Кор удайтчӧ збыльмӧдны ичӧтдырся кӧсйӧмтӧ, а сэсся и гӧгӧрвоны, мый профессиянад эн сорсьы, сьӧлӧм вылад долыд: сідзкӧ, бӧрйин лӧсялана туйвизь.
Евгения Филиппова чужӧма Печора юбердса Чика грездын. Войвыв кӧдзыд му, сук парма, вынйӧра ю, сиктса тӧжд-мог – тайӧ ставыс ышӧдӧ-велӧдӧ венны сьӧкыдлунъяс.
Женялӧн 4 класс помалӧм мысьт ичӧтик семьянас – мама-ныла – вуджӧмаӧсь овны Изьваӧ. Сэки нин сійӧс кыскӧма медицинаӧ – отсавны йӧзлы мездысьны висьӧмысь, ёнмӧдны дзоньвидзалунсӧ. 2019 воын аслас смена дырйиыс отсалӧма дзоля кагалы да тырвыйӧ вежӧртӧма, мый абу сорсьӧма уджсикас бӧрйӧмнас.
А ставыс вӧлӧма тадз. 2019 вося тулыс. Апрелься мича лун. Евгения муртса на петӧма смена вылӧ, тэрыб отсӧг сетанінӧ котӧрӧн пырӧма аштӧм нывка да горӧдӧма-висьталӧма, «Радуга» лавкаын пӧ вит арӧса племянничаӧй ныльыштіс кӧрт сьӧм да пӧдӧ. Евгения помӧдзыс абу кывзӧма, уськӧдчӧма ывлаӧ. Машинаас абу удитӧма сӧвны, нывка бара на горӧдӧма, со пӧ найӧ асьныс нин локтӧны. Мама-ныла збыльысь вӧлӧмаӧсь нин орччӧн. Кагалӧн чужӧмыс лӧзӧдӧма. Ачыс оз нин лолав. Татшӧм лоӧмтор дырйиыд быд здук дона-тӧдчана. Евгения оз помнит, кыдзи воӧма дорӧдзыс да вӧчӧма кагаыслы Геймлих приём. Та бӧрын перйӧма сьӧмпассӧ, и нывкаыс черӧбтӧмӧн лолыштӧма.
–Шудӧй вӧлі помтӧм, – казьтылӧ Евгения Филиппова. – Вӧлӧмкӧ, сэтшӧм ыджыд шуд мездыны кодӧскӧ ӧні да тан. И тайӧ ышӧдӧ водзӧ вылӧ.
Медицина колледжӧ тӧдӧмлун босьтны Евгения пырӧма 2010 воын школа помалӧм бӧрын. А сійӧс помалӧм мысьт 2014 вося августын босьтчӧма Изьваса шӧр больничаын тэрыб отсӧгын фельдшеравны. Дежурствояс, висьысьяс дорӧ ветлӧмъяс, медводдза отсӧг сетӧм да бара дежурство… Дас кык во нин тайӧ кывкутана удж вылас, а вит арӧса нывка мездӧмыс век на медся яръюгыд казьтылӧм.
Евгения Владимировна – уна челядя мам. Иван верӧсыскӧд, хирургия юкӧнысь медбраткӧд, быдтӧны куим ныв: Даша велӧдчӧ нёльӧд классын, Анна таво петӧ 2-ӧд номера детсадйысь школаӧ, да тайӧ жӧ садъяс котралӧ куим арӧса Лиза.
Юалі, мый отсалӧ личӧдчыны-шойччыны уджсьыс да семьяпытш тӧжд-ноксьыс, да Евгения Владимировна шуис, кабала ньӧрйысь кысьӧм пӧ. Кольӧм во волӧма мастер Татьяна Цыгляевалӧн урокъяс вылӧ да ыззьӧма-ӧзйӧма. Вобыдӧн сымдатор вӧчӧма, рӧдвуж-ёртъяслы пӧ тырмымӧн, да вузӧс вылӧ на вичмис.
Юалі Евгениялысь и, кутшӧмӧн колӧ лоны тайӧ профессиясӧ бӧрйысьлы. Медвойдӧр пӧ шаньӧн, а сідзжӧ йӧз дорӧ сибыдӧн, гӧгӧрвоысьӧн, кывкутысьӧн. Колӧ пӧ тшӧтш кужны тэрыба чукӧртчыны, мӧвпавны, не шежлысьны-шыбласьны да век вӧчны лӧсялана кывкӧртӧд.
Снимокыс Евгения Филипповалӧн гортса архивысь.
<> Игорь Колесов. Изьва р. Комиӧдіс Елена Плетцер.