Комиын «Земский работник культуры» федеральнӧй уджтасӧ таво вермас пырӧдчыны дас кӧкъямыс морт. Та йылысь юӧртіс Коми Республикаса юралысьлӧн Общественнӧй приёмнӧйын «веськыд йитӧд» дырйи регионса культура да архив удж кузя министрӧс первой вежысь Константин Баранов.
Казьтыштам, тайӧ уджтассӧ вынсьӧдӧма Россияса президентлӧн индӧд серти, медым ышӧдны бур тӧдӧмлун-сяма специалистъясӧс босьтчыны уджавны сикт-посёлокын, кӧні олысьыс 50 сюрсысь абу унджык да оз тырмы культураын зільысьыс.
Кольӧм во вит морт мунӧмаӧсь уджавны Печораӧ, Удора, Емдін, Кулӧмдін да Чилимдін районъясӧ. Ставныслы налы мынтӧмаӧсь миллион шайт.
Таво «Земский работник культуры» проектӧ пырӧдчӧм кузя конкурсыс мунас апрель 15 лунсянь июль 15 лунӧдз.
Кутшӧм документъясӧн колӧ шыӧдчыны, позьӧ тӧдмавны ӧтуввезйын ведомствоса сайтын.
Арлыд тӧд вылӧ оз босьтсьы. Конкурсын дас кӧкъямыс вермысьлы мынтасны быдӧнлы миллион шайт.
Та могысь колӧ кырымавны республикаса либӧ кар-районса культура учреждениеыскӧд сэні этша вылӧ вит во уджалӧм йылысь сёрнитчӧм.
Колӧ пасйыны, таво позьӧ инасьны татшӧм учреждениеас и ас районса овмӧдчӧминын.
Таысь ӧтдор, кольӧмвося октябрсянь «Земский работник культуры» федеральнӧй проектӧ пырӧдчысьяслы «Ылі Асыввывса да Арктикаса ипотека» программа серти позьӧ босьтны кызь во кежлӧ кык прӧчентӧдз ставкаа кредит.
Комиын тайӧ кокньӧда ипотеканас вермасны вӧдитчыны Воркутаын, Интаын, Усинск да Чилимдін районъясын олысьяс.
–Культураын уджалысьяслы тайӧ программасӧ шуӧма збыльмӧдны 2030 воӧдз, – пасйис Константин Баранов. – Муниципалитетъясын радпырысь вочааласны выльӧн воӧмаясӧс. Кӧні эм позянлун, могмӧдасны оланінӧн. А миллион шайтсӧ позьӧ видзны кӧть мый вылӧ. А миян ведомство и водзӧ кутас вӧчны став коланасӧ, медым культураын зільысьяс вермисны сӧвмӧдны йӧзлы бур вылӧ асланыс уджын тӧдӧмлун-сямсӧ.
* * *
«Земский работник культуры» федеральнӧй программа кузя юалӧмъясӧн позьӧ шыӧдчывны 8 (8212) 255-484 номера телефон либӧ регионса культура министерстволӧн электроннӧй пошта пыр.
Адресыс: adm@mincult.rkomi.ru.
<> Гижӧдсӧ дасьтіс Александра Артеева.
Снимокыс ӧтуввезйысь.