Комиын водзмӧстчысь том йӧзлы тайӧ лунъясӧ нин позьӧ шыӧдчыны «Росмолодёжь. Гранты» конкурсӧ пырӧдчӧм могысь. Та йылысь аслас соцсетьын юӧртӧ регионса юралысь Ростислав Гольдштейн.
Конкурсас ордйысьны вермасны 14-сянь 35 арӧсӧдз том войтыр. Ӧти проект збыльмӧдӧм могысь шуӧма мынтыны медунасӧ ӧти миллион шайт.
Бӧрйысьны урчитӧма 18 нимпасын: наукасянь да бизнессянь босьтӧмӧн творчествоӧн да волонтёралӧмӧн помалӧмӧн.
«Росмолодёжь. Гранты» конкурсыс нуӧдсьӧ Россияса президент Владимир Путинлӧн индӧд серти збыльмӧдан «Том йӧз да челядь» федеральнӧй национальнӧй проект весьтӧ.
Республикаса юралысь Ростислав Гольдштейнлӧн видзӧдлас серти, миян регионса кар-районын водзмӧстчысь ныв-зонлӧн эм став позянлуныс шедӧдны ассьыныс овмӧдчӧминъяс сӧвмӧдӧм могысь гранта сьӧм.
–Миян том йӧз эз нин ӧтчыдысь эскӧдны, мый налӧн тырмӧ тӧдӧмлун-сямыс лоны быдсикас конкурсын вермысьӧн да грантъяс весьтӧ збыль-мӧдны ассьыныс медся смел дум-кӧсйӧмсӧ.
Сідз, кольӧм куим вонас Комиысь 76 проект олӧмӧ пӧртны вӧлі вичмӧдӧма 52 миллионысь унджык шайт. Эн майшасьӧй, эскӧй асланыд вынӧ, – ышӧдӧ том йӧзӧс Ростислав Гольдштейн.
«Росмолодёжь. Гранты» конкурсӧ пырӧдчӧм могысь колӧ «Молодёжь России» платформаын пасйысьӧмӧн шыӧдчыны апрель 16 лунӧдз. Тшӧтш и налы, кодъяс вӧліны нин тайӧ гранта конкурсас вермысьясӧн.
<> Гижӧдсӧ дасьтіс Александра Артеева.
Снимокыс ӧтуввезйысь.