Коми войтырлöн XII съезд дырйи пансьылiс республикаын экономика да социальнöй юкöн сöвмöдöм йылысь сёрни. Миян медматысса рöдвуж, перымса комияс, окотапырысь кывзiсны делегатъяслысь висьтасьöмсö, зiлисны босьтны бурсö, юксьыны асланыс шедöдöмторъясöн.
А съезд бöрас нин Перым-Коми кытшлöн талунъя лун йылысь висьтасис сэтчöс юралысь, Перым крайса министр Виктор Васильевич Рычков.
—Гöгöрвоана, мый Перым край котыртöмсянь Перым-Коми кытш öдвакö öти здукöн воöдчис Перым обласьтлöн тшупöдöдз. Виктор Васильевич, такöд йитöдын кутшöм могъяс сулалöны тiян министерство водзын?
—Округ сöвмöдан туй вылын медыджыд мытшöдъясысь пасъя, мый кытшын абу кöрт туй ни самолёт оз лэбав; йöзыс этша да вочасöн пыр на чинö, а ичöт сикт-посёлокыс, мöдарö, уна; ыджыд бизнесыс миян абу, и уджаланiныс оз тырмы. Пасъя тшöтш, мый войвыв районъясын экономика ёнджыкасö мыджсьö вöр заптöм, лунвывсаын — видз-му овмöс вылö.
2012-öдсянь 2016 воöдз зiлим Перым крайын тайö вояс кежлас урчитöм экономика да социальнöй юкöн сöвмöдан программа серти, кöнi вöлi Перым-Коми кытш йылысь торъя юкöн. 2014-2017 воясö крайын бюджетсö дасьтылiсны программаяс вылö подуласьöмöн, и округын уджалiм «Регионын политика да территорияяс сöвмöдöм» öткымын мукöд программа серти. öнi кытш сöвмöдан медшöр туйвизьяссö индöма Перым край территориальнöя планируйтан схемаын, 2026 воöдз урчитöмöн крайын социальнöй юкöн да экономика сöвмöдан нырвизьясын, Россияса да Перым крайса госпрограммаясын да проектъясын.
Татшöм уджтасъяссö дасьтöма и быд муниципалитетын. Районъяс сöвмöдöм могысь жö пыртам инвестиция стандартъяс, збыльмöдам Перым-Коми кытшлысь инвестиция план.
—Сiдзкö, кытшö сьöмыс воö?
—2019 воö пырöдчим 9 федеральнöй, Перым крайса 13 уджтасö. И тайö программаяссö олöмö пöртны федеральнöй, крайса да меставывса бюджетъясын вöлi артыштöма 5 миллиардысь унджык шайт.
Бöръя дас вонас вель уна сьöм вöлi торйöдöма дзоньтавны Нытвасянь Кудымкарöдз федеральнöй туй (сiйö йитö кытшлысь юркарсö Перым каркöд), а сiдзжö Кудымкарсянь Гайныöдз да Пожваöдз регионса туйяс. Сöмын кольöм во та вылö ви-дзöма 1.157,5 миллион шайт.
Гайны пыр Кудымкарсянь Сыктывкарöдз туйсö вермасны вуджöдны федеральнöй эмбурö. Сэки Перым-Коми кытшсянь Коми Республикаöдз кокньыдджыка позяс воöдчыны да, на костын йитöдыс лоас крепыдджык.
2012 воö вöлi нюжöдöма Очёр — Кудымкар — Купрос биару труба. Округ газифицируйтны заводитöмсянь кельыдлöз ломтас воис нин уна патераа керкаясса 4.798 оланiнö да 1.746 асшöр керкаö. Матысса кадö лоö эштöдöма Белоево — Юрла газопровод. Кытшсаöс биаруöн могмöдны сьöмсö вичмöдöны Газпром, крайса да меставывса бюджетъяс, вештысьöны таысь и организацияяс да йöзыс.
Связь да телевидение йылысь кö сёрнитны, 10 социальнöй учреждениеын öтуввезйöн вöдитчöны оптика каналтi, 78-ын — Wi-Fi йитöдöн. Бюджет юкöнса учреждениеяслöн 47 стрöйбаын интернетö позьö пырны зэв öдйö. Ставсö тайöс вöчöма 2019 воын. Кытшын 97 прöчент олысьыс видзöдö цифраа 20 телеканал.
Бöръя вит вонас кыпöдöма 63 социальнöй стрöйба, на пиысь 18-сö — 2019 воын. Вит воöн пыртöма 178 сюрс квадратнöй метр оланiн. Государственнöй да муниципальнöй программаяс серти бюджетысь вичмöдöм сьöм отсöгöн 2.469 семья бурмöдiс оланiнсö.
Мöйму Кос районса Усть-Коса сиктысь 51 семья (138 морт) вуджис выль оланiнö. Таво районъясын водзö нуöдасны удж, медым ылi ичöт грездъясын олысьяс овмöдчасны гырысьджык сиктъясö.
—А мый вöчсьö экономикаын? Эм-ö йöзыслöн удж?
—Йöзыслы бурджык олöм лöсьöдöмыс, налöн асшöр уджö босьтчöмыс, инвестиция корсьöмыс бур боксянь тöдчöны кытшын экономика сöвмöдöм вылö.
Округын зiльö 32 гырысь да шöркодь, 427 ичöт организация, а сiдзжö 2.056 асшöр уджалысь, 128 фермер овмöс. Кольöм во гырысь да шöркодь предприятиеясын уджсö вöчöма 12 миллиард шайт дон — 2018 воын серти 11 прöчентöн унджык. Видз-му да вöр заптан, вöралан, чери кыян да рöдмöдан овмöсъясын вузöссö вöчöма 1,1 миллиард шайт дон — 13 прöчентöн унджык.
—Виктор Васильевич, тiян видзöдлас серти, мый öткодьыс Коми Республикаса да Перым-Коми кытшса овмöсъясын?
—Перым-Коми кытш да Коми Республика озырöсь вöрöн. Крайын став вöрсьыс нёльöд пайсö буретш округын заптöны. Вонас миян кытшысь позьö пöрöдны 5 миллионысь унджык кубометр, мöйму пöрöдöма 2.169 сюрс кубометр.
Пöртам олöмö «Экология» нацпроект, сы серти выльысь колö садитны 82,9 прöчент керассö. Кольöм во тайöс вöчим 2,5 сюрс гектар вылын, питомникъясын 1 гектар вылын кöдзим кöйдыс. 477 гектар вöрса быдмöгъяс бöрся видзöдам, содтöд садитiм пуяссö 10 гектар вылын. Мусö пуяс садитöм улö дасьтöма 80 гектар, 492 гектар гежöдöма вöрсö, кералöма понöльяссö. Чукöртöма вöрса быдтасъяслысь 150 килограмм кöйдыс, быдтöма рöсадаöн 197 сюрс том пу.
Ичöт бизнесын зiльысьяс норасьлiсны, мый налы оз вичмы вöрыс. 2016 восянь крайысь вöр-ва видзан министерство округö волöмöн нуöдö вöр угоддьöяс юклöм кузя аукционъяс. Кольöм во асшöр уджалысьяслы вöлi торйöдöма 520 сюрс кубометр вöр — 2016 воын серти 7,5 пöв унджык.
Бöръя воясö кытшын содö вöр, торъя нин лыскасö, обработайтöм вылö веськöдöм инвестицияыс. Россияса да суйöрсайса инвесторъясöн восьтöма 7 предприятие, заводитiс уджавны ломтысян пеллет вöчан цех. «Соликамскбумпром» котыртiс «Кудымкар» транспорт предприятие, мед петкöдны округысь вöрсö.
Ставнас жö куим воöн кытшын экономика сöвмöдöм могысь инвестицияыс артавсис 540 миллион шайт. Тайö сетiс позянлун лöсьöдны 355 выль уджаланiн.
Инвесторъясöс ышöдöм могысь дасьтöма да öтуввезйын Перым-Коми кытшлöн могъяс кузя министерстволöн сайтын йöзöдöма «инвестицияа площадкаяслысь» реестр. Ме, кыдзи кытшса юралысь, Перым крайса министр, аддзысьла накöд, кодi вермас лоны инвесторнас.
—А кыдзи видз-му овмöсын? Мый вежсис бöръя дас вит вонас? Мый шедöдöма?
—Агробизнесса предприятиеяс кызвыннас уджалöны лунвыв районъясын да экономика сöвмöдöмö ыджыд пай жö пуктöны. Перым крайса видз-му овмöс прöдукцияысь 8 прöчентсö вöчöма Перым-Коми кытшын.
2019 воын зернöвöйяссö да зернобобöвöйяссö босьтiм 20,4 сюрс тонна. Шöркодь урожайыс быд гектар вылысь 17,6 центнер, воддза восьыс 1 прöчентöн унджык.
Видз-му овмöсын медыджыд юкöнсö босьтö йöв лысьтöм. 2010 во заводитчигöн видз-му ов-мöсъясын артавсис 12,2 сюрс гырысь скöт, на лыдын 5,8 сюрс мöс. 2018 воын серти гырысь скöт юр лыдыс содiс 2,5 прöчент, мöс лыдыс жö чинiс 1,3 прöчент.
2019 воын кытшын йöвсö лысьтöма 2018 воын серти 8 прöчентöн унджык, быд мöслысь 5.719 килограмм.
Унджык лои позянлун лысьтыны сы вöсна, мый овмöсъясын выльмöдам техника, оборудование.
Бöръя воясö кытшса кык организацияын кыпöдöмаöсь нянь тусь косьтан вынйöра комплексъяс, суткинас сэнi позьö косьтыны 250 тоннаöдз. öнi найö уджалöны биару вылын.
Стрöитöма 100 юр вылö артыштöм ферма, выльмöдöма да уджöдам нин 200 кук видзöм вылö карта. Сöмын бöръя куим вонас кытшса овмöсъяслы бюджетысь отсöгсö сетöма 336 миллион шайт.
Вöр да видз-му овмöъясöн вöчöм прöдукция переработайтöм кындзи кытшын сöвмöны мупытшса озырлун, тшöтш и мусир, перъян промышленносьт, вöралöм, чери кыян да рöдмöдан, социальнöя да бытöвöя могмöдан юкöнъяс.
—Аттьö сёрнисьыд, Виктор Васильевич.
Дасьтiс Павел Симпелев.