Декабрь 21 лунӧ Коми Республикаса опера да балет театрын сигӧртісны Россия да Китай костын культура озырлунӧн юксян 2024-2025 вояс. Такӧд йитӧдын искусство радейтысьяслы козьналісны Джакомо Пуччинилысь «Турандот» опера.
Казьтыштам, тайӧ операсӧ петкӧдлісны тавося октябрын. Джакомо Пуччини сійӧс гижӧма пӧшти сё во сайын, Асыввылӧ ветлӧм бӧрын сэтчӧс культура-искусствоӧн шемӧсмӧма-ыззьӧма да. Режиссёрыс Николай Покотылдо пасйис, мый Пуччинилӧн «Турандотыс» – медся «пӧсь» да философскӧй опера. Сійӧс радейтӧны театръяс да видзӧдысь.
Операсӧ Джакомо Пуччини гижӧма Карло Гоцци серти, кодлӧн драма подулас важ Китайса миф. Сюрӧс сертиыс ставыс вӧчсьӧ Пекинын. Чорыд сьӧлӧма да скӧр принцесса Турандот (кыдз и премьера дырйи ворсіс Бурятияса народнӧй артистка Ольга Жигмитова) синнас оз вермы видзӧдны мужичӧйясӧс.
Сылӧн ки помысь кулӧны вель унаӧн. И со дас коймӧд принц Калафлы (ворсіс Борис Калашников) мусмис Турандот. Принцлӧн олӧмыс тшӧтш сунис йылын. Но Калаф вермӧ небзьӧдны сьӧлӧмсӧ Турандотлысь, да помас ӧтлаасьӧны.
Кыдзи пасйылі нин, Джакомо Пуччинилысь «Турандот» операсӧ миян театр сиис Россия да Китай костын культура озырлунӧн юксян вояслы, да та вӧсна шӧр рольясын куим министрӧс ворсісны Китайысь артистъяс, кодъяс ӧні велӧдчӧны Санкт-Петербургса консерваторияын: Цзянлун Ли, Цзыцян Лю да Цзячэн Вэй. Октябрся премьера дырйи найӧ тшӧтш петкӧдчисны миян артистъяскӧд.
Содтӧд на та пӧрйӧ «Турандот» операын дирижёраліс «Русская симфония» филармонияса оркестрысь главнӧй дирижёр, Тяньцзинса опера театрысь дирижёр да сэтчӧс консерваторияын велӧдысь Янь Цзянань.
–Чайта, миян артмис зэв яръюгыда сигӧртны Россия да Китай костын культура да искусство озырлунӧн юксян вояс. Содтӧд на тайӧ ёртасьӧмыс сетас позянлун и водзӧ ӧтув зільны-уджавны, – пасйис Коми Республикаса опера да балет театрӧн веськӧдлысь Алексей Садовский.
<> Екатерина МАКАРОВА.
Снимокъясыс Коми Республикаса опера да балет театрысь.