Полина Борисовна Сенькина август 28 лунӧ воис Псков обласьтса Печеры карысь. Коми Республикаысь 16 волонтёр пӧвстын сійӧ кык вежон мавтіс-мичмӧдіс-выльмӧдіс XV-XVІ нэмся памятник-стрӧйбаяс мужичӧйяслӧн Вежа Успенньӧ Псково-Печерскӧй манастырын.
Комиысь воысьяс – культураын уджалысьяс да сыктывкарса искусство колледжын велӧдчысьяс – зіля пырӧдчӧмаӧсь волонтёр шӧринлӧн олӧм-уджӧ. А Кулӧмдін районса культура керкаын да библиотекаын зільысьяс лоӧмаӧсь вермысьясӧн сьылӧм-йӧктӧм кузя став нуӧдӧмторъяс. Россияса дӧрапаслы сиӧм гаж дырйи найӧ петкӧдчӧмаӧсь Печеры карын коми сьыланкывйӧн. Миян студентъяс серпасалӧмаӧсь ӧбразъяс, мичмӧдӧмаӧсь стен, пелькӧдӧмаӧсь манастырлысь усадьбасӧ.
Волонтёръяс дон босьттӧг олӧмаӧсь вӧвлӧм воинскӧй часьтлӧн стрӧйбаын, уджаланінсянь 20-25 минут подӧн мунан ылнаын. 7 час асылын чеччӧм бӧрын песыштлӧмаӧсь вир-сӧн, а сэсся 10 чассянь кыкӧдз – помасьлытӧм удж. Рытъяснас бипур дорын пукалӧмаӧсь-варовитӧмаӧсь-гажӧдчӧмаӧсь; волейболӧн, футболӧн, теннисысь ворсӧмаӧсь-вермасьӧмаӧсь. Куимысь лун волонтёръясӧс зэв пӧтӧса вердӧмаӧсь, ас пӧжалӧм сьӧд няньӧн чӧсмӧдлӧмаӧсь да сёркни ваӧн горшсӧ веськӧдлӧмаӧсь.
Кадыс исковтӧма тӧдлытӧг: гажаа да вежӧрӧ дыр кежлӧ мӧрччана. Помас быд волонтёрлы вичмӧма Россияса культура министерствосянь аттьӧалана гижӧд, ичӧтик мышноп, футболка, гижӧда браслет, «Несвятые святые» небӧг да батюшкояссянь бласлӧвитӧм.
Владимир Шомысов.