Кулӧмдінын кыпыда юргис ӧнія коми сьыланкывлӧн «Василёк-2025» XII фестиваль-конкурс.
Районса культура керка сцена вылын петкӧдчисны Удора, Сыктывдін, Кулӧмдін районъясысь, а сідзжӧ Сыктывкарысь енбиа челядьлӧн творчествоа котыръяс да сьылысьяс.
«Василёк» фестиваль дырйи видзӧдысьлы дасьтӧны театрализуйтӧм петкӧдчӧм. Татшӧм ногӧн быттьӧ мойдӧ веськалан да аслыспӧлӧса тӧдмасян челядьлы выль сьыланкывъясӧн. Со и тавося гаж дырйиыс медшӧр герой Василёклы ковмӧма видзӧдысьяссянь отсӧг, воштӧма ассьыс став майтӧга быг-больксӧ да. Но ӧтлаын вермисны аддзыны, и фестиваль помын ставнысӧ нимко-дьӧдісны быгъя шоуӧн.
Колӧ пасйыны, таво «Василёк» фестиваль вылӧ артистъяссянь воӧма 17 шыӧдчӧм. Жюри донъяліс челядьлы бӧръя куим воӧ лӧсьӧдӧм медбур коми сьыланкывъяс. Буретш найӧ и юргисны фестивальса гала-концерт дырйи. Коми композитор-поэтъяс гижӧмаӧсь чужан му дорӧ муслун, войвывса мича вӧр-ва, челядьлы матысса да муса пӧль-пӧч йылысь.
Дерт, жюрилы эз вӧв кокни бӧрйыны медбуръяссӧ, быд петкӧдчӧм аслыспӧлӧса сьӧлӧмӧ йиджис да. Та понда быд нимпасын шуисны вермысьсӧ. А «Медбур сьыланкыв» Гран-при шедӧдіс Усогорскысь челядьлы творчествоа керкаысь «Фортуна» котыр. Видзӧдысьяссянь торъя приз вичмис Пожӧгса культура керкаысь том сьылысь Карина Сенькиналы.
«Василёк» республикаса фестиваль-конкурссӧ и збыльысь позьӧ шуны ичӧтдырлы да коми сьыланкывлы сиӧм кыпыд гажӧн. Тані сцена вылын чужӧны выль кодзувъяс, кодъяс асланыс петкӧдчӧмӧн нимкодьӧдӧ- ны видзӧдысьӧс да нимӧдӧны ассьыныс чужан му да коми кыв.
<> Гижӧдсӧ дасьтіс Екатерина МИКУШЕВА. Снимокъясыс ӧтуввезйысь.