Комиын таво шуӧма нӧшта на чорыдджыка водзсасьны грипплы паныд и медвойдӧр прививка вӧчалӧмӧн. Республикаса юралысь Сергей Гапликов тшӧктӧма кар-районса веськӧдлысьяслы аслыныс босьтны син улас, мед бурдӧдчанінъясын быдлаын тырмымӧн вӧлі та могысь вакцинаыс. А ті вӧчлывланныд жӧ гриппысь уколсӧ? Али кыдзкӧ мӧд ногӧн видзчысянныд тайӧ сьӧкыд вуджан висьӧмсьыс?
Елена СМИРНОВА, врач-иммунолог, Сыктывкар:
—Лыддя, мый гриппысь прививкаысь водзӧсыс абу да нинӧмла сійӧс вӧчны, торйӧн нин арнас, кор быдлаын «бергалӧ» уна сюрс сикас вирус. Уколасям ӧти висьӧмысь, а таысь слабмӧм иммунитет вӧсна вермас кӧвъясьны мукӧд нёрпалӧм.
Кодкӧ шуас, мый прививкасӧ позьӧ вӧчны гожӧмнас. Дерт, позьӧ, ті кӧ саридз дорын шойччанныд либӧ пӧчӧ ордад сиктын. /д укол бӧрас иммунитетлы вынсяммӧм могысь колӧ 4-6 тӧлысь. Та вӧсна гожӧмнас колӧ оз уколасьны, а гожйӧдчыны, уявны, лючки сёйны…
Михаил ПРОКУШЕВ, шопер, Инта:
—Ме зэв бура тӧда, кутшӧм мавтас колӧ кисьтны машина моторӧ да мый таысь лоӧ. Но, кыдзи и унджык йӧзыс, этша мый тӧда сійӧ либӧ мӧд прививка йывсьыс. Верстьӧ мед ачыс мӧвпалӧ, колӧ-ӧ вӧчны, шуам, гриппысь уколсӧ. Ӧд сылӧн вир-яйыс крепыд. Но кор ичӧтик кагукӧс, коді дзоньвидза, мыйлакӧ уколалӧны, ме тайӧс ог гӧгӧрво.
Сэсся и быдӧнлӧн вир-яйыс абу ӧткодь. Вермас лоны, ӧтилы лӧсялас лекарствоыс, а мӧдлы — оз.
Ирина ЧУКИЛЕВА, библиотекар, Печора:
—Шемӧсмӧдана лыдпасъяс лыдди ӧти журналысь. США-ын пӧ врачьяс пиысь гриппысь прививкасӧ аслыс вӧчӧ сӧмын 38 прӧчентыс. Оз пӧ эскыны да, мый тайӧ отсалас видзчысьны висьӧмысь. Мортсӧ пӧ доръяс сӧмын иммунитетыс. Йӧзӧс бурдӧдысьяс полӧны и сідз шусяна осложнениеысь. Кывсьыліс, мый Финляндияын порсь гриппысь вакцинация бӧрын инвалид выйӧдз воӧма 79 кага.
Мария НЕЧАЕВА, инженер, Микунь:
—Чайта, гриппысь медбур лекарствоыс — шонді. Ӧд тӧдса, мый став висьӧмыс «ловзьӧ» тӧлын, кор лунъюгыдсӧ огӧ аддзылӧй. Шонді югӧрыс «козьналӧ» миянлы «Д» витамин. Эз весьшӧрӧ водзті быд поликлиникаын ӧшавлыны плакатъяс, кӧні вӧлі серпасалӧма спортив-нӧй паськӧма нюмъялысь мужичӧйӧс, нывбабаӧс да кагаӧс, кодъяс бергӧдчӧмаӧсь шонділань. А уліас гырысь шыпасӧн гижӧма: «Шонді, сынӧд да ва миян медбур ёртъяс!». /ні на пыдди поликлиникаясын ӧшалӧны реклама сяма листовкаяс, кӧні ОРЗ-ысь да гриппысь видзчысьӧм могысь вӧзйӧны дона препаратъяс.
Наталья ЗВЕРЕВА, врач-педиатр, Ухта:
—Дерт, мырдӧн тшӧктыны вӧчны прививка оз позь. Но быд во пӧ Му шар вылын гриппысь кувсьӧ 300-500 сюрс морт. Та вӧсна быть колӧ уколасьнысӧ, мед вир-яйным бурджыка водзсасяс сьӧкыд висьӧмыслы паныд.
Юрий ОСИПОВ, врач, Эжва:
—«Сарапана радио» бура уджалӧ. Пыр и кылан, мый прививка вӧчӧм бӧрын кодкӧ висьмӧма да весиг и кувсьӧма. И унаӧн ӧтдортчӧны прививкасьыс да та понда бара мӧдім нёрпавны вунӧдӧм нин лятіӧн (корӧн), наляӧн (краснухаӧн) да мукӧд вуджан висьӧмӧн.
Талун гриппысь уколасьӧмсӧ пыртӧма национальнӧй календарнӧй планӧ. Государство тайӧс вӧчӧ сы вӧсна, мый гриппӧн висьысьӧс бурдӧднысӧ прививкаяс вӧчалӧм серти ёна донаджык.