Регионса юралысь Ростислав Гольдштейнлӧн индӧд серти 2026 восӧ Комиын йӧзӧдӧма Сикт воӧн. Сы могысь, медым ыджыдджык тӧдчанлун сетны сикт-грезд сӧвмӧдӧмлы, сэтчӧс йӧзлысь олӧмсӧ бурмӧдӧмлы. Такӧд тшӧтш уна сикас социальнӧй отсӧг-кокньӧд вичмӧдӧмӧн ышӧдны том специалистъясӧс сиктын овны-уджавны.
Сідз, регионса минсельхозысь пресс-службалӧн юӧр серти, видз-му овмӧс договор серти уджалысь том специалистъяслы, абу на кӧ налы 35 арӧс, позьӧ мынтысьтӧг босьтны му участок. Кыдз тыдовтчӧ, сиктын олысьяслы тайӧ зэв тӧдчана. Кольӧмвося октябрӧдз та могысь ӧчередын сулалӧма сюрсысь унджык морт, на лыдын и том специалистъяс. Уналаын прӧст му участокыс абу тырмымӧн, но татшӧмыс эм Мылдін, Чилимдін, Луздор да Княжпогост районъясын.
Таысь ӧтдор, «Арктикаса гектар» госпрограмма серти позьӧ вит во кежлӧ босьтны кӧртымӧ либӧ асэмбуравны гектар му. Комиын кырымалӧмаӧсь нин ветымын татшӧм договор, на лыдын сизимсӧ – Чилимдін районын. Ростислав Гольдштейнлӧн висьталӧм серти, налы видз-му овмӧс уджӧ босьтчӧм могысь лоас государствосянь отсӧгыс.
Сиктӧ уджавны воӧм специалистъяслы государствосянь вичмӧ нӧшта кокньӧд. «Комплексное развитие сельских территорий» госпрограмма серти шуӧма сетны налы оланін кыпӧдӧм-ньӧбӧм вылӧ сьӧм.
Сідз, кольӧм во 26 морт босьтӧма 60,8 миллион шайт, сы лыдын 51,9 миллионыс – республикаса бюджетысь. Быдӧнлы шӧркодя вичмӧма 2,3 миллион шайт.
Таысь ӧтдор, видз-му овмӧс предприятиеяс федеральнӧй, республикаса да меставывса бюджетъясысь, а сідзжӧ асланыс кудйысь сьӧм вылӧ кыпӧдӧны выль олан керкаяс, мед кӧртымӧ сетӧмӧн овмӧдны сэтчӧ налы колана специалистъясӧс. Шуам, Луздор районысь «Южное» ООО лӧсьӧдчӧ стрӧитны нёль олан керка. Та могысь дасьтӧмаӧсь нин проект. Доныс 25,9 миллион шайт. <>
Гижӧдсӧ дасьтіс Елена Осипова. Снимокыс ӧтуввезйысь.