Коми сьыланкывъя культура видзӧм-сӧвмӧдӧмӧ донъявны позьтӧм пай пуктіс Василий Григорьевич Лодыгин. Сылӧн кывбуръяс вылӧ гижӧма куимсёысь унджык сьыланкыв, на пиысь уналы шыладсӧ ачыс жӧ лӧсьӧдіс.
Василий Григорьевичӧс казьтылӧмӧн Кулӧмдін районса Габов грездын котыртлісны праздник да субӧтник. А луныс пансис шойна вылын. Поэт гу дорын отеч Феодосий лыддис кулӧма кузя кевмысьӧм.
А сэсся Василий Лодыгинлӧн сьыланкывъяс улӧ ставӧн босьтчисны вӧчны ва труба дорӧ пос, дзоньтавны часовня-памятник дорӧ туй. Сэккості пузис да аслас шыӧн волонтёръясӧс гажӧдіс и 50 литра самӧвар.
Габов грездын субӧтник бӧрас Сергей Таскаев кыпыд ловруӧн воис Сыктывкарӧ да заводитіс дасьтыны поэтлы сиӧм «Коми йӧзлы колӧны сьыланкывъяс» небӧг. Мортыд ӧд сёйны быд лун кӧсйӧ, а колӧ-ӧ сылы сьыланыс? «Колӧ!» – зільӧ висьтавны тайӧ книганас автор.
1993 воӧ куим Василей – Василий Григорьевич Лодыгин, Василий Яковлевич Гущин да Василий Николаевич Чувьюров – мӧвпыштісны котыртны коми сьыланкывъя фестиваль. Комы- нысь унджык во нин «Василей» гаж юргӧ Комиын да лоис йӧзлӧн радейтана праздникӧн. Василий Григорьевич шулывліс, фестивальыс пӧ менам олӧмын медся ыджыд вӧчӧмторйыс, вермӧмыс.
Куимысь унджык во нин гижысь абу миянкӧд. Габов грездӧ волывлӧны найӧ, кодъяс кӧсйӧны видзӧдлыны, кӧні быдмӧма да и верстьӧ олӧмас нин уна кад коллявлӧма Василий Лодыгин.
Дас во сайын грездас вӧлі кыпӧдӧма Вежа Георгий часовня – Габовысь фронт вылын тышкасьысьяслы да усьӧмаяслы памятник. Поэт бура тӧдліс на пиысь унаӧс, тшӧтш налысь рӧдвужсӧ, и налы сиис 2015 воын йӧзӧдлӧм «Габовсаяс» небӧгсӧ.
А 2027 воӧ габовсаяс вочааласны гӧсьтъясӧс, кодъяс воасны сэтчӧ пасйыны Василий Григорьевич Лодыгин чужӧмсянь 80 во.
Грездыс ловзьӧ, унатор бурланьӧ вежсьӧ. 2021 вося январын тані писькӧдісны скважина, и йӧзыслы оз нин ков лэччывны ваысла ю дорӧ. Габовын олысьяс бурас лачаӧн водзӧ олӧны. А сідзкӧ, позьӧ и сьывны!
Сьыланкывйын олӧ коми мортлӧн лолыс, чужан кывйыс, шуда аскиа лунӧ эскӧмыс. И сьыланкыв жӧ отсалӧ миянлы бурджык олӧм лӧсьӧдны челядьлы да ставнас Коми мулы!
<> Сергей Владимиров. Снимокъясыс авторлӧн гортса архивысь.