Воторникӧ Леткаса шӧр школаын кыпыда восьтісны агротехнология класс. Велӧдчысьясӧс да велӧдысьясӧс тайӧ тӧдчана лоӧмторнас воліс чолӧмавны Коми Республикаын видз-му овмӧсса министр Сергей Елдин.
Кыдз висьталіс биология велӧдысь Раиса Ерушева, классыс уджалӧ мӧйму сентябрь 1 лунсянь нин. Сизимӧд класса 14 ныв-зон быд лун тӧдмасьӧны быдмӧг генетикаӧн да селекцияӧн.
–Но вӧчавны кутшӧмсюрӧ опыт лабораторияас эг вермӧй, колана прибор-оборудованиеыс эз вӧв да. Комиын йӧзӧдӧм Сикт воӧ «Агрокласс» уджтас серти регионса видз-му овмӧс министерство вичмӧдіс став коланаторсӧ. Дерт, отсаліс и республикаса наука да тӧдӧмлун сетан министерство, – висьталіс Раиса Александровна.
Леткаса шӧр школаын Раиса Ерушева зільӧ 39 во нин. Ачыс сійӧ, кыдзи и Сергей Николаевич, Луздор районса Ношульысь.
Министрсянь тайӧ восьса сьӧлӧма аньыслы да велӧдчысьяслы вичмис град выв пуктас кӧйдыса букет.
Луздор районысь Леткаса шӧр школаын воторникӧ вӧлі уна йӧза. Тані кыпыда восьтісны выльмӧдӧм агротехнология класс. Велӧдчысьясӧс да велӧдысьясӧс тайӧ тӧдчана лоӧмторнас чолӧмаліс Коми Республикаын видз-му овмӧсса министр Сергей Елдин.
Воӧмаясӧс сцена вывсянь гажӧдіс челядьлӧн хор.
Министр пасйис, мый регионса агропром комплекслы талун зэв ёна колӧны велӧдчӧм том йӧз. Оз пӧ тырмы ылӧсас 350 агроном, зоотехник, ветеринар да мукӧд сикас специалист. Та вӧсна ныв-зонмӧс ичӧтдырсяньыс тӧдмӧдӧны видз-му овмӧсса тӧжд-могӧн, сикт сӧвмӧдан туйвизьясӧн. Школа помалӧм бӧрын налы отсалӧны бӧрйыны шогмана техникум-вуз, вештысьӧны велӧдчӧмсьыс, медым сэсся диплома том специалист бӧр локтіс чужан сиктас да инасис татчӧс видз-му овмӧс предприятиеӧ. Нӧшта на, том специалистлы керка-патера ньӧбигӧн либӧ кыпӧдігӧн отсалӧны сьӧмӧн.
–Зэв нимкодь, мый буретш чужан районын воссис агротехкласс. Татшӧмсямаыс республикаын мӧдӧд. Таӧдз восьтім Сыктывдін районса Паджгаын. Чайта, татшӧмыс лоас и Гурьёвчиса школаын, – висьталіс министр.
Сиктса квайт школаын и таӧдз дасьтылісны видз-му овмӧс профессияӧ, медсясӧ трактористъясӧс. Сэні челядь тӧдмасьӧны «кӧрт вӧв» пытшкӧснас да велӧдчӧны веськӧдлыны вына техникаӧн.
Леткаса велӧдчысьясӧс талун виччысьӧны Луздор районса «Южное» предприятиеын. Овмӧсас видзӧны голштин да холмогор пӧрӧдаа некымын сюрс мӧс-кукань. Тані медуна му – квайт сюрс гектар. Кӧдзӧны ӧти да уна вося турун, вӧдитӧны зӧр, ид, анькытш, кукуруза, шобді, бобӧнянь, люцерна, лядвенец да судан турун. Быд мӧслы дасьтӧны колана мында кӧрым, весиг орчча овмӧсъясӧ иналӧны. Сӧмын «Южноеын» лысьтысьӧны «Карусель» комплексӧн.
–Мӧданныд зільны му вылын либӧ гид-картаын али бӧръянныд мӧд ордым, агроклассын шедӧдӧм тӧдӧмлуныс пыр отсалас олӧманыд, – кывкӧрталіс Сергей Николаевич.
Та бӧрын сизимӧд класса велӧдчысь Александр Третьяков министркӧд агротехклассӧ пыранінын вундісны гӧрд лента.
Биология велӧдысь Раиса Ерушева нуӧдіс челядькӧд восьса урок.
–Нималана геолог да почвовед Василий Докучаев шулӧма: муыд пӧ зарниысь донаджык. Зарнитӧг мортыд вермас овны, а мутӧгыд – оз, – татшӧм кывъясӧн Раиса Александровна паніс уроксӧ.
Та бӧрын сійӧ висьтавліс, мыйсяма овлӧ муыс, кутшӧм ногӧн быдмӧгыс вужнас кыскӧ сэтысь вынсӧ, кыдзи быдмӧг серти тӧдмавны, шома-ӧ муыс да с.в.
–Талун видз-му овмӧс абу нин лэбын-зыр да подойник. Му вылын да картаын вӧдитчӧны генетикаӧн, биотехнологияӧн да информатикаӧн. Эска, коркӧ Леткаса школанымӧс мир пасьтала нимӧдас миян агротехклассысь петӧм селекционер, – татшӧм кывъясӧн помаліс уроксӧ Раиса Ерушева.
Сизимӧд класса велӧдчысьяс тані пыдісянь тӧдмасьӧны биологияӧн да химияӧн. Классас выль улӧс-пызан, интерактив да электроника оборудование-прибор отсӧгӧн найӧ унджык тӧдмаласны генетика да селекция йылысь. Ныв-зон унджык тӧдӧмлун босьтасны и видеофильмъясысь. Урокъяс дырйи челядь петалӧны и му вылӧ, предприятиеса гӧра-кӧдзаинӧ. Налӧн лоас позянлун петкӧдчыны выставка-конкурсын да с.в.
Леткаса школаысь вит педагог велӧдчӧмаӧсь «Кадры в АПК» федеральнӧй уджтас серти.
Кӧйдыса букетысь ӧтдор Сергей Елдин козьналіс школаыслы ыджыд торт. Та бӧрын петкӧдлісны Комиысь АПК предприятиеяс йылысь фильм.
Челядь тӧдмалісны, мый республикаса ӧти овмӧсын вӧдитӧны 28 сюрс квайтпалич. Кольксӧ нуӧны Кировӧ, тэчӧны картон тубрасӧ да иналӧны «Пятёрочка» да «Магнит» пыр. Тшӧтш и миян республикаын. Регионын вӧдитӧны 87 сюрс кӧр, 26 сюрс мӧс да 32 сюрс порсь. Сыктывкарса йӧв заводӧ Ухтаса да тшӧтш и Луздор районса овмӧсъяссянь быд лун вайӧны 90 тонна йӧв. Тані вӧчӧны «Белая поляна» нима 40 сикас вӧлӧга. Республикаса квайт овмӧсын рӧдмӧдӧны чери.
<> Николай Размыслов. Снимокъясыс авторлӧн.