Апрель 23 лунӧ республикаса Госсӧветын регионса правительстволӧн кольӧмвося удж йылысь висьтасигӧн Дмитрий Братыненко пасйис, мый видз-му овмӧсӧ вӧлі веськӧдӧма 1,4 миллиард шайт.
Правительствоӧн веськӧдлысьлӧн кывъяс серти, тайӧ отсӧгыс сетіс позянлун комын куим овмӧсын выльмӧдны техника. Сідзжӧ Кӧрткерӧс, Сыктыв, Сыктывдін, Чилимдін, Кулӧмдін да Инта районъясын лӧсьӧдӧма выль производствояс, Сыктывкарса йӧв заводын быд вежон йӧвсӧ кутісны вӧчны комын, а йогуртсӧ – куим тоннаӧн унджык. Юркарса нянь пӧжалан заводӧ вӧлі ньӧбӧма выль оборудование.
–Тӧдчана, мый «Ухта-97» предприятие колис государстволӧн эмбурӧн, уджыс сэні ладмӧ, – пасйис Дмитрий Братыненко.
Тайӧ, а сідзжӧ Луздорса «Южное», Пальса да Нёбдінса овмӧсъясын выль скӧт картаяс кыпӧдӧм бӧрын регионын йӧвсӧ вонас кутасны вӧчны 20 сюрс тонна – ӧнія дорысь кык пӧв унджык. Инта районысь кӧр видзан куим овмӧс ӧтувтчӧны ӧти предприятиеӧ, медым чинтыны рӧскод да тӧлкӧнджык вӧдитчыны Арктика бердса овмӧсъяслы вичмӧдан сьӧма отсӧгӧн.
Таво видз-му овмӧсъяслы отсалӧм могысь урчитӧма вот мынтігӧн личӧдъяс, 10 прӧчент содтӧма йӧв ньӧбан дон. Республикаын индӧма восьтыны куим агрокласс.
–Йӧзлӧн корӧм серти 2026 восӧ вӧлі шуӧма Сикт воӧн. Тайӧ висьталӧ, мый республика колана ногӧн донъялӧ сиктъяссӧ, и миянлы колӧ пыдди пуктыны сэні олысьясӧс да му-видз бердын уджалысьясӧс, – висьталіс депутатъяс водзын сёрнитігӧн регионса правительствоӧн веськӧдлысь Дмитрий Братыненко.
Гижӧдсӧ дасьтiс Павел Симпелев.