Сыктывкарса вöр институтöн веськöдлысь, Коми Республикаса Общественнöй палатаö пырысь Любовь Гурьевалöн кывъяс серти, öнiя олöмыс корö, медым государство быд ногыс отсалiс ас кöсйöм сертиныс зiльысьяслы, волонтёръяслы. И тайöс пö пасйöма странаса Оланподулö пыртöм могысь вöзйöм вежсьöмъяслöн балаö.
—1993 вося Конституция вынсьöдöмсянь вель уна кад колис. Вежсис страна, вежсисны йöзыс. И вежсисны зэв ёна, — пасйис Любовь Гурьева. — Бöръя воясö зiля кутiсны уджавны волонтёр котыръяс. Найö пуктöны и государстволысь могъяс збыльмöдöмö пай. Та вöсна и отсöгыс налы колана. Дерт, ми ставöн кöсъям, мед вöлi кыпöдöма семьялысь тöдчанлунсö, тöждысьöма уджалысь морт вöсна, дорйöма страналысь öтувъялунсö. Кöсъям, медым государствоным сöвмис да ёнмис. Но Россияса шöр оланпасын колö пасйыны и доброволечьяслöн котыръяслы отсалöм йылысь.
Комиын, кыдз висьталö Любовь Гурьева, волонтёръяслöн öтмунöмыс паськалö. И Конституцияö пыртöм могысь вöзйöм вежсьöмъясыс бур боксянь тöдчасны власьт да йöзкотыр, тшöтш и волонтёръяс костын топыдджык йитöд лöсьöдöм вылö.
Гортöдзыд ваясны
Миян республикаын «Россияса пошталöн» удж йылысь юалöмъясöн позьö шыöдчыны 8-800-201-60-11 телефон пыр.
Та йылысь юöртö Комиын федеральнöй пошта службалöн управление да содтö, мый апрельын став пенсия-пособиесö поштальонъяс урчитöм лунö ваясны йöзыслы гортас.
Абу быть ветлыны поштаöдз и письмö-посылкала. Найöс тшöтш ваяс поштальон либö курьер. Мынтыны таысь ковмас 100 шайт. Поштаöдз ветлöмöн ковмас босьтны сöмын 31 килограммысь сьöкыдджык да донсö вештана посылкаяс.
Комиын олысьяс вермасны мынтысьны поштальонъяс пыр и коммунальнöй услугаясысь. Та могысь колö, мед поштаса уджалысьлöн сьöрсьыс вöлi кассаа терминал. Эм кö татшöмыс, позьö вештысьны и телефон йитöдöн могмöдöмысь, и газет-журнал судзöдöмысь. Тадзи мынтысьöмыс нинöмöн оз торъяв поштаын вештысьöмысь: сьöмсö вуджöдасны пыр жö да сетасны кассаысь чек.
8-800-201-60-11 телефон пыр позьö корны и пошта юкöнын иналан вузöс. Сiйöс гортöдзыд жö ваясны. Тайö торйöн нин кивыв олöма да вермытöм йöзлы, ылi сикт-грездын олысьяслы, а сiдзжö налы, кодъяс кутшöмкö помка вöсна оз вермыны петавны гортсьыс. Поштаын зiльысьяслöн туялöм серти, республикаын олысьяс медся тшöкыда корöны вайны письмö, газет-журнал, пенсия-пособие да быд лун колана сёян-юан: тшай, кофе, печенньö, шыдöс-макарон, консерв.
* * *
Коми Республикаса 8 почтамтын, 361 пошта юкöнын (на пиысь 262-ыс сиктъясын) öнi уджалö куим сюрс гöгöр морт.
Зэв тöдчана отсавны олöма йöзлы
Чилимдiн районын збыльмöдöны «ЛУКОЙЛ»-лöн волонтёръяс» проект, кодöс öтув дасьтiсны «ЛУКОЙЛ-Коми» компанияын дарайадминистрацияын зiльысьяс.
Ас кöсйöм сертиныс такöд йитöдын уджö босьтчысьяс разöдöны быд лун колана сёян-юан Айму вöсна Ыджыд тышса ветеранъяслы да вермытöмъяслы, кодъяслы и сiдз нин сьöкыд ветлыны лавкаö, а öнi, кор сэн и тан паськалö коронавирус, олöма войтырлы торйöн нин ёна колö видзчысьны сыысь.
Мусир перъян предприятиелöн сьöм вылö ньöбöма 120 морт вылö артыштöмöн сёян-юан, сы лыдын консерв, шыдöс, тшай, печенньö, макарон да быд лун колана мукöд вöлöга. Районса ветеранъяслöн сöветкöд да вермытöмъяслöн котыркöд öтвылысь вöлi тöдмалöма, кодъяслы медся ёна колö татшöм отсöгыс. Кыдз тыдовтчöма, кызвыннас ыджыд арлыдаяслы. Врачьяслöн видзöдлас серти, медводз налы кокньыда вермас кöвъясьны да чорыда мöрччыны коронавирусыс.
Апрель 6 лунö «ЛУКОЙЛ-Коми» компанияысь йöзкöд йитöд кутан шöринысь специалист Надежда Воробьёва сиктса администрацияысь да ветеранъяслöн сöветысь волонтёръяскöд öтлаын разöдiсны Чилимдiн сиктын да матiгöгöр грездъясын олысь ыджыд арлыда да вермытöм йöзлы сёян-юансö. Та дырйи накöд син на син эз аддзысьлыны, пакетъяссö ставныслы колисны керка-патераö пыран öдзöс дораныс, а сэсся ылыстчöм бöрын нин телефон пыр быдöнлы юöртiсны, мед петаласны да босьтасны.
Матысса лунъясö «ЛУКОЙЛ-Коми» ООО-сянь сёян-юансö разö-дасны районса став мукöд, тшöтш и медся ылыс сикт-грездас.
—Ми, дерт, ог вермöй лоны веськодьöн сы дорö, мый вöчсьö талун коронавирус пондаыс мир пасьталаын. И зэв тöдчана, медым тайö сьöкыд кадас дзоньвидзаöсь вöлiны миян ветеранъяс, кодъяс уна во сайын асьнысö жалиттöг дорйисны вöрöгысь миянлысь странанымöс. И сiйö отсöгыс, мый ми вичмöдам налы талун, зэв на этша, артыштны кö, мыйта колö миянлы вöчны налысь олöмсö кокньöдöм-бурмöдöм могысь, — висьталiс «ЛУКОЙЛ»-лöн волонтёръяс» проектöн веськöдлысь, «ЛУКОЙЛ-Коми» ООО-са генеральнöй директорöс йöзкöд йитöд кутöм кузя вежысь Евгения Лясковская.