Тавося сентябрь 28 лунӧдз Комиысь олӧма войтыр, мужичӧйяс 64 да нывбабаяс 59 арӧссянь, вермасны шыӧдчыны пенсионер арлыдаяслы финанс грамота кузя ставроссияса витӧд чемпионатӧ пырӧдчӧм могысь.
Выль тӧдӧмлун босьтӧмысь ӧтдор сюсьджык вежӧраяслӧн лоас позянлун петкӧдчыны миян республикасянь федеральнӧй тшупӧдын татшӧм ордйысьӧмын.
Регионса чемпионат мунас госслужба да веськӧдлан академияын. Быдӧн петкӧдлас сэні сьӧмӧн вӧдитчӧм кузя ассьыс тӧдӧмлунсӧ торйӧн. Вынаджыкъяссӧ бӧръясны миян республикасянь федеральнӧй тшупӧдын ордйысьысь ӧтувъя командаӧ.
Федеральнӧй чемпионатыс лоас октябрь 22 лунӧ онлайн. Страна пасьталаысь командаяс аддзысясны Г.В.Плеханов нима РЭУ-са медшӧр лыдпаса площадкаын.
Регионса да федеральнӧй тшупӧдын став вермысьсӧ да призёрсӧ пасъясны дона козинъясӧн, а сідзжӧ быдӧнлы сетасны чемпионатын ордйысьӧм йылысь диплом.
* * *
Чемпионатсӧ нуӧдӧм могысь водзмӧстчӧма Россияса сьӧм овмӧс министерство, котыртысьясыс – Г.В.Плеханов нима РЭУ бердын йӧзӧс финанс грамотаӧ велӧдан федеральнӧй методика шӧрин да Россияса минфинысь НИФИ.
<>Гижӧдсӧ дасьтіс Александра Артеева. Снимокыс ӧтуввезйысь.