Санкт-Петербургысь артистъяс снимайтчӧмаӧсь Коми Республикаса народнӧй гижысь Алексей Поповлӧн висьт серти «Дядя Степан» короткометражнӧй киноын.
Режиссёрыс да сценаристыс – гижысьлӧн нылыс Анастасия Попова. «Дядя Степан» киносӧ видзӧдны позьӧ ӧтуввезйысь.
Анастасия Попова тшӧкыда вуджӧдӧ роч кывйӧ батьыслысь висьтъяссӧ. И кор сійӧ босьтчӧма вуджӧдны «Кыдзи кутам водзӧ овны» висьт, быттьӧ пӧ кино видзӧдны куті.
Вежӧрас мыччысьӧмаӧсь серпасъяс. И аддзӧма весиг артистъяссӧ, кодъяс вермасны снимайтчыны тайӧ киноас.
Ворсӧны сэні Санкт-Петербургса «Кот» театрысь да СПбГУ театр-студияысь артистъяс.
Шӧр рольсӧ – Степан дядьӧс – ворсӧ Дмитрий Васюков. А детинкаӧс (котыртлӧмаӧсь кастинг) – 12 арӧса Савелий Баранов.
Анастасиялӧн кывъяс серти, Савелий зэв бура сяммис петкӧдлыны шог сьӧлӧмкылӧмъяс: сюжет серти 9 арӧса Дималӧн кувсьӧ суседыс. Кӧть Степан дядь и юышталӧма, но вӧлӧма зэв шань да киподтуя морт.
–Збыльвылас вӧлі татшӧм мортыс миян Ыджыдвиддзын, стӧчджыка кӧ, Макарсиктын, – висьталӧ Алексей Вячеславович. – Вась Максим. И сылӧн кувсьӧм бӧрын ме ачым сы вӧсна шогалі.
–Алексей Вячеславович, тайӧ тіян гижӧд серти медводдза кино?
–Рочнас дзик медводдза. Комиӧн «Коми горын» дасьтылісны Йӧрш Вась йылысь «Олӧм войтъяс» быдса цикл. Вӧлі петкӧдлӧны выльвося каникул дырйи, ӧні дугдісны.
Алексей Поповлӧн гижӧдъясын, чайта да, быдӧн аддзӧ тӧдсасӧ, суседсӧ, рӧдвужсӧ. И тайӧ киносӧ видзӧдӧм бӧрын Ыджыдвиддзын олысьяс висьтасисны сідз. Шуам, енбиа велӧдысь (ӧні пенсия вылын нин) Ольга Ивановна Мишарина гижӧма, менам пӧ тшӧтш вӧлі татшӧм киподтуя да шань сусед, коді неважӧн кувсис. И сиктсаяс пӧ сійӧс ас ногыс шулывлӧмаӧсь Бур-бур. Школаын коми кыв велӧдысь Эльвира Александровна Старцева пасйӧма, мый тайӧ киносӧ позьӧ весиг класснӧй час дырйи челядькӧд видзӧдны, сьӧлӧм вӧрзьӧдана да мӧвпалана да.
Кыдзи пасйылі нин, сюрӧсас шог лоӧмтор: кувсьӧ сиктса морт. И тайӧ зэв ёна чепӧльтӧ сиктсалысь сьӧлӧмнысӧ. Тшӧтш и 9 арӧса детинкалысь. Вӧвлӧма быттьӧ тайӧ кольӧм нэмся 1980-ӧд воясӧ. И Анастасия Поповалы, кыдзи ачыс тшӧтш пасйӧ, мойвиӧма аддзыны и сэк кадся пась-кӧм-эмбур. Снимайтӧмаӧсь киносӧ Ленинград обласьтса важ дачаын.
–Ме корси керкасӧ ӧтуввез пыр. Медшӧр корӧмыс вӧлі, мед эськӧ абу на вӧчӧмаӧсь евроремонт. Гижа вӧлі йӧзыслы, мися, кӧсъям кино снимайтны, лэдзанныд онӧ керкаад? И ӧд йӧзыс кӧсйысисны. Весиг тешкодьтор вӧлі. Кино снимайтӧм ради пӧ важ керкасӧ сотны лэдзам. Но, мися, тайӧ миянлы оз ков, – казьтылӧ Анастасия.
1980-ӧд воясся паськӧмсӧ корсьӧмаӧсь «блошинӧй» базарысь. Видзӧдалӧмаӧсь, лӧсялӧны-ӧ важ снимокъяс серти. Торъя нин челядьӧс кыдзи пасьтӧдны. Сэк кадӧ ӧд томуловыд вӧліны пионеръясӧн.
Тӧдчанаин босьтӧ киноас и важся радио. Сы пыр юрган шылад тшӧтш жӧ вуджӧдӧ видзӧдысьӧс Сӧвет кадӧ.
* * *
Анастасия Поповалӧн кыдз режиссёр-сценаристлӧн тайӧ медводдза удж. Сылы отсасьӧма режиссёр Дарья Горшкова. Анастасия пасйис, чайта пӧ, уджыс артмис. Медтӧдчана вӧлӧма вӧчны батьыслы юбилей кежлӧ козин. Пасъям, Алексей Поповлы таво июль 25 лунӧ тырис 75 арӧс.
«Дядя Степан» киносӧ октябрь помын петкӧдлісны Сыктывкарса библиотекаясын, Сыктывдін районса Э.А.Налимова нима музейын, гижысьлӧн чужан Ыджыдвидз сиктын. Петкӧдласны и Санкт-Петербургын «Кот» театрын.
<> Екатерина МАКАРОВА. Снимокъясыс ӧтуввезйысь.