вуджан висьöмыс ланьтыштас, гожöм шöрöдзыс лоас на кадыс бура дасьтысьны гöлöсуйтiгкежлас.
Казьтыштам, таво март 11 лунö РФ-са Госдума бöръяысь донъялiгас примитiс Россияса Оланподулö вежсьöмъяс пыртöм йылысь президентлысь оланпас баласö. Тайö жö лунас Федерация Сöвет ошкис сiйöс, а сэсся вылö донъялiсны странаса став регионас законодательнöй собраниеяс.
Март 14 лунö Федерация Сöвет вöчис та кузя кывкöртöд да мöдöдiс ассьыс помшуöмсö президентлы. Оланподулö вöзйöм вежсьöмъяссö лоö вынсьöдöма, найöс кö ошкасны Россияын олысьяс. Гöлöсуйтнысö урчитöма вöлi апрель 22 лунö, но коронавирус паськалöм понда шуöма таöн нöрöвитлыны.