Коми Республикаын федеральнӧй пошта йитӧд управлениеӧн, «Россияса пошта» ФГУП-лӧн да АО-лӧн филиалӧн вӧвлӧм веськӧдлысь Виталий Васильевич Осиповлӧн апрель 29 лунӧ гӧгрӧс тшупӧда пас – тырӧ 70 арӧс. Связь юкӧнын сійӧ зілис 47 во.
Виталий Осипов чужӧма Сыктывкарын уна челядя семьяын. Мамыс война воясӧ да мирнӧй кадӧ нин нелямынысь унджык во зільӧма телеграфисткаӧн. Батьыс воюйтӧма Войвыв флотын саридзса пехотаын. Демобилизуйтчӧм бӧрас уджалӧма потребкооперацияын да народнӧй овмӧсса мукӧд юкӧнын.
1975 воӧ Виталий Осипов босьтчӧма Воркутаса связь юкӧнысь телеграфын электромонтёравны, уджсьыс орӧдчывтӧг велӧдчӧма Ленинградын Бонч-Бруевич нима электротехническӧй связь институтын. 1982 воын Сыктывкарӧ бергӧдчӧм мысьт инженералыштӧма телеграфын да сійӧ жӧ воас вуджӧма ПТУС-ӧ каръяс костын телефон-телеграф йитӧд паськӧдан службаӧ. Водзмӧстчӧма-сӧвмӧдӧма республикаын абонент телеграф – документальнӧй связь сикас, а сэсся воӧма пошта йитӧд службаӧ.
1989 воын Виталий Васильевичӧс бӧрйисны Сыктывкарса почтамтын начальникӧн. Сылӧн бӧрйысьӧм-водзса программа серти лои восьтӧма пошта йитӧд 5 отделение, карса йӧв вӧчан завод да нянь пӧжалан комбинат отсӧгӧн да хозспособӧн кыпӧдӧма уджалысьяслы 16 патераа керка. Виталий Осиповӧс бӧрйылісны Сыктывкарын 21-ӧд созывса народнӧй депутатъяс сӧветӧ.
1994 воын пошта да электросвязь юкӧн торйӧдӧм бӧрын УФПС госучреждениеӧн веськӧдлысь Гарри Эдуардович Шиклӧн юрнуӧдӧм улын Виталий Осипов Г.М.Куклина, В.Ф.Грачев, А.Я.Кофаль, С.В.Соколов, Т.В.Тутринова да мукӧд уджъёртыскӧд ӧтув вынсьӧдісны-сӧвмӧдісны выль предприятиесӧ. Почтамтӧн Виталий Васильевич веськӧдліс 1996 воӧдз. Сэсся лои Комиын УФПС ГУ-ӧн веськӧдлысьӧс вежысьӧн, 2003 воын – начальниклысь удж вӧчысьӧн, 2003 вося ноябрсянь босьтчис юрнуӧдны «Россияса пошта» ФГУП-лӧн филиалӧн.
2004 восянь пошта юкӧнын лоины гырысь вежсьӧмъяс. Виталий Осиповлӧн веськӧдлан кадӧ вӧлі дзоньтасьӧма регионса, тшӧтш и сикт-посёлокса пошта отделениеясын, выльмӧдӧма автопарк, босьтчисны вӧдитчыны касса терминалъясӧн, компьютеръясӧн. Лои котыртӧма экспресс-пошта участокъяс, вӧзйӧма выль сикас услугаяс.
Виталий Васильевич петкӧдліс асьсӧ водзмӧстчысь, ыджыд сяма специалистӧн да веськӧдлысьӧн, тӧдӧмлуннас юксис и уджъёртъясыскӧд. 2006 восянь сійӧ войтыркостса общественнӧй связь академияын академик.
Россия Федерацияса связьын заслуженнӧй уджалысь, бур да тӧлка веськӧдлысь Виталий Осипов кужис ӧтувтны, ышӧдны вермӧмъяслань да нуӧдны ас бӧрсяыс уджъёртъяссӧ. Сійӧ вӧлі стрӧг йӧзыс да тшӧтш и ас дорас. Корис збыльмӧдны удж-могсӧ ас кадӧ да кывкутӧмӧн. Та дырйи вӧлі восьса сьӧлӧма да шань.
Таысь Виталий Васильевичӧс пыдди пуктісны да вылӧ донъялісны эз сӧмын уджъёртъясыс, но и Коми Республикаса мукӧд предприятие-организацияӧн веськӧдлысьяс.
Виталий Осиповӧс пасйӧма «Россия Федерацияса связьын заслуженнӧй уджалысь», «Коми Республикаса заслуженнӧй уджалысь», «Россияса пошта» АО-ын почёта уджалысь» нимъясӧн, а сідзжӧ сетӧма ведомствоса медвылыс награда – «Связьса мастер» ним. Таысь кындзи эм уна почёт грамота: Коми Республикаса юралыссянь, Госсӧветсянь, связьын уджалысьяслӧн ставроссияса профсоюзсянь, «Россияса пошта» ФГУП-сянь.
Виталий Васильевич гортсаясыслы медся матыс морт, олӧмас пыкӧд, семьяыс сылы меддона. Гозъя быдтісны ныла-пиа, да ӧні дедыс ёна отсасьӧ Алина да Виктория внучкаяссӧ быдтӧм-воспитайтӧмын.
2022 воын пенсия вылӧ петӧм бӧрас Виталий Васильевич тшӧкыда ветлывлӧ чери кыйны, водзмӧстчӧ туризмын. Ичӧт судноӧн веськӧдлӧм могысь право босьтӧм бӧрти Владимир пиыскӧд навигация кадӧ тӧдмасьӧны Коми Республикаса юясӧн. Зэв ёна радейтӧ вӧрӧ тшакла ветлыны, мукӧд кар-странаын путешествуйтны.
* * *
Пыдди пуктана Виталий Васильевич, ыджыд аттьӧ тіянлы сьӧлӧмсянь зільӧм-уджсьыныд да мывкыдлунсьыныд! Сиам крепыд дзоньвидзалун, помтӧм вын-эбӧс да выль вермӧмъяс! Мед быд лун козьналас тіянлы нимкодь здукъяс, мед збыльмасны гуся кӧсйӧмъясныд, а орччӧн пыр лоӧны радейтана йӧзыд да бур ёртъяс! Кольӧй век татшӧмӧн, тшӧкыдджыка нюмъялӧй да олӧй тыр олӧмӧн!
Матыссаясыд да уджъёртъяс.
<> Снимкоъясыс Виталий осиповлӧн гортса архивысь.