«Семья» нацпроект сетӧ позянлун судзсьытӧма олысь семьяяслы социальнӧй контракт кырымалӧмӧн нажӧвитыштны сьӧм. 2025 воын Комиын вӧлі кырымалӧма 1.602 татшӧм сёрнитчӧм.
Таво тайӧ программа сертиыс асшӧр уджӧ медвойдӧр вермасны босьтчыны торъя военнӧй операция вылысь демобилизуйтчӧмаяс да СВО дырйи ранитчӧм понда I, II группаа инвалидъясӧн лоӧм ветеранъяслӧн гӧтыръяс. Накӧд сёрнитчӧмсӧ кырымаласны чӧжӧснысӧ артышттӧг, но налы колӧ пасйысьны уджӧн могмӧдан шӧринын да босьтны «Айму дорйысьяс» госфондысь торъя кабала.
–Соцконтракт серти государствосянь отсӧг сетан инӧдӧ вежсьӧмсӧ пыртӧма Россияса президент Владимир Путинлӧн индӧд серти, медым торъя военнӧй операция вылысь гортас бергӧдчӧм геройяс ӧдйӧджык пырӧдчисны быдлунъя олӧмӧ да вермисны петкӧдлыны асьнысӧ предприниматель уджын, – висьталіс Коми Республикаса удж да йӧзӧс социальнӧя доръян министерствоӧн веськӧдлысьлысь удж вӧчысь Татьяна Майкова.
Соцконтракт кырымалӧм бӧрын мортыслы сетӧны государствосянь сьӧма отсӧг, ас пайсьыс жӧ сійӧ кӧсйысьӧ вӧчны ставсӧ, медым венны олӧмас сьӧкыдлунсӧ. Государство да торъя морт костын татшӧм ёртасьӧмысь водзӧсыс эм: кольӧм во страна пасьталаысь 84 прӧчент соцконтракт кырымалысьыс кутӧма нажӧвитны аслас семьялы унджык сьӧм.
–Сідзкӧ, программаыс збыльысь отсалӧ аддзыны ас вын да тӧдӧмлун серти удж, – пасйис Та-тьяна Майкова. – Мӧд кывйӧн кӧ, соцконтракт бурлань вежӧ мортыслысь олӧм. Тайӧ торйӧн нин колана судзсьытӧма олысь да уна челядя семьяяслы, и та вӧсна медводз накӧд кырымалӧны соцконтрактсӧ. 2025 воын программаас пырӧдчис уна челядя 251 семья.
Контракт серти асшӧр удж панысьяслы ӧтчыдысь сетӧны 350 сюрс шайтӧдз, гортгӧгӧрса овмӧс лӧсьӧдысьяслы – 200 сюрсӧдз. Тавосянь содӧма и быд тӧлысся пособиеыс. Сідз, удж корсьӧм нырвизь серти республикаса лунвыв районъясын олысьяслы вичмӧдӧны 22.316 шайт, войвыв ра-йонсалы – 27.610 шайт.
Буретш асшӧр уджӧ босьтчӧмкӧд, гортгӧгӧрса овмӧс лӧсьӧдӧмкӧд да удж корсьӧмкӧд йитӧдын кольӧм во вӧлі кырымалӧма медуна соцконтракт. Комиын 747 олысь пырӧдчӧма тайӧ программаас удж корсьӧм могысь, 619-ӧн босьтчӧмаӧсь предпринимательствоӧ, а 101-ӧн ас овмӧс сӧвмӧдны кутӧмаӧсь.
Но эмӧсь и кодъяслы висьӧм либӧ вермытӧм вӧсна уджавны оз позь. Кольӧм во 135 татшӧм морт кырымалӧма олӧмас быдлунъя сьӧкыдлун венӧм могысь соцконтракт.
Татшӧм ногӧн соцконтрактыс отсалӧ йӧзлы лӧсьӧдны тыр-бур олӧмлы подув.
<> Гижӧдъяссӧ дасьтісны Александра АРТЕЕВа да Павел СИМПЕЛЕВ.
Снимокъясыс ӧтуввезйысь.