Кольӧм вежонӧ Госсӧветын чукӧртчылігӧн республикаса парламентӧн веськӧдлысь Надежда Дорофеева пасйис, мый лун-мӧд сайын Россияса правительство ошкӧма Арктика сӧвмӧдӧм йылысь некымын оланпас балалысь шӧр нырвизьяс.
—Закон балаясын урчитӧма мупытшкӧсса озырлун перъян, кизьӧрмӧдӧм биару вӧчан предприятиеяс стрӧитӧм кузя проектъяс збыльмӧдысьяслы кок-ньӧдъяс, — висьталіс Надежда Дорофеева. — Уджтасъяслӧн медтӧдчана могыс — лӧсьӧдны выль уджаланінъяс, ышӧдны асшӧр компанияясӧс вичмӧдны инвестицияяс.
Комиын инвестиция, промышленносьт да транспорт кузя министр Александр Ремигалӧн кывъяс серти, федеральнӧй тшупӧдын ӧні эштӧдӧны Арктикаын государстволӧн политикалысь подувъяс дасьтан да 2035 воӧдз Арктика сӧвмӧдан нырвизьяс урчитан удж.
—Тайӧ документъясас индӧм могъясын пасйӧма бурмӧдны йӧзлысь олӧмсӧ, ыджыдджык ӧдӧн сӧвмӧдны экономика, видзны вӧр-ва, лӧсьӧдны инфраструктура. Та вылӧ федеральнӧй бюджетысь кутасны вичмӧдны уна сьӧм, — висьталіс Александр Ремига. — Комиысь ӧні сӧмын Воркута лыддьыссьӧ Арктикаса карӧн, но ми зілям, мед Вой саридздорса муясӧн шуисны тшӧтш Инта да Усинск каръяс, Чилимдін район. Та серти кывкӧртӧдсӧ Россияса правительствоын вӧчасны 2020 вося медводдза кварталын.
Комиын кӧсйӧны збыльмӧдны Арктика сӧвмӧдӧмкӧд йитчӧм некымын уджтас. На лыдын — Чилимдін районын титан да кварц перйӧм кузя проект. Выль технология серти руда переработайтан комплекс кыпӧдӧм йылысь сёрнитчӧм неважӧн кырымалісны Коми Республикаса юралысь Сергей Гапликов да «Русские титановые ресурсы» компанияяслӧн котырысь президент Анатолий Ткачук.
Инта да Воркута каръяс сӧвмӧдан туйвизьяс йылысь сёрни кыпӧдісны Госсӧветӧн веськӧдлысьӧс вежысь Валентина Жиделева да депутатъяс Геннадий Горбачёв, Леонид Вокуев.
Александр Ремигалӧн кывъяс серти, Инта районын мусир да биару перйыны кӧсйӧ «Тимано-Печорская нефтегазовая компания», а Воркутаын «Северсталь» дасьтысьӧ перйыны из шом выль куйлӧдысь.
Медым видзтыны войвывса каръяслӧн бюджетъясысь сьӧм, депутат Василий Смалий вӧзйис пенсия босьтан арлыда войтырӧс овмӧдны лунвыв регионъясӧ, а верстьӧӧс могмӧдны уджӧн да вичмӧдны кокньӧдъяс. Мӧд депутат, Владимир Жариков, содтіс, специалистъясӧс пӧ колӧ ышӧдны локны Ылі Войвылӧ вотъяс вештігӧн личӧдъясӧн, шойччанінӧ ветлігӧн туйсьыс мынтысьӧмӧн, а сідзжӧ пенсия вылӧ петан арлыд чинтӧмӧн.
—Нимкодь, мый парламент да власьтлӧн исполнительнӧй тэчас тӧждысьӧны Арктика сӧвмӧдӧм вӧсна, — пасйис Надежда Дорофеева. — Миянлы оз на ӧтчыдысь ковмыв чукӧртчывны да видлавны депутатъяслысь вӧзйӧмъяс, ӧд миянлы абу веськодь, кыдзи кутасны сӧвмыны Вой саридздорса муяс.