Комиын Сикт воӧ фермеръяслы ас овмӧснысӧ ёнмӧдӧм могысь государствосянь сьӧма отсӧгыс вермас вичмыны комын миллион шайтӧдз. Таво гранта конкурссӧ шуӧма нуӧдны апрельын.
–Буретш неыджыд овмӧсъяс сайын, кыдзи кутасны водзӧ сӧвмыны миян сикт-грездъяс, – тӧдчӧдӧ республикаса юралысь Ростислав Гольдштейн.
Кыдзи юӧртӧ регионысь видз-му овмӧсса министр Сергей Елдин, фермер овмӧсъяслы грантъяс вичмӧдӧм вылӧ бюджетысь шуӧма видзны 53 миллион сайӧ шайт. Медічӧт грантыс – куим миллион, а медся ыджыдыс – комын миллион шайт. Та дырйи колӧ босьтны тӧд вылӧ, мый кымын унджык сьӧм вичмас государствосянь конкурсын вермысьлы, сымын унджык ковмас пуктыны уджтассӧ збыльмӧдӧм вылӧ аслыс фермерлы либӧ видз-му предприятиеыслы.
Торъя йӧзлы видз-му овмӧсын асшӧр уджӧ медводдзаысь на босьтчӧм могысь вермасны вичмӧдны грант серти уна вылӧ кӧкъямыс миллион шайт.
Казьтыштам, ас овмӧсъяслы государствосянь гранта отсӧгсӧ шуӧма сетны «Технологическое обеспечение продовольственной безопасности» национальнӧй проект весьтӧ.
<> Гижӧдсӧ дасьтіс Александра Артеева.
Снимокыс ӧтуввезйысь.