Томлун вылас видзӧдтӧг Генрих Немчинов нималӧ Изьва районын олысьяс, торйӧн нин томулов пӧвстын. Нималӧ быдлунъя олӧмысь прӧстӧй, серам петкӧдлана видеосюжетъяснас. Но прӧстӧйӧсь найӧ сӧмын медводдза видзӧдлас серти. Збыльвылассӧ наын воссьӧны войвыв ылі пельӧсын олӧмлӧн сюрӧсыс, нэмӧвӧйся традицияясыс да уна нэмӧн лӧсьӧдӧм оласногыс.
Быдтор тӧдны окотитысь блогер пыр корсьӧ каналса гижӧдчысьясӧс творчествонас тӧдмӧдан выль туйвизьяс. И артмӧ сылӧн тайӧ кокниа, та понда и сюжетъясыс торъялӧны мукӧдсьыс, оз дышӧдны-дӧнзьӧдны.
Генрихкӧд миян пырмунігмоз дженьыдик сёрниным – ас йывсьыс, сылысь сьӧлӧмсӧ бурмӧданатор да водзӧ вылӧ мӧвпъяс йылысь.
–Генрих, вай медводз неуна ас йывсьыд висьтышт: кӧні чужин, коді бать-мамыд, мыйӧн бурмӧдін сьӧлӧмтӧ школаад велӧдчигӧн?
–Чужи ме Кыдзкарын. Мам уджалӧ сиктса администрацияын специалистӧн, батьӧй шопералӧ пӧжарысь видзчысян службаын. Ме зэв ёна радейта найӧс да помтӧг аттьӧала быдторйын отсалӧм-ышӧдӧмысь. Та серти меным збыльысь ёна мойвиис.
Ичӧтдырсянь пырӧдчи физкультураӧ да спортӧ.
Сюрса лыӧй кусыня вӧлі да, первойсяньыс юр выв тырӧн спортӧ сетчынысӧ эз артмы, ковмис корсьны вир-яйӧс та кежлӧ дасьтан лӧсялана туй.
Бӧрйи турник, сэні позьӧ уна чӧнӧр песны да. И ӧд вені ставсӧ, ёнми-вынсялі.
Ӧні каникул дырйи песа вын-эбӧсӧс чужан сиктын лӧсьӧдӧм выль спортплощадкаын.
Республикаса юралысь бердын искусствояс гимназияын велӧдчигӧн нин коркӧ паркысь аддзылі, кыдзи карса зонъяс пырӧдчӧны воркаутӧ. Сэки дзоньвидзалунӧй бурджык нин вӧлі да, видзӧді налысь тренировкасӧ, сэсся ӧтуввезйысь корсьыси да босьтчи сыӧ Кыдзкарын. Дерт, медводз ковмис корсьны чеччавны да патурликасьны лӧсяланаин.
Нӧшта радейта чери кыйны. Овлӧ, гожӧмнас лунтыр колляла Печора ю дорын. Медсясӧ кыснанася, торйӧн нин сир шедігӧн.
–Кутшӧм юкӧнын велӧдчан искусствояс гимназияын?
–Медводз босьті тӧдӧмлун художествоа юкӧнын, сэсся вуджӧдчи гуманитарнӧйӧ.
–А мыйсянь чужис видео снимайтны да блог нуӧдны кӧсйӧмыд?
–Ставыс пансис 2016 воын. Бать-мамӧй козьналісны чужан лун кежлӧ экшн камера.
Ме дзик пыр лӧсьӧді ассьым канал да куті снимайтны видеороликъяс. Медводз уна мукӧд моз пырӧдчи сэки нималана «Water Bottle Flip Challenge» темаӧ, та бӧрын босьтчи гижны-петкӧдлыны ассьым олӧмӧс: кыдзи вена мытшӧд-падмӧгъяс да с.в.
Сэсся шуи снимайтны миян культуралы да историялы сиӧм серпасъяс.
Талун ӧтуввез пыр позьӧ кокниджыка да ӧдйӧджык тӧдмӧдны тшӧтшъяясӧс изьватас комикӧд, Коми муӧн, традицияясӧн, Войвылын олӧмӧн. Висьтавны, кӧні да кыдзи ми олам, кутшӧм кывйӧн сёрнитам. Петкӧдлыны миян вӧр-валысь вогӧгӧрся мичлунсӧ, поводдя вежласьӧмсӧ, гажа праздникъяссӧ. Ӧти кывйӧн, петкӧдлыны комилысь, торйӧн кӧ, изьватаслысь, аслыспӧлӧслунсӧ торъя йӧз пыр.
Медся тӧдчанаыс – абу кӧвъявны тайӧс мырдӧн, а кокньыдика ыззьӧдны, крукыштны мыйӧнкӧ, медым мортыслы аслыс окота вӧлі видзӧдны-тӧдмавны ставсӧ водзӧ.
–Мый медся ёна тшупис вежӧрад уна сикас сюжет снимайтігад?
–Ӧнӧдз казьтывла Изьваын «Встречаем Рождество» сьыланкыв дорӧ клип снимайтӧм.
Ывлаын кӧдзыдіник. Сьылысьяс мед оз кынмыны, новлӧдлісны сикт пасьтала нёль машинаӧн. Снимайтім дас минутӧн, сэсся машинаын шонтысим, юим шоколадӧн пӧсь чай – и бара уджӧ.
Ок, гажа вӧлі! Ёна сералім, шмонитім. Клип снимайтанногсӧ ӧтарӧ вежлалім, мыйсюрӧ содтім, кыткӧ чинтыштім. Луныс ӧти здукӧн лэбыштіс.
А медся ёна тайӧ ставыс кажитчис сьылысь-снимайтчысьяслы, торйӧн нин вӧла доддьӧн ветлӧмыс.
Ассьым медся бур уджӧс индыны ог вермы, ме чайта, быд видео ас местаас колана. Ӧд на серти тӧдчӧ, кыдзи вежсьӧ-сӧвмӧ сямӧй, ролик бӧрся ролик содӧ кужанлунӧй кыдз операторлӧн, сідз и режиссёрлӧн.
А водзвыв висьтавны, кутшӧм ролик воас видзӧдысьяслы сьӧлӧм выланыс, зэв сьӧкыд. Шуам, менам каналын медся видзӧдана роликын весь пукала да висьтала-кӧсйыся камераӧ котравны 71 лун. Сэн весиг монтажыс прамӧя абу, 5 минутӧн ставсӧ вӧчи, но буретш тайӧ роликыс кажитчӧма ёртъяслы. Со пӧ сэсся и тӧд!
–Кодкӧд медся кокньыд дасьтыны сюжеттӧ?
–Ме радейта сёрнитны олӧмаджыкъяскӧд да зонпосникӧд. Воддзаясыс унатор аддзылісны-тӧдлісны олӧмсьыс, а мӧдъясыс сӧмын на дасьтысьӧны сы кежлӧ. Арлыдаджыкъяслысь ме велӧдча овны, а ичӧтъясыс зэв на восьсаӧсь, нинӧм дзебны оз кужны.
–Генрих, аттьӧ тэныд сёрнисьыд да, дерт, водзӧ вылӧ вермӧмъяс!
Игорь Колесов.
Снимокъясыс Генрих Немчиновлӧн гортса архивысь.