Коми Республикаса вужвойтырлӧн шылада-драмаа театр дасьтӧ Россияса искусствоясын заслуженнӧй деятель, Коми Республикаса народнӧй артистка, Коми Республикаса правительстволӧн премияа лауреат Светлана Горчаковалӧн пьеса серти «Мамлӧн сьылан» драма, кодӧс петкӧдласны ноябрь 27-28 лунъясӧ.
Режиссёрыс ачыс Светлана Горчакова.
Кыдзи висьталісны театрын, Комиын медводдзаысь театр сценасянь петкӧдласны торъя военнӧй операция йылысь постановка. Светлана Гениевна «Мамлӧн сьылан» пьесаӧн пырӧдчӧма РФ-са культура министерстволӧн да «Русские сезоны» АНО-лӧн ставроссияса ӧнія драматургъяслӧн конкурсӧ да лоӧма вермысьяс лыдын.
—Миян пиысь быдӧн венӧ став сьӧкыдлунсӧ асланым тыр-бура олӧм да миян челядьлӧн шуд вӧсна.
Тайӧ спектакльыс ӧнія том поколение йылысь. Подвиг йылысь, кодӧс аддзӧ быдӧн, а сідзжӧ тыдавтӧм подвиг йылысь, кодӧс казялӧны сӧмын матыссаяс. Аньлӧн помтӧм муслун, эскӧм да терпенньӧ, нывбаба шуд да лача йылысь.
Пьесаыс мамъяс йылысь, кодъяслӧн пияныс мунісны тыш вылӧ. Айму дорйысь геройяс йылысь. Радейтчӧм вын йылысь, кодӧс некод да нинӧм оз вермы жугӧдны, – висьталӧ Светлана Гениевна.
Медым пыдісяньджык гӧгӧрвоны «тыш кӧрсӧ» да стӧча петкӧдлыны геройяслысь сьӧлӧмкылӧмъясссӧ, «мамлӧн сьылан» спектакль дасьтысьяс да артистъяс аддзысьлісны Коми Республикаса Общественнӧй палатаӧ пырысь, «Знание» ставроссияса котырысь лектор, Сыктывдін районысь Выльгортса 2-ӧд номера шӧр школаын кадет ӧтмунӧмӧн юрнуӧдысь, Афганистанса, Чечняын 1-ӧд да 2-ӧд войнаса ветеран, спецоперация вылӧ ветлысь Анатолий Александрович Козловкӧд.
Анатолий Александрович юксис аслас сьӧлӧмкылӧмъясӧн, висьталіс, кутшӧм тӧдчана кыпӧдны лов да не усьны сьӧлӧмӧн, весиг кор зэв сьӧкыд, а сідзжӧ кыдзи отсалӧ таын салдатъяслӧн ёрта-сьӧмыс да ӧта-мӧдыслы колана здукӧ отсӧг сетӧмыс.
Висьталіс торъя военнӧй операцияын тыш-кось нуӧданног да передӧвӧйын олӧм йылысь, казьтыштіс ассьыс ёртъяссӧ.
Тайӧ паныдасьлӧмыс отсалас видзӧдысьяслы аддзыны сцена вылысь оз прӧстӧ актёръяслысь ворсӧмсӧ, а повтӧмлунлысь да морт сямлунлысь збыль петкӧдчӧмсӧ.
«Берегиня» ресурс шӧринбердса «Неравнодушные сердца» волонтёр котыр ордын артистъяс да художествоа юкӧнын уджалысьяс велӧдчисны кыны маскируйтчан тыв.
Тыш нуӧданінын татшӧм тывъясыс зэв коланаӧсь, на отсӧгӧн саймовтӧны техника, оборудование да асьнысӧ салдатъясӧс.
Тыв кыанногсӧ велӧдӧмыс отсалӧ актёръяслы да декораторъяслы пыдісяньджык пырӧдчыны тылсянь отсӧг сетан удж руӧ, а асьныс вӧчӧмторъясыс лоасны спектакльын декорациялӧн тӧдчана юкӧнӧн.
«Мамлӧн сьылан» драма-спектакльыс мунӧ 1 час 10 минут.
Петкӧдчӧны сэні театрса став артистыс. Шӧр рольясын – Коми Республикаса народнӧй артистка Валентина Соколова, артистъяс Никита Дербин, Анастасия Казакова, Дарья Рябцева, Роман Поличенко.
Сцена вывсӧ серпасаліс Коми Республикаса заслуженнӧй уджалысь Эрих Вильсон, паськӧмсӧ – Коми Республикаса правительстволӧн премияа лауреат Елена Кривоклуб.
Шылад гижысьыс – Коми Республикаса народнӧй артист, Коми Республикаса правительстволӧн премияа лауреат Александр Горчаков.
Театрӧн веськӧдлысь, Россия Федерацияын культураса да Коми Республикаса заслуженнӧй уджалысь Валентина Судакова юксис сьӧлӧмкылӧмнас:
–Петкӧдчӧмыс, тӧдӧмысь, лоас регионса культураын тӧдчана лоӧмторйӧн, йиджас видзӧдысьяс сьӧлӧмӧ.
<> Евгения Савина. Снимокъясыс Коми Республикаса вужвойтырлӧн шылада-драмаа театрысь.