Нёль во сайын Удораса Йӧртымдінын шуӧмаӧсь котыртлыны ас сиктсалы тӧвся гажа праздник.
Йӧртымдін бокын кытшӧн сулалӧны неыджыд грездъяс: Сёрдла, Кӧрттувъя, Йӧвнӧрыс, Лязюв. Казьтыштӧмаӧсь Евгений Афанасьевлысь «Кытшъяс» небӧг да тадз жӧ и гажсӧ нимтӧмаӧсь. Сэки нин лямпа вылӧ сувтлӧма комын гӧгӧр морт, сідзкӧ, йӧзыслы колӧма татшӧм праздникыс.
А сэсся «Кытшъяс» йылысь юӧрыс кытшъясӧн разалӧма республика пасьтала, и ӧні февраль помын Йӧртымдін вочаалӧ оз сӧмын Мозын да Ву юяс бокын чужлӧм, но и мукӧд районысь войтырӧс.
Дерт, гажыс медвойдӧр чукӧртӧ лызьӧн-лямпаӧн котравны радейтысьясӧс. Но ордйысьӧм кындзи гӧсьтъясӧс тӧдмӧдӧны и удорасалӧн традицияясӧн.
Кольӧм во петкӧдлӧмаӧсь, кыдзи Сёрдлаын том молодечӧс армияӧ колльӧдӧны. Японияысь том ань волӧма, аддзылӧма тайӧс да чайтӧма, мый зонмыс збыльысь армияӧ мунӧ.
А таво Йӧвнӧрысын кӧлысясян обряд ворсӧмаӧсь. Кӧрттувъяын ыж пась вылын Плеш гӧра вывсянь ислалӧмаӧсь. Йӧртымдінын киподтуя йӧз ассьыныс вӧчӧмторъяссӧ петкӧдлӧмаӧсь да лызь-лямпаӧн Коми Республикаса кубок вӧсна ордйысьӧмаӧсь. Ветымын кык морт котӧртӧма ӧтисянь куим километрӧдз. Но таво поводдяыс шоныд да, ордйысьысьяслы мойвиӧма: тола пиӧд кевны абу ковмӧма, чарӧм вывті тӧвзьӧмаӧсь. Мужичӧйяс пӧвстын вермысьнас лоӧма Йӧртымдінысь Семён Макаров, нывбабаяс пиын – Кӧрткерӧс районса Ыджыдвиддзысь Татьяна Никулина. Мӧд местасӧ шедӧдӧмаӧсь Усогорскысь Даниил Тюрнин да Ыджыдвиддзысь Екатерина Симпелева, коймӧдсӧ – Йӧртымдінысь Владимир Емушев да Усогорскысь Елена Обрезкова.
Благоевысь Виктория Дементьева шуӧ, куӧн эжӧм лызьыс пӧ оз лэдз чой йывсянь бӧрӧн исковтны. Но ӧддзӧдчыны пӧ ёнасӧ эг лысьт, гын сапӧгыс ӧтарӧ-мӧдарӧ вешъялӧ да.
Сергей Шараповлӧн лямпаӧн котралан опытыс ёна унджык. Сійӧ и котралан паськӧмсӧ ачыс лӧсьӧдӧма.
–Ме вӧралысь, и менам 12 лямпа гоз эм, нёльсӧ сьӧрысь вайи «Кытшъяс» вылӧ, – висьталӧ сійӧ. – Киын койбедь. Ӧтар помыс сылӧн лопта, а мед киын эз вильсъяв, кучик гезйӧн на гартлі сійӧс. Кымын кузьджык койбеддьыд – сымын бурджык.
Йӧртымдінӧ лямпаӧн котралан фестиваль вылӧ таво волӧмаӧсь и Египетысь Сыктывкарса университетын велӧдчысь студентъяс. Ӧти на пиысь котӧртӧма да долыдвывсьыс весиг комиӧн кывбур лыддьӧма.
–«Кытшъясын» ордйысьны гӧсьтъяс лун-мӧд кежлӧ волӧны, а Йӧртымдінын гаж кежлас арсяньыс нин босьтчӧны дасьтысьны, – висьталӧ праздниксӧ котыртысь Алина Ванеева. – Ми шуим гажсӧ этнография фестивальӧн, и быд во зілям мыйкӧ выльтор думыштны-петкӧдлыны.
Снимокъясыс ӧтуввезйысь.