Комиын льгота-кокньӧдӧн вӧдитчысьясӧс дон босьттӧг кутасны могмӧдны лекарство-препаратӧн оз сӧмын госаптекаясын, но и ылі сикт-грездса райбольничаясын да ФАП-ясын.
Кыдзи юӧртіс регионса минздравӧн веськӧдлысь Ирина Кондратьева, таво кежлӧ та могысь рӧскодсӧ артыштӧма 3,5 миллиард шайт, сы лыдын республикаса бюджетысь шуӧма видзны 3 миллиард да федеральнӧй сьӧмкудйысь – 521,3 миллион.
Кольӧм во Комиын олысьяс мынтысьтӧг босьтӧмаӧсь 1,2 миллиардысь унджык рецепт серти 3,7 миллиард шайт дон лекарство. Регионса кокньӧда ӧти рецептыс сувтӧма шӧркодя 2.808, а федеральнӧй льгота сертиыс – 3.306 шайт.
Торйӧн тӧдчанаӧн шуӧма сьӧкыда висьысь челядьӧс ас кадӧ колана лекарство-препаратӧн могмӧдны. 2025 воын такӧд йитӧдын вӧлі видзӧма 300,3 миллион шайт.
Федеральнӧй регистрӧ пыртӧм шоч, сідз шусяна орфаннӧй висьӧмӧн нёрпалысь 201 мортӧс, на лыдын 94-ыс – челядь, могмӧдӧма став колана лекарствонас, видзӧма та могысь 144,8 миллион шайт.
Таысь ӧтдор, республикаын збыльмӧдан программа серти шуӧма дон босьттӧг могмӧдны лекарствоӧн инсультысь да инфарктысь, а сідзжӧ сьӧлӧмлы мӧрччана мукӧд сьӧкыд висьӧмысь бурдӧдчысьясӧс. Таво «Продолжительная и активная жизнь» нацпроект весьтӧ та могысь урчитӧма видзны 82,3 миллион шайт, сы лыдын 78,2 миллионыс – федеральнӧй бюджетысь.
Гижӧдсӧ дасьтіс Павел СИМПЕЛЕВ.