Талун крестьянин (фермер) овмӧсъяс пуктӧны экономика сӧвмӧдӧмӧ тӧдчана пай. Найӧ водзмӧстчӧны-могмӧдӧны странаын да республикаын олысьясӧс бур да чӧскыд сёян-юан вӧлӧгаӧн, а веськӧдлысьясыс – ассьыныс уджсӧ сьӧлӧмсянь вӧчысьяс – отсалӧны бурмӧдны сикт-грездын олӧмсӧ. Кӧрткерӧс районса Ыджыдвиддзысь Надежда Макарова 20 сайын босьтчис юрнуӧдны «Исток» СПК-ӧн.
Ставыс артмӧма
Надежда Владимировна Сыктывкарса кооперативнӧй техникумын продавеч-бухгалтерӧ велӧдчӧм бӧрын бергӧдчӧма чужан районас. 1995 восянь босьтчӧма уджавны Ыджыдвидзса совхозлӧн Выльыбса отделениеын мӧс лысьтысьӧн. 2000-ӧдсянь кук видзӧма, 2004 воын индӧмаӧсь бухгалтерӧн, а во мысти – главнӧй бухгалтерӧн.
2006 воӧ «Исток» СПК-ын уджалысьяс ӧтув чукӧртчылӧмӧн бӧрйӧмаӧсь Надежда Владимировнаӧс овмӧсӧн веськӧдлысьӧн. 2005 воын вынсьӧдӧм предприятие вылас ӧнӧдз кутчысьӧ сиктын олӧмыс. Тані медсясӧ йӧв вӧчӧны.
Дерт, Надежда Макаровалы вичмӧма сьӧкыд да кывкутана удж, но йӧзыс сылы эскӧмаӧсь, лача кутӧмаӧсь, мый овмӧсыс оз киссьы, а мӧдас сӧвмыны. 2006 воын сэні зільӧма 89 морт, скӧтыс вӧлӧма 360-ысь унджык юр. И Надежда Владимировналӧн ставыс артмӧма.
Бурланьӧ вежсьӧмъяс
Сэксянь овмӧсын унатор вежсьӧма бурланьӧ. 2013 воын Надежда Владимировналӧн юрнуӧдӧм улын Выльыбын вӧвлӧм порсь гидысь вӧчӧмаӧсь 120 юр вылӧ мӧс карта. 2020-ӧдын – выль тшупӧд: босьтчӧмаӧсь кыпӧдны 140 юр вылӧ роботизируйтӧм мӧс карта. А 2025 воын збыльмӧдісны инвестицияа выль проект – лои стрӧитӧма сулалан 213 сюруклы вайсян отделениеа двор. Уджтас доныс – 60 миллион шайт. 37 миллионыс вичмис государствосянь, 2 миллион шайт торйӧдіс Кӧрткерӧс районса администрация.
Тайӧ проект сертиыс кыпӧдӧм картаын куканьсӧ видзӧны-быдтӧны да мӧс лысьтӧны робот отсӧгӧн. Татшӧм ногӧн сюрукъяс кокньыда вайсьӧны, а куканьяс чужӧны дзоньвидзаӧн. Вобыднас скӧтыс овлӧ шӧркодя 465 юр, на лыдысь 220-ыс – лысьтан.
Дас медбур лыдын
Таысь кындзи 2024 восянь «Истокын» рӧдмӧдӧны бур пӧрӧдаа скӧт. Воысь-во выльмӧдӧны и видз-му овмӧсын колана техника. Кӧрым заптӧм могысь ньӧбӧмаӧсь комбипак. Ӧні предприятиеын скӧтыс 460 юр. Йӧвсӧ вӧчӧны 1.430 тонна (районын ӧтувъя лысьтӧмсьыс 12 прӧчент). СПК-ын уджалӧ 28 морт, а овмӧсыс Комиын 10 медбур лыдын.
2022 восянь Надежда Владимировна юрнуӧдӧ и орчча «Вишерскӧй» СПК-ӧн, кӧні вӧчӧны йӧв да переработайтӧны яй.
Тайӧ предприятиеыс тшӧтш сӧвмӧ. Сэні уджалӧ 61 морт. Скӧтыс 1 сюрсысь унджык юр: 400 сюрукыс – лысьтан, 76-ыс – яй вылӧ.
2025 восянь «Вишерскӧй» – регионын йӧв вӧчӧм кузя 10 медвынйӧра предприятие лыдын: вонас вӧчӧны 2.591 тонна, ӧти мӧскыс лысьтӧ 6.375 килограмм. Овмӧсын выльмӧдӧны скӧт стадасӧ и техникасӧ. Юрнуӧдысьлӧн чуйдӧмӧн ас вынӧн выльмӧдісны-дзоньталісны кук карта да ньӧбисны «Кормоняня» аппарата комплекс.
Колӧ тшӧтш пасйыны и, мый предприятиеясын абу удждон ни вот вештӧм кузя уджйӧзыс. А кӧрымсӧ заптісны урчитӧмысь унджык.
Алёна Михайлова.
<> Гижӧдъяссӧ дасьтӧма Коми Республикаса видз-му овмӧс министерствоысь юӧръяс серти.
Снимокъясыс тайӧ жӧ ведомствосьыс.