Кык сюрс кызь витӧд воыс Россияын – Чужан му дорйысь во. Миян ыджыд да паськыд страна вылӧ нэмъяс чӧж зыртчывлiсны суйӧрсайса вӧрӧгъяс, дульныс петлiс мича да озыр Чужан муным вылӧ да. Но пыр вӧлi и ӧні эм кодлы дорйыны Аймунымӧс. Быд семьяын эм сэтшӧм морт, кодӧс позьӧ вайӧдны пример пыдди да помтӧг гӧрдитчыны сыӧн.
Талун Украинаын мунӧ вир кисьтана кось. Куим воысь дырджык нин тышкасьӧны неонацистъяслы паныд миян салдатъяс. Верӧсъяс, батьяс, вокъяс, пиян вӧсна кевмысьӧны матыссаясыс да рӧдвужыс, мед пасьвартасны вӧрӧгӧс да дзоньвидзаӧн бергӧдчасны гортаныс.
Миян семьяысь ӧнi СВО вылынӧсь менам кык чож (збыльвылас, абу мамлӧн, а батьлӧн ичӧт-джык вокъяс, но дзолясянь шуам найӧс чожъясӧн да, сiдз быттьӧ и колӧ). Максим чож куим во да джын нин дорйӧ Чужан мунымӧс. Ӧнi служитӧ Часов Яр дорын, ыджыд чина нин, офицер.
Федя чож кольӧм гожӧмнас дорйис Днепр вывса Нестрига дi, да сэксянь абу сыкӧд йитӧдыс. Но ми ёна надейтчам, мый Федя чож ловъя. Виччысям чожъясӧс гортӧ дзоньвидзаӧн.
Пӧльӧс, Иван Валерьянович Кармановӧс, сiдзжӧ позьӧ шуны геройӧн. Томдырйиыс сійӧ воюйтлiс Афганистанын, сэсся куимысь ветлiс Чернобыльӧ. Помӧсдiнын сiйӧс тӧдӧны Афган Ваньӧн. А кор заводитчис спецоперация, эз кут пукавны гортас, ас вӧлясьыс мунiс СВО вылӧ. Кӧть абу нин том, эз повзьы. И позывнӧйыс бара жӧ вӧлi «Афган». Тышкасис «Барс» подразделениеын.
Во сайын бӧр локтiс гортас. Мед сэсся некытчӧ нин сійӧ оз мун: война вылад олӧма йӧзыдлы нӧшта нин сьӧкыд. Ме гӧрдитча аслам пӧльӧн, сійӧ миян герой.
Эска, Чужан мунымӧс некор некод оз вермы сувтӧдны пидзӧс вылӧ. Миян эмӧсь йӧзыс, кодъяс оз повзьыны кисьтны Айму вӧсна ассьыныс вирсӧ. Россияса медбур пияныс – Чужан му дорйысьяс. Войнаыс регыд помасяс, и миян геройяс локтасны гортаныс, да заводитчас шуда олӧм. <>
Светослав Уляшев.
Помӧсдін сикт, Кулӧмдін р.