Комиын мӧдысь нин котыртлісны лекцияяс лыддян «Гордость. Уверенность. Победа» курс. Тайӧ проектыс збыльмӧдсьӧ войвыв муын став олысьыслы, патриотъяслы, ӧнія общественнӧй да политика олӧм гӧгӧрвоны окотитысьяслы. Медшӧр могыс – абу сӧмын сетны йӧзыслы колана юӧр, а тӧдмӧдны странаын да мирын ина лоӧмторъясӧн, медым кужисны торйӧдны збыльсӧ да ылӧгасӧ.
Ӧти татшӧм аддзысьлӧм дырйи экспертъяс кыпӧдісны зэв ёсь сёрни – Россияса тыр арлыдтӧмаясӧс смартфонъяс пыр ылӧдлӧм йылысь. «Цифровой гаджет – дверь в сознание» лекциясӧ нуӧдісны РФ-са Госдумаысь депутат Мария Бутина да тыш-косьса ветеран, ДНР-ысь юӧртан министерствоӧн веськӧдлысьӧс вежысь Даниил Бессонов.
Тайӧ юалӧмыс ӧні зэв тӧдчана, сы вӧсна мый вӧрӧг индӧд серти челядь пыр тшӧкыдджыка вӧчӧны ас страналы паныд мыж-теракт.
Мария Бутиналӧн висьталӧм серти, тайӧ пӧ эпидемия кодь нин кутіс лоны, Россияса пыр унджык регионын татшӧмторйыс овлӧ да. Сэк жӧ пӧ колӧ бура туявны, тыр арлыдтӧмаыс муклюйтчысьяс индӧд серти мыжсӧ вӧчӧма али тӧдӧмӧн ачыс сетчӧма лёкас.
Даниил Бессонов серти, вӧрӧг дзик нин яндзимсӧ воштӧма.
Рытыввыв странаяс да Киевса власьт том йӧзсӧ тӧдӧмӧн туйдӧны-велӧдӧны лёкас. И босьтчисны вӧчны тайӧс СВО пансьытӧдз на: «Синий кит» да «Тихий дом» шуштӧм ворсӧмъясыс пӧ вӧліны аслыссикас репетиция пыдди.
Та кузя пӧ весиг эмӧсь Украинаса спецслужбаяслӧн гуся документъяс. Эксперт тӧдчӧдіс, ыдъясьысь-сумлевайтчысьяслы пӧ колӧ тӧдны: тэ кӧ тӧдӧмӧн мунан страналы паныд, сідзкӧ, вӧчан сьӧкыд мыж, а таысь ковмас кывкутны.
Тайӧ жӧ курс дырйиыс экспертъяс кыпӧдісны нӧшта кык тӧдчана юалӧм.
Мыйла тыр арлыдтӧмаяс оз юӧртны вербуйтысьяс йылысь?
Помкаыс сыын, мый томулов бӧръяпомӧдзыс оз вежӧртны мыж вӧчӧмсӧ.
Медводз найӧс корӧны этшаник сьӧмысь «снимайтны реклама билбордын йӧзӧдӧм могысь туйкост». А бӧрыннас тыдовтчӧ, мый тайӧ фото сертиыс ыстӧмаӧсь беспилотникъяс. А сэсся кагасӧ босьтчӧны повзьӧдлыны-шантажируйтны. Экспертъяс такӧдӧны: тыр арлыдтӧма кӧ ас кадӧ вежӧртіс ылалӧмсӧ да ӧвсис-эновтчис лёк вӧчӧмсьыс, закон лоӧ сы дор. И бать-мамлы колӧ бура гӧгӧрвоӧдны челядьлы: ӧтуввезйын кӧ мынтысьны кӧсйысьӧмӧн корӧны мыйкӧ снимайтны либӧ юксьыны кутшӧмкӧ юӧрӧн, та йылысь дзик пыр колӧ висьтавны верстьӧлы.
Кыдзи гӧгӧрвоны, мый кагатӧ вербуйтӧны?
Тшӧкыда бать-мам оз сюйсьыны быдтас олӧмас, оз видзӧдавны сылысь гаджетсӧ. Сэк жӧ колӧ тӧдны: тыр арлыдтӧма кӧ йӧршитчис ас пытшкас, кутіс игнасьны жыръяс, пуктіс телефонас тӧдтӧм приложение либӧ весиг гуся телефон лӧсьӧдіс – быть восьсӧн, повзьӧдлытӧг сёрнитны сыкӧд. Гӧгӧрвоӧдны, мый сійӧ абу йӧз киын чача. Ӧтуввезсьыд кагатӧ дзикӧдз дугӧдны он вермы, но велӧдны сійӧс видзчысьны – быть. <>
Алина Латышева.