Ноябрь 1 лунӧ Коми Республикаса войтырлӧн ёртасян керкаын воссис «Мамлӧн ордым. Батьлӧн туй» выставка. Бать лунлы (октябрь 19 лун) да Мам лунлы (ноябрь 30 лун) сиӧм тайӧ уджтасас пырӧдчисны Сыктывкарысь, Изьва, Чилимдін да Емдін районъясысь кӧкъямыс семья. Асланыс рӧд-котырлы тӧдчана да дона важся фотоснимокъяс, медальяс, национальнӧй паськӧм, быдсикас дозмук, горт овмӧсын вӧдитчан уна мукӧд эмбур пыр петкӧдчӧ матыссаяслы да рӧдвужлы кӧленаысь кӧленаӧ йиджан муслуныс, ӧта-мӧдӧс пыдди пуктӧмыс да нэмӧвӧйся крепыд вужъясӧн гӧрдитчӧмыс.
Выставкасӧ кыпыда восьтігӧн чукӧртчылісны юркарын олысьяс да налӧн гӧсьтъяс, регионса национально-культурнӧй общественнӧй котыръясын водзмӧстчысьяс, Воркутаысь «Шудаӧсь ӧтлаын» войтыркостса фестиваль-конкурсын петкӧдчысьяс.
Регионса миннацысь отделӧн веськӧдлысь Олег Елфимов на дорӧ чолӧмалана кывйӧн шыӧдчигӧн пасйис, мый быдӧнлӧн олӧмыс йитчӧма семьякӧд.
И буретш семьяса традицияясыс отсалӧны мортыслы гӧгӧрвоны, олӧмас мый медтӧдчанаыс сылы, мед лоны шудаӧн.
Ёртасян керкаса директорӧс вежысь Лилия Чупрына висьталіс, мый выставка вылас комияслӧн, казакъяслӧн, чувашъяслӧн да украинечьяслӧн горт овмӧсын вӧдитчан эмбурыс да налы мукӧд тӧдчанаторйыс ясыда петкӧдлӧ быд семьялысь аслыспӧлӧс оланногсӧ да обычайяссӧ.
Вӧлі мый висьтавны такӧд йитӧдын и выставкаас пырӧдчысьяслы. Сідз, «Русь Печорская» ӧтмунӧмысь Сыктывкарса юкӧнӧн веськӧдлысь Александра Чупрова юксис ичӧтик кӧрт сундуккӧд йитчӧм казьтылӧмъясӧн.
Тайӧ куднас вӧдитчылӧма сылӧн прабабыс на. А сэсся мамыс нин видзӧма сэні паськӧм вурӧм бӧрын кольӧм дӧраторъяс.
Александра ичӧтдырйиыс перйӧма сэтысь да вундалӧма медыджыд дӧраторсӧ, мед аканьыслы платтьӧ вурны. Мамыс таысь абу видӧма, шуӧма, ковмас пӧ, сідзкӧ, и тэныд тайӧ куднас вӧдитчыны. И ӧні Александра ачыс вурӧ национальнӧй паськӧмсӧ да дӧратор колясъяссӧ видзӧ буретш тайӧ сундукас.
Нӧшта ӧти экспонат – национальнӧй узор-сера платтьӧ – йылысь висьталіс юркарын украинеч национально-культурнӧй автономияын водзмӧстчысь Вера Бондарук.
Мамыс сылӧн коркӧ Ленинградса аэропортын казялӧма зэв мича нылӧс. Тӧдмасьӧмаӧсь. И сэтшӧм окота лоӧма Вералӧн мамыслы, мед нылыс лоис сылӧн моньӧн. Кутӧмаӧсь письмӧасьны. И Люда, тадзи шуӧмаӧсь нывсӧ, локтӧма Украинаысь, кӧні олӧ вӧлӧм, Сыктывкарӧ. И петӧма Вералӧн вок сайӧ. А мамыс козьналӧма Людалы приданнӧй пыдди национальнӧй серъясӧн мичмӧдӧм платтьӧ.
Ӧти кывйӧн, выставкаас став экспонатыс йитчӧма сійӧ либӧ мӧд семьялӧн уна сё восайся традицияясӧн да обычайясӧн.
<> Елена Осипова. Снимокъясыс ӧтуввезйысь.