Октябрь 9 лунӧ Коми Республикаса филармония кыпыд концертӧн восьтіс ассьыс 86-ӧд сезон, кӧні петкӧдчисны творческӧй котыръяс да солистъяс.
Кыдзи висьталіс сезон восьтӧм водзын журналистъяскӧд аддзысьлігӧн филармонияӧн веськӧдлысь Мария Балмастова, артистъяс дасьтӧны шылада искусство радейтысьяслы вель уна кыпыд рыт.
Медся тӧдчанаясысь ӧти – «Танцуй и пой, Великая Россия» фестиваль, кодӧс панісны нин «Асъя кыа» ансамбльлӧн «Ас му» концертӧн сентябрь 18 лунӧ.
Тайӧ во помӧдз фестивалькӧд йитӧдын петкӧдчасны мир пасьталаын нималана Н.С.Надеждина нима «Берёзка» ансамбль, Оренбургса народнӧй хор, Рязаньысь Е.Попов нима народнӧй хор. Сигӧртас фестивальсӧ «Асъя кыа» ансамбль «Легенды Коми края» петкӧдчӧмӧн.
Нӧшта ӧти тӧдчанатор – Аркадий Гайдар серти «Мальчиш-Кибальчиш» патриотическӧй мюзикл. Режиссёрыс – Воркутаысь Андрей Зарянко, сцена вывсӧ серпасалӧ Эрих Вильсон, балетмейстерыс – Дмитрий Бушуев.
–Чайтам, тайӧ мюзиклсӧ лоӧ интереснӧ видзӧдны и верстьӧлы, и челядьлы, – висьталіс «Асъя кыаын» художествоа веськӧдлысь Александр Титаренко. – Унаӧн весиг оз и тӧдны тайӧ геройсӧ да, миян мог – тӧдмӧдны видзӧдысьӧс Мальчиш-Кибальчишкӧд. Ме сійӧс помнита школасянь. Окота, мед эськӧ миянлысь история вӧлі петкӧдлӧма и тайӧ постановка пырыс. Дерт, Аркадий Гайдарлысь «Сказка о Военной тайне, о Мальчише-Кибальчише и его твёрдом слове» гижӧдсӧ абу кокньыд петкӧдны артистъяслы ӧнія сцена вылӧ. Но ми босьтчим, и вӧчам тайӧс. Сцена вылын лоас и хор, и балет, и оркестр ворсас. Юргасны Муслим Магомаевлӧн репертуарысь сьыланкывъяс, «Неуловимые мстители» киноысь шылад, кодӧс вуджӧдім ӧнія форматӧ.
Сідзжӧ филармонияысь артистъяс выльвося каникул дырйи петкӧдласны челядьлы «Как волк не съел козлят» шылада мойд, «Приключения Красной Шапочки» да «Мороз Иванович» мюзиклъяс.
Тайӧ сезонӧ кутас юбилеясьны и «Зарни ёль» ансамбль. Локтан вося ноябрь 7 лунӧ сійӧ кыпыд концертӧн пасъяс 30 во тырӧм. «Зарни ёльын» художествоа веськӧдлысь Сергей Гусев висьталіс, мый ансамблькӧд петкӧдчас сэтчӧс став солистыс. Содтӧд на и меломанъясӧс чуймӧдасны «экзотика» инструментӧн – бандонеонӧн.
–Комиын тайӧ шылада инструментыс некор на эз юргыв. Велӧдчӧма сыӧн ворсны менам ёрт, казакъяслӧн «Вольница» ансамбльӧн веськӧдлысь Станислав Юрченко. Музыкантъяс пӧвстын тайӧ нималана инструмент. Кольӧм нэмся 90-ӧд воясӧ сыӧн танго ворсліс Астор Пьяццолла, – юксис нимкодьторйӧн да корис волыны концерт вылӧ Сергей Гусев.
«Северная околица» ансамбль тшӧтш дасьтӧ видзӧдысьяслы кыпыд программа.
Эстрада-джаз шылада ансамбль «Вдохновение» оз жӧ кольччы йӧзкостса котыръясысь. Тайӧ сезон кежлӧ сылӧн мӧвпыштӧма нёль ыджыд концерт. «Вдохновениеса» музыкантъяскӧд октябрь 15 лунӧ петкӧдчис нин Нью-Йоркысь вокалист Эндрю МакФадден «Ритмы Бродвея» программаӧн. Кыдзи пасйис ансамбльӧн веськӧдлысь Антон Викулов, нималана американечлӧн менеджерыс Воркутаысь, та вӧсна и мойвиӧма корлыны сійӧс Сыктывкарӧ.
Джаз радейтысьяс водзын ноябрь 28 лунӧ «Тоннели времени» концертӧн петкӧдчас Израильысь пианист Таль Бабицкий.
А Важ Выль восӧ меломанъяс вермасны пасйыны Карина Кожевниковакӧд да саксофонист Алексей Кругловкӧд «Старый новый джаз» концерт дырйи. Март 19 лунӧ «Леди джаз» концертӧн петкӧдчас Анеш Джанелидзе. Искусство радейтысьяс ёна виччысьӧны и Даниил Крамерӧс, кодӧс Сыктывкарса меломанъяс некымынысь нин кывзылісны.
Мария Балмастова сідзжӧ пасйис, мый филармонияса артистъяс ветласны гастрольӧн республика пасьтала, а сідзжӧ Новосибирскӧ, Ханты-Манси да Ямал-Ненеч кытшъясӧ.
<> Екатерина МАКАРОВА. Снимокъясыс Коми Республикаса филармонияысь.