Октябрь 23 лунӧ опера да балет театрын вӧлі Россияса заслуженнӧй артистка, Коми Республикаса народнӧй артистка, прима-балерина, Коми муса югыд кодзув Наталья Супрунлӧн бенефис. Енбиа артистка комын во нин дзирдалӧ Сыктывкарса сцена вылын.
Бенефис дырйи искусство радейтысьяс видзӧдісны Яков Перепелицалысь «Яг-Морт» балет, кӧні Наталья Супрун йӧктіс Ёмаӧс.
Райдасянь быдмӧма Ёмаӧдз
Наталья Супрунлӧн творчествоыс зэв озыр. Матӧ нелямын балетын сійӧ йӧктӧма шӧр партияяс. Быд персонаж, кодӧс сійӧ ловзьӧдӧма сцена вылын, аслыспӧлӧс яръюгыд. Лыддьӧдлыштны кӧ, тайӧ Маша «Щелкунчикын», Китри «Дон Кихотын», Никия «Баядеркаын», Одетта «Лебединое озероын», Лиза «Барышня-крестьянкаын», Анна «Дом у дорогиын», Золушка, Жизель, Русалочка татшӧм жӧ нима балетъясын да мукӧд.
Комын во балетын йӧктыны – тайӧ зэв уна, оз быдӧн тадзи вермы. Наталья Супрун шуӧ, овлӧ пӧ, дерт, сьӧкыд, но радейтана удж да видзӧдысь сетӧны сылы вын.
–Мыйла буретш «Яг-Мортӧс» бӧрйинныд бенефис вылӧ?
–Менам творчествоӧй и олӧмӧй йитчӧма Коми мукӧд, та вӧсна и бӧрйи миянлысь национальнӧй спектакльсӧ. Мӧд театрын, мирын татшӧм спектакльыс абу. А видзӧдысьлы сійӧ кажитчӧ, интереснӧ и верстьӧлы, и челядьлы.
Миян опера да балет театрын «Яг-Мортыс» тайӧ витӧд редакция. Нёльӧдас, кодӧс дасьтыліс хореограф-постановщик Борис Мягков, ме йӧктылі Райдаӧс. Сійӧ сэки балетсӧ, кыдз шуласны, ме улӧ и дасьтіс, менам сямлун да позянлун вылӧ мыджсьӧмӧн. Сэки сійӧ, чайта, весиг эз куж мӧвпыштны, мый ме верма Ёмаӧс йӧктыны. Ӧнія витӧдас (хореограф-постановщикыс Александр Рютню) ме Ёма. Тшӧтш хореографыс менӧ тайӧ рольын дзик пыр аддзис. Сы вӧсна мый ме быдми, арлыдлы лӧсялӧджык. И рольыс меным зэв ёна воӧ сьӧлӧм вылӧ. Менам Ёма дзик абу Райда кодь. Райда – мичаник, томиник шань ныв, сӧстӧм персонаж, а Ёма «пемыд» персонаж. Дасьтыны Ёмалысь партиясӧ меным эз вӧв кокньыд: мӧвпалі, кыдзи сцена вылын сылысь пемыд ловсӧ петкӧдлыны, ме ачым абу сэтшӧм наян да. «Яг-Мортын» ме пакӧститча, быдӧнӧс дзерӧда, ӧта-мӧдыскӧд люкӧда, но ог лёкысь, а ворсӧдчӧмӧн-наянитӧмӧн. Ёма менам зэв сюсь да писькӧс.
–Наталья, кызвын шӧр партиясӧ ті йӧктінныд Роман Мироновкӧд (ӧні сійӧ йӧктӧ Воронежса опера да балет театрын). Водзті сёрнитлім да, ӧта-мӧдтӧ зэв пыдди пуктанныд, гӧгӧрвоанныд сцена вылын, быд вӧрасног тӧдса. Воліс эз бенефис вылӧ?
–Сылӧн сэні уджыс уна, дерт, он вермы дзик пыр орӧдчыны. Кодкӧд ме йӧктылі, ставныс зэв енбиаӧсь, ӧдйӧ гӧгӧрвоам ӧта-мӧдӧс, эскам ӧта-мӧдлы. Дерт, Романӧс ме бурӧн казьтыла, сы вӧсна мый ӧтлаын быдмим. Ми рӧдвуж кодьӧсь. Уна во шӧр партияяс ӧтлаын йӧктім да, ӧта-мӧдӧс бура тӧдам. Ӧні Яг-Мортӧс йӧктӧ Айгиз Фазлетдинов. Миян театрӧ «Сыктывкарса тулыс» фестиваль дырйи уна нималана артист волӧ, кодъяскӧд ми ӧдйӧ жӧ пырӧдчам спектакльӧ. Найӧ менӧ шуӧны «удобнӧйӧн», ӧдйӧ ладмӧдчам да. Шуам, Мариинскӧй театрысь премьер Кимин Ким, Л.Якобсон нима театрысь солист Андрей Сорокин, МАМТ-ысь солист Евгений Жуков, Кремлёвскӧй балетысь Михаил Евгенов да уна мукӧд.
–Артистлӧн уджыс уна, театрын репертуарыс озыр. Водзӧ кутшӧм мӧвпъяс?
–Да, та вӧсна ми ӧти спектакль бӧрся дзик пыр мӧдӧ пырӧдчам. Водзӧ ме кута йӧктыны «Жизельын», сы бӧрти мунам гастрольӧн Белоруссияӧ, кӧні петкӧдлам и «Яг-Мортӧс».
Ставыс пансис пелысь мольсянь
Чужӧма Наталья Супрун Харьков обласьтса Чугуев карын. Кор нывкалы вӧлӧма кык арӧс, бать-мамыс вуджӧмаӧсь овны Вуктылӧ. Наташа радейтӧма йӧктыны. Сизим арӧссянь сійӧ вӧзйысьӧма «Рябинка» йӧктан котырӧ. Веськӧдлысьыс ёна ошкӧма Наташаӧс, мамыслы вӧзйӧма водзӧ велӧдны нывсӧ.
Наталья Супрун помалӧма Уфаса хореографическӧй училище. Недыр кад йӧктӧма Башкирияса опера да балет театрын. Видлӧма асьсӧ и Москваса да Санкт-Петербургса сцена вылын. Но век жӧ бӧр локтӧма Комиӧ.
–Бать-мам дорӧ кыскис. Кӧсйи, мед найӧ менӧ видзӧдісны сцена вылысь, а эз сӧмын телевизор пыр, – висьталіс Наталья.
Наталья Супрунлӧн кодзулыс ӧзйис Сыктывкарса сцена вылын. Тані жӧ сылӧн ыпнитӧма и муслуныс. Верӧс-пуыс Натальяӧс аддзӧма буретш сцена вылысь, кор локтӧма видзӧдны «Золушка» мойд. Бӧрыннас сійӧ висьталӧма Натальялы, мый вӧлӧма дась петны сцена вылас да мездыны Золушкаӧс скӧр ичиньсьыс да чойяссьыс. Аслыс сетӧма кыв быть гӧтрасьны «Золушка» вылӧ да пыр видзны сійӧс лёк йӧзысь. Сідзи и лоӧма.
Наталья Супрунлӧн геройяс сьӧлӧмӧ йиджанаӧсь. Сійӧ зэв мастер йӧктӧмӧн петкӧдлыны быдсикас сьӧлӧм-кылӧм. Висьталӧ, мый ассьыс быд роль радейтӧ сьӧлӧмсяньыс. Наталья Супрунлӧн йӧктӧмӧн нимкодясьӧны искусство радейтысьяс. Аслас сямӧн енбиа артист юксьӧ и том войтыркӧд. Сійӧ дас во нин велӧдӧ опера да балет театрбердса челядьлы классическӧй балет студияын. <>
Екатерина Макарова. Снимокъясыс Коми Республикаса опера да балет театрысь.