«Олам Комиын – лыддьысям комиӧн!» – татшӧм ышӧдана кывъясӧн Коми йӧзӧдчан керка котыртлӧ республикаын олысьяскӧд аддзысьлӧмъяс. Журналистъяс тшӧкыда ветлӧны сикт-грездӧ тӧдмасьны сэтчӧс войтыркӧд, висьтавны ас петасъяс йылысь, корсьны газетӧ выль геройясӧс да журналъясӧ – гижысь-серпасалысьясӧс. Коми петасъяс йылысь асланыс мӧвпъясӧн юксьӧны и найӧс лыддьысьяс.
Кольӧм вежонӧ регионса национальнӧй политика министерство отсӧгӧн татшӧм шоныд ад-дзысьлӧмыс вӧлі Кӧрткерӧсын чужан му туялан музейын. Кык час юргис сэні сьӧлӧмлы муса коми кыв.
Видзӧдысьясӧс да журналистъясӧс чолӧмалісны музейӧн веськӧдлысь Елена Станкевская, Кӧрткерӧс районын «Коми войтыр» ӧтмунӧмӧн юрнуӧдысь Игорь Кирушев да сэтчӧс землячествоӧн веськӧдлысь Надежда Быковская.
Коми йӧзӧдчан керкаса выльторъясӧн юксисны холдингса директор Галина Макарова да челядьлы «Би кинь» журналса шӧр редактор Алёна Нестерова. Аддзысьлӧмӧ пырӧдчысьяс тӧдмалісны «Коми му» газет да «Войвыв кодзув», «Чушканзі», «Йӧлӧга», «Би кинь» журналъяслӧн история да талунъя лун йылысь, сюся кывзісны, петасъяс дасьтігӧн кутшӧм аслыспӧлӧс лоӧмторъяс овлӧны.
Кӧрткерӧсса музей котырын уджалысьяс:
–Коми петасъяс йылысь Галина Валерьяновналӧн да Алёна Николаевналӧн висьтасьӧмыс йиджтысьӧма чужан му, асланыс удж дорӧ муслунӧн. Аддзысьлӧмыс муніс сьӧлӧмсянь да шоныда. Видзӧдысьяс окотапырысь кывзісны Коми йӧзӧдчан керкаысь гӧсьтъясӧс, сеталісны юалӧмъяс да юксисны асланыс видзӧдласӧн.
И ставыс ӧтсӧгласӧн шуисны мӧд во бара аддзысьлыны, унджык йӧзӧн нин, чукӧртлыны тшӧтш и томуловӧс. Ӧд ставнымӧс ӧтувтӧ чужан коми кыв дорӧ муслун.
Аддзысьлӧм дырйи журналистъяс висьтасисны и газет-журнал вылӧ гижӧдчыны позянлун йылысь. Тайӧс позьӧ вӧчны пошта юкӧнын либӧ ӧтуввез пыр «Россияса пошта» сайтын гортсянь. Гоз-мӧд морт пыр жӧ видліс гижӧдчыны.
Любовь Лодыгина, аддзысьлӧм вылас волысь:
–Талун волісны муса коми газет-журналӧн веськӧдлысьяс. Найӧ сэтшӧм кыпыда висьталісны асланыс петасъяс йылысь. Тӧдчис, сьӧлӧмас йиджӧма коми кыв дорӧ муслун. Ме сюся видзӧді и найӧс кывзысьяс вылӧ да казялі, кутшӧма ӧзйис налӧн синмыс, кыдзи радпырысь босьталісны гортаныс петасъяссӧ.
Ачым аддзысьлӧм бӧрас пыр жӧ котӧрті поштаӧ да гижӧдчи став коми газет-журнал вылас и, дерт жӧ, ас районса «Звезда» судзӧді. Ме гӧрдитча, мый миян республикаын эмӧсь татшӧм вылыс тшупӧда газет-журнал да ыджыд сяма журналистъяс.
* * *
Аддзысьлӧмыс помасис Коми йӧзӧдчан керкасянь викторинаӧн. Видзӧдысьяс окотапырысь сигӧртісны гӧсьтъяслысь висьталанторсӧ. Медуна вочакывйысь вичмис козин – коми календар. Вӧзъям «Коми му» лыддьысьяслы тшӧтш вочавидзны юалӧмъяс вылас.
1.1918 воын петіс медводдза коми газет. Кыдзи сійӧ шусис?
2.Кутшӧм юбилей пасйӧ «Войвыв кодзув» журнал 2026 воын?
3.Газетыд рӧмпӧштан: тыдалӧ сэтысь
Мувывса олӧмыс.
Газетыд юӧртысь, бур мывкыд сетысь,
Оланног нуӧдысь.
Газетыд велӧдысь, морттуйӧ воштысь,
Синъястӧ восьталысь.
Лёк олӧм дивитысь, бур олӧм ошкысь,
Веськыда висьталысь…
Кутшӧм нималана гижысьлӧн кывбурысь тайӧ юкӧныс? Тайӧ гижысьыс пуктіс коми газет сӧвмӧмӧ ыджыд пай да уджаліс «Югыд туй» газетын редакторӧн.
4.Кымын да кутшӧм газет-журнал лэдзӧ Коми йӧзӧдчан керка?
5.1957 воын «Югыд туй» газетлӧн чужис шмонитны радейтысь пи. Кутшӧм ним сылы сетісны?
6.Коді вӧлі «Би кинь» журналса медводдза редакторӧн?
7.Коми Республикаса кутшӧм нималана сьылысь ас кадӧ уджавліс «Йӧлӧга» сэки газетын на?
8.Кутшӧм конкурс нуӧдӧ «Войвыв кодзув» журнал лыддьысьысьяслы? А «Войвыв кодзулӧ» гижысьяслы?
9.«Би кинь» журналса кутшӧм рубрикаын йӧзӧдӧны енбиа челядь йылысь юӧр?
10.Тайӧ лавкаас став туйыс вайӧдӧ коми небӧг да газет-журнал радейтысьясӧс.
Вочакывъяс: 1.«Зырянская жизнь». 2.100 вося юбилей. 3.Виктор Савин. 4.Вит петас: «Коми му» газет, «Чушканзі», «Йӧлӧга», «Би кинь» да «Войвыв кодзув» журналъяс. 5.«Чушканзі». 6.Николай Белых. 7.Лидия Логинова. 8.«Видза, «Войвыв кодзув»!», «Эзысь борд». 9.«Коми кодзув». 10.«Ордым» лавка.
<> Алёна Нестерова. Снимокъясыс Кӧрткерӧсса музей котырысь.