Сыктывкарӧ детсадйын чужан кыв велӧдӧмлы сиӧм ставроссияса конференция вылӧ волісны странаса 13 регионысь педагогъяс, учёнӧйяс, общественнӧй котыръясын зільысьяс.
Комиын ӧтсӧгласӧн олӧ 120 кывйӧн сёрнитысь войтыр, коми да роч кывъяс шуӧма государственнӧйӧн, и республикаса правительстволӧн национальнӧй политикаын вужвойтырлысь кыв видзӧм-сӧвмӧдӧмыс лоӧ тӧдчана могӧн.
–Комиын посни челядь ас культураӧн да кывйӧн тӧдмасьны заводитӧны семьяаныс, водзӧ сибӧдчӧны сы дорӧ детсадйын, школаын да весиг колледжын.
Детсадйын чужан кывйӧн, ас мулӧн историяӧн да вужвойтырлӧн культураӧн тӧдмасьӧны 14 сюрс нывка да детинка, школаын – 73 сюрсысь унджык ныв-зон.
Ыджыд сяма да енбиа педагогъяс отсӧгӧн найӧ восьтӧны чужан мулӧн историяысь выль лист бокъяс, окотапырысь велӧдӧны коми кыв, – висьталіс чукӧртчылӧм дырйи регионса правительствоӧн веськӧдлысьӧс вежысь Наталья Якимова.
Йӧзӧс велӧдан министерствоӧн веськӧдлысьӧс вежысь Олег Холопов пасйис, челядьлӧн пӧ эм позянлун велӧдны комисӧ кыдзи чужан либӧ каналан кыв.
Сійӧ тӧдмӧдіс конференция вылӧ воысьясӧс, кутшӧм ногӧн зонпосниӧс ышӧдӧны велӧдны вужвойтыр кывсӧ.
Быд во куим сюрсысь унджык ныв-зон пырӧдчӧ коми кывйысь, литератураысь республикаса конкурсъясӧ, олимпиадаясӧ, петкӧдлӧ чужан му да фольклор туялӧмын ассьыс тӧдӧмлун.
Вермысьяссӧ пасйӧны сьӧма премияӧн, дон босьттӧг сетӧны шойччан лагерӧ путёвка, а медся буръясыслы вичмӧны Питирим Сорокин нима Сыктывкарса университетӧ пырӧм могысь содтӧд баллъяс.
Воысь-во ӧкмысӧд класс помалысьяс пӧвстысь куимсё гӧгӧр ныв-зон бӧрйӧ коми кывйысь да литератураысь экзамен, и 80 прӧчентыс сдайтӧ сійӧс «4» да «5» вылӧ.
Воспитательяс да учительяс пыртӧны велӧданногӧ ӧнія кадлы лӧсялана технологияяс, тӧдмӧдӧны челядьӧс, кыдзи вӧдитчыны электроннӧй кывкудйӧн, онлайн-библиотекаӧн.
–Ми видзам кывнымӧс, историянымӧс, ассьыным традицияяс, культура да вуджӧдам найӧс быдмысь войтырлы, – пасйис Олег Холопов. – Буретш этнокультура велӧдӧмыс чужтӧ да сӧвмӧдӧ челядьын ас мулӧн, ас страналӧн аскиа лун вӧсна кывкутӧмсӧ. <>
Павел АНОХИН.