Сыктывкарын нёльӧдысь нуӧдісны «Коми велӧдысь» конкурс. Тайӧ, ӧти-кӧ, «Чужан кыв да литература медбур велӧдысь» ставроссияса вермасьӧмын тшупӧд. Мӧд-кӧ, юркарса конкурсын вермысьыс петкӧдчӧ республикаса «Коми велӧдысь» ордйысьӧмын.
Конкурс котыртысьяс – юркарса администрацияысь велӧдан юкӧн да «Коми войтыр» ӧтмунӧмысь Сыктывкарса юкӧн.
Таво вермасьӧмӧ пырӧдчисны куим велӧдысь: 81-ӧд номера прогимназияысь Анна Петровна Иванова, 24-ӧд да 35-ӧд номера школаясысь Татьяна Васильевна Потолицына да Валерия Алексеевна Семяшкина.
Кык вежон чӧж найӧ уджъёртъяс да донъялысьяс водзын петкӧдлісны ассьыныс велӧдан сямсӧ.
«Менам вын» творчествоа визитка дырйи быдӧн висьтасис ас йывсьыс, велӧдчысьяслӧн да аслас уджын вермӧмъяс йылысь. Пасйисны, кыдзи позьӧ чужтыны вужвойтыр кыв дорӧ муслун, челядькӧд ӧтвылысь видзны-сӧвмӧдны коми кыв да культура.
«Коми кыв ме велӧда» мастер-класс быдӧн нуӧдіс аслыспӧлӧса.
Та пӧрйӧ пыртісны выль темаӧн тӧдмӧдан уджъяс, арт-технологияяс да ворсӧмъяс.
Дерт, ассьыныс сямсӧ найӧ медбура петкӧдлісны Коми национальнӧй гимназияын «Велӧдам коми кыв!» восьса урокъяс дырйи.
Конкурссӧ донъялісны «Коми войтыр» ӧтмунӧмысь Сыктывкарса юкӧнын исполкомӧ пырысьяс, юркарын конференцияса делегатъяс, коми кыв да литература велӧдысь-туялысьяс Лидия Яковлевна Зварич, Валентина Александровна Лимерова, Мария Андреевна Соколова, Марина Ивановна Жданова, Александра Васильевна Габова да Галина Ивановна Расова.
Жюрилӧн кывкӧртӧд серти таво Сыктывкарса медбур коми велӧдысьӧн лои 81-ӧд номера прогимназияысь Анна Петровна Иванова. Мӧд во сійӧ доръяс ассьыс тайӧ чинсӧ республика тшупӧдын.
Конкурсӧ пырӧдчысьясӧс, вермасьӧм котыртысь-нуӧдысьясӧс чолӧмалісны юркарса велӧдӧм сӧвмӧдан шӧринысь директор Ирина Николаевна Гузь да «Коми войтыр» ӧтмунӧмысь Сыктывкарса юкӧнӧн веськӧдлысь Алёна Николаевна Нестерова.
Козинъяс вичмӧдісны республикаса национальнӧй политика министерство да Коми йӧзӧдчан керка.
Ошкана кывъяс бӧрын вӧлі велӧдан семинар.
Кывзысьяс водзын художествоа да публицистика гижӧдын коми кывйӧн вӧдитчӧм йылысь висьтасис филология наукаса доктор, доцент Евгений Александрович Цыпанов.
Алёна Николаевна кывъясысь:
–Аттьӧала и конкурсӧ пырӧдчысьясӧс, и вермасьӧмсӧ дасьтысьясӧс коми кыв сӧвмӧдӧмысь, челядькӧд кыпыда уджалӧмысь да Коми мунымӧс нимӧдӧмысь.
Ошка мыла петкӧдчӧмысь Коми Республикаса юралысь бердын искусствояс гимназияысь «Зиль-зёль» йӧзкостса сьыланкывъяса ансамбль да сыӧн веськӧдлысь Анна Васильевна Поповаӧс.
Ансамбльыс коми, та вӧсна торъя любӧ вӧлі видзӧдны аскиа комилун нуысьяс вылӧ.
И, дерт жӧ, пӧся аттьӧала 24-ӧд да 35-ӧд номера школаясын да 81-ӧд номера прогимназияын зільысьясӧс конкурсантъяслы отсӧгысь.
Сідз, 24-ӧд номера школаын, кодӧн веськӧдлӧ Елена Фаридовна Малышева, быд во дасьтӧны конкурсӧ пырӧдчысьӧс.
Нимкодь! Коми кыв велӧдысьяслы сиа челядькӧд уджын водзӧ вермӧмъяс.
Анна Ивановалӧн висьтасьӧмысь:
–Чужи-быдми ме Кулӧмдін районса Ярашъюын. Посёлокыс ичӧт и зэв мича.
Прогимназияын коми кыв велӧда медводдза да мӧд классъясысь челядькӧд. Велӧдчысьяс рочӧсь, но сы вылӧ видзӧдтӧг быдлунъя уджын зiля ышӧдны-туйдны челядьӧс радейтны да пыдди пуктыны чужан му да коми кыв, Коми Республикаса история, висьтавны татчӧс нималана войтыр йылысь. Ӧд веськыда кӧ шуны, талун велӧдысьлӧн медшӧр могыс абу сӧмын сетны челядьлы бур тӧдӧмлун, но и быдтыны-воспитайтны найӧс чужан му да ас йӧз пыдди пуктысь войтырӧн.
Коми кывсӧ челядь зэв ёна радейтӧны. Урокъяс вылын вӧчам быдсикас удж: ворсам, сьылам, пуктам неыджыд спектакльяс, серпасасям, дасьтам небӧгъяс да презентацияяс, дасьтысям конкурсъяс кежлӧ, кӧні миян ныв-зон тшӧкыда петӧны вермысьясӧн. А ме нимкодяся налӧн зільӧм-водзмӧстчӧмӧн.
Менам вынӧй чужан коми кывйын! Ме и ачым пыр водзӧ велӧдча да пырӧдча быдсяма конкурсӧ.
Ме зэв шуда, ӧд менам эм радейтана верӧс да куим челядь: кык пи да ныв. Накӧд ми тшӧтш зілям велӧдны коми кыв. Прӧст кадӧ уяла бассейнын. Тайӧ отсалӧ меным лоны вынаджыкӧн да сюсьджыкӧн. Сідзжӧ окотапырысь пуся-пӧжася.
Ставлы сиа радейтны да пыдди пуктыны ассьыным чужан коми кыв!
<> Алёна Нестерова. Снимокъясыс «Сыктывкарса коми войтыр» котырысь.