Важ Выль во да Василей лунӧ, январь 14 лунӧ, Кӧрткерӧс районысь Одыбса Райын восьтісны Василий Великий нима вичко. Сійӧс вежӧдіс да вичко служба нуӧдіс Сыктывкарса да Коми-Зырянскӧй архиепископ Питирим.
Выль храмын ыджыд гаж вылӧ волісны эз сӧмын одыбсаяс да орчча сикт-грездын олысьяс, но и весиг Кӧрткерӧсысь да юркарысь гӧсьтъяс. Литургия пансьытӧдз Енлы эскысьяс архиепископлӧн юрнуӧдӧм улын кытшовтісны крестӧн вичко гӧгӧр. Крестӧн ветлӧм помын звӧнничаын «шыасис» жыннян, а енэжын мыччысис тӧвся югыд шонді, коді босьтчис ворсӧдчыны югӧр-дзирдъясӧн вичко юрйывъясын.
Кыпыд служба бӧрын Сыктывкарса да Коми-Зырянскӧй архиепископ Питирим чолӧмаліс чукӧртчысьясӧс вичко восьтӧмӧн, праздникӧн да аттьӧаліс стрӧитчысьясӧс да медшӧр меценатӧс – Василий Михайловӧс. Василий Александрович воча кывйын аттьӧаліс владыкаӧс бласлӧвитӧмысь.
–Менӧ Енмыс чуйдіс кыпӧдны вичкосӧ чужан сиктын. И стрӧитім ми сійӧс став мирӧн ӧтув, – висьталіс Одыбын чужлӧм, ӧні Ригаын ас вылӧ уджалысь Василий Михайлов. – Ме уна во нин ола Латвияын, но вонас некымынысь волывла чужан сиктӧ. Кӧрткерӧс районын олӧны менам кызь квайт воча чой-вок да уна мукӧд рӧдвуж. Найӧ и отсалісны кыпӧдны храмсӧ.
Армия бӧрын бергӧдчи Одыбӧ. А 1977 вося августын муні велӧдчыны Ригаса лётнӧй училищеӧ. Куим во мысти помалі сійӧс гӧрд дипломӧн, гӧтраси да кольччи велӧдны гражданскӧй авиация институтын. Сэсся кутчыси бизнесӧ, 1992 воын лӧсьӧді Ригаын кабель йитӧдӧн могмӧдан тэчас. Талун миян телекоммуникационнӧй «Livas» компанияным Латвияын кабель йитӧдӧн могмӧдан медся тӧдчана операторъяс лыдын.
Европаын меным синмӧ шыбитчис, мый весиг ичӧтик сикт-посёлокын эмӧсь вичкояс.
Со и шуи аслым, мый чужан Одыб сиктын тшӧтш быть колӧ мича храм, – пасйис Василий Александрович.
Подувсӧ сылы пуктісны 2014 воын. Мича вичко бердын стрӧитісны джуджыд часовня, вежа айлы 2 судтаа керка, кӧні меститчасны и вӧскреснӧй школа да нуръясянін-трапезнӧй. Василий Михайловлӧн висьталӧм серти, стрӧитчӧм вылӧ лои ви-дзӧма 160 миллионысь унджык шайт.
Вичко вежӧдан гаж вылӧ локтысь-ясӧс тӧдчана лоӧмторнас чолӧмалісны тшӧтш Кӧрткерӧс районса администрацияӧн веськӧдлысьлысь удж вӧчысь Константин Сажин да Коми Республикаын мусульманалӧн духовнӧй управлениеӧн юрнуӧдысь, муфтий Валиахмад хазрат Гаязов.
Эдуард Пименов.
Снимокъясыс авторлӧн да Сыктывкарса епархиялӧн.