Кольӧм вежонӧ кывйӧн вӧдитчан выль технологияяслӧн шӧринын зільысьяс чукӧртлісны кыв туялысьясӧс, журналистъясӧс да тӧдмӧдісны 2019 воӧ вӧчӧм уджыслӧн кывкӧртӧдъясӧн. А уджыс налӧн и збыльысь колана, ӧд ӧтуввезйын шӧриныслысь fu-lab.ru лист боксӧ кольӧм во восьтылӧма миллионӧн-джынйӧнысь унджык морт — Россияын и суйӧр сайын олысьяс.
Шӧриннас веськӧдлысь Марина Фединалӧн кывъяс серти, мойму найӧ водзӧ нуӧдӧмаӧсь коми кывлысь сідз шусяна корпус сӧвмӧдан-паськӧдан удж. Ӧні сэні чукӧрмӧма нин уна сикас гижӧдын паныдасьлысь квайтымын миллион сайӧ кыв. Кольӧм восянь корпуссьыс позьӧ корсьны оз сӧмын ӧти, а некымын кывъя тэчас. Тайӧ пӧ велӧдысьяслы кивыв, ӧд налы кокньыдджык вайӧдны челядьлы гижӧдъясысь примеръяс.
Корсигӧн мыччысьӧ вель уна пример, и позьӧ чинтыны налысь лыдсӧ. Сідз, Бияр йылысь гижсьӧ Геннадий Юшковлӧн «Бива» романын. Кӧсъян кӧ видзӧдлыны, нӧшта кодъяслӧн гижӧдъ-ясын паныдасьлӧ Биярыс, колӧ сӧмын пасйыны — Юшковысь пӧ ӧтдор. И лыдыс пыр жӧ некымын пӧв чинас.
Кольӧм во фу-лаблӧн небӧгаинӧ содтӧмаӧсь кык сюрсысь унджык гижӧд да вайӧдӧмаӧсь 8.400-ӧдз. Торйӧн кӧ, библиотекаас пыртӧмаӧсь Серафим Поповлысь сюрс сайӧ кывбур.
Василий Власовӧс Комиын ёнджыкасӧ тӧдӧны сьыланкыв гижысьӧн. «Коми кыв сӧвмӧдӧмын выль воськовъяс» аддзысьлӧм дырйи Власовлысь «Тӧдса пилотсӧ» да «Воши гортӧ мунан туйыссӧ» сьылісны республикаса народнӧй артистъяс Василий Рочев да Пётр Шучалин. Василий Иванович Власовлысь тайӧ да мукӧд гижӧд позьӧ жӧ нин лыддьыны «Небӧгаинсьыс».
Шӧринса лӧсьӧдӧмаӧсь ӧтуввез браузерӧ приложение, медым коми сайтъясысь кывъяс роч вылӧ вуджӧдӧмӧн мыччысьлісны. Тайӧ лоӧ ыджыд отсӧгӧн налы, кодъяс оз бура тӧдны коми кывсӧ да гӧгӧрвоны, мый йылысь юӧртсьӧ гижӧдас. Приложениесӧ дон босьттӧг позьӧ меститны компьютер паметьӧ да лыддьыны коми пасйӧдъяс. Личкыштан тӧдтӧм кыв вылӧ, и рочӧн петӧ сылӧн став вежӧртасыс.
Сэсся нин ачыд бӧръян, кутшӧм вежӧртас медъёна лӧсялӧ пасйӧдлӧн сюрӧслы. «Вуджӧдчысьыс» тӧдӧ нин сё сюрс гӧгӧр коми кыв, но шӧринсалӧн зільӧмӧн тӧдӧмлуныс сылӧн вочасӧн содӧ.
—Аттьӧала миян вӧчӧмторъясӧн вӧдитчысьясӧс, кодъяс вӧзйӧны, кыдзи позьӧ бурмӧдыштны коми кывлысь корпуссӧ, кывкудъяссӧ, — висьталіс Марина Федина.
Татшӧм вӧдитчысьяс лыдын и Москваса университетын велӧдысь Анастасия Васильева. Комиыс сылы абу чужан кыв, ас кӧсйӧм сертиыс ачыс велӧдӧма сійӧс. Медся тшӧкыда пӧ восьтла небӧгаин лист боксӧ, метроын удж вылӧ мунігӧн лыддя художествоа литература да вӧр-ва, астрономия йылысь гижӧдъяс.
Кольӧм нэмся кызьӧд-комынӧд воясӧ пӧ та йылысь комиӧн уна гижӧд петавлӧма, и аддзыны найӧс позьӧ фу-лаб библиотекаын.
—Соцсетьясын гижасигӧн вӧдитча коми кывлӧн корпусӧн, — висьталіс Анастасия. — Кодкӧ кӧ кутас элясьны, бара пӧ выль кыв лӧсьӧдӧмаӧсь да немтор эг гӧгӧрво, пыр и корся сійӧс корпуссьыс. Аддза, гижысьяс пӧвстысь кодъяс вӧдитчылӧмаӧсь тайӧ кывнас, да лов вылын личалӧ: пинясьысьяслы няргынысӧ окота да, сійӧн и шуасьӧны, а тайӧ кывйыс, вӧлӧмкӧ, важӧн нин тӧдса коми йӧзыслы.
Шӧриныс уджалӧ сідз шусяна цифрӧвӧй пространствоын, кӧні ёнджыкасӧ том йӧз «ветлӧны-олӧны». Сідзкӧ, татшӧм ногӧн шӧринсаяс сибӧдӧны коми кыв дорӧ томъясӧс. Гашкӧ, тайӧ и эм налӧн уджын медтӧдчанаыс.
Павел Симпелев.
Снимокыс ӧтуввезйысь.