Сыктывкарын Тентюковса керка-интернатӧ волісны татаралӧн национально-культурнӧй автономияын зільысьяс аддзысьлыны сэтчӧс олӧма да вермытӧм йӧзкӧд.
Аддзысьлӧмсӧ сиисны Россияын войтырӧс ӧтувтан да Татарстанын Габдулла Тукайлы сиӧм вояслы, а сідзжӧ сылӧн чужӧмсяньыс 140 во тырӧмлы.
Автономияас да Коми Республикаса войтырлӧн Ёртасян керкаын зільысьяс дасьтісны культураӧн тӧдмӧдан да тӧдӧмлун озырмӧдан кыпыд уджтас.
Учреждениеса библиотекаын чукӧртчӧмаяс тӧдмасисны татара кывйӧн, эскӧмӧн, традицияӧн, национальнӧй сёян-юанӧн, шыладӧн, кипода уджӧн да архитектураӧн.
Сёрнитісны и поэзия йылысь. Гажсӧ нуӧдысь Мария Романова висьталіс поэт-герой Муса Джалильлӧн подвиг-олӧм йылысь.
«Моабитская тетрадьӧ» пыртӧм кывбуръяссӧ сійӧ гижлӧма фашист пленӧ веськавлігӧн. Наын тыдовтчӧ сылӧн повтӧмлуныс да Муса Джалильлӧн чужан мусӧ радейтӧмыс.
А нӧшта ставӧн тӧдмалісны, мый 2026 восӧ Татарстанын сиӧма Габдулла Тукайлы – татаралӧн ӧнія литература подув пуктысьлы.
Нимкодьӧдіс аслас петкӧдчӧмӧн и Разиф Хурматович гармоникаӧн йӧкостса шылад ворсӧмнас, а автономияӧн юрнуӧдысь Мухассама Ончева аттьӧаліс ставнысӧ татшӧм бур аддзысьлӧмысь да сетіс интернатсалы козинъяс.
Торйӧн нин ставлы сьӧлӧм вылас воис татара сёян-юаныс. Ставӧн видлісны эчпочмак – яя да картупеля чӧскыд пӧжас, а сідзжӧ чак-чак – маа юмовтор.
<> Екатерина Микушева. Снимокъясыс ӧтуввезйысь.