Коми Республикаса шылада-драмаа театр петкӧдліс Антон Чеховлысь «Корасьӧм» ӧти юкӧна шмонь. Выль постановка подулас – Антон Павловичлӧн «Предложение» да «Медведь» ӧти акта серамбана пьесаяс. Воддза пьесасӧ комиӧдӧма Евгений Козлов, мӧдсӧ – Нина Обрезкова. Режиссёрыс Роман Охлопков.
Зык-вен да радейтчӧм
«Корасьӧмын» артистъяс петкӧдчӧны кык составын. Помещик Степан Степанович Чубуковӧс ворсӧны Андрей Засухин да Александр Канев, Наталья нывсӧ – Анна Бобрецова да Карина Игнатова. Налысь Иван Ломов суседсӧ, коді буретш и локтӧ корасьны, – Антон Куратов да Тимур Смирнов.
«Ош» шмоньторйын петкӧдчӧны Елена Чувьюрова (помещица, дӧва Елена Ивановна Попова), Андрей Епанешников (помещик Григорий Степанович Смирнов) да Владимир Уляшев (Лука, Поповалӧн пӧрысь лакей).
Выль постановкаыс радейтчӧм йылысь. Антон Чеховлӧн тайӧ кыкнан гижӧдыс петкӧдлӧны нывбаба да мужичӧй костын олӧмсӧ серамсорӧн. Гижысьлӧн артмӧ ставсӧ тайӧс петкӧдлыны тешкодя. И видзӧдысьяслы та пӧрйӧ вӧлі мый вылын и серавны, и мӧвпавны.
Неуна кӧ висьтыштны сюжетсӧ, Чубуков ордӧ корасьны воӧ суседыс. Чайтан да, вермас лоны, Наталья либӧ Степан Степаныч ӧткажитасны Иван Ломовлы либӧ радпырысь кӧсйысясны да сэсся ворсасны и кӧлысь. Но! Корасьӧм пыдди помещикъяс заводитӧны вензьыны, медводз видз вӧсна, кодлӧн сійӧ, а сэсся кодлӧн бурджык понйыс. Но век жӧ муслун вермӧ: пурсьӧны, но радейтӧны.
«Ош» шмоньторйын жӧ виччысьтӧг ыпнитӧ дӧва да кредитор костын муслун. Помещица Попова верӧссӧ дзебӧм бӧрын асьсӧ «ловйӧн гуалӧма» гортас. Некытчӧ оз петав, сӧмын бӧрдӧ кырсалысь верӧс пондаыс. Керкаас некодӧс оз лэдз пырны сылӧн лакейыс. Но помещик Смирновӧс некутшӧм иган оз падмӧд. Корӧ дзик пыр бергӧдны уджйӧзсӧ. Пинясьӧны сэтшӧма, мый лыйсьӧмӧдз весиг воӧны. А сэсся лӧгсяньыс ыпнитӧ на костын муслун.
Вужвойтырлӧн шылада-драмаа театрысь артистъяс мастерӧсь ворсны серамбана спектакльясын. И комиӧдӧм Чеховӧс налӧн тшӧтш зэв бура артмис петкӧдлыны.
Быттьӧ Енмыс кыліс
Роман Охлопков тавосянь уджалӧ вужвойтырлӧн шылада-драмаа театрын. Кыдзи ачыс висьталіс, помалӧма Новосибирскса государственнӧй театральнӧй институт, велӧдчӧма драма театрын да киноын ворсысьӧ, а сідзжӧ ГИТИС-ын – режиссёрӧ.
–Комиӧ локтӧдз шмониті, мися, кӧні сӧмын эг пуктыв спектакльяссӧ: Ылі Асыввылын, Россия лунвылын, шӧр регионъясын, рытыввылын, а войвылын эг на вӧв. И со менӧ быттьӧ Енмыс кыліс – и ме тані, – висьталӧ Роман Игоревич.
–Мыйла буретш Чеховсянь заводитінныд?
–Чехов – тайӧ классика, кодӧс велӧдӧны школаын, чайта да, лоӧ интереснӧ видзӧдны и верстьӧлы, и ныв-зонлы. Та вӧсна и босьтім сійӧс репертуарӧ. Ме ачым радейта классика, и пукта сійӧс сідз, кыдз эм. И та пӧрйӧ нинӧм эг вежлалӧй. Но и, дерт, коми да, пыртім постановкаас коми кӧрсӧ. Чайта да, миян постановкаын и Чехов, и театр колисны ассьыныс чужӧмбансӧ.
–Кыдзи бӧрйинныд артистъясӧс? Гашкӧ, кодкӧ отсаліс, ті ӧд найӧс он на тӧдӧй, сӧмын воинныд да?
–Дерт, Светлана Гениевна отсаліс, ме сӧмын на тӧдмася артистъяскӧд.
Роман Игоревичлӧн висьталӧм серти, сылы кокньыда уджавсьӧма коми артистъяскӧд. Медводз, дерт, видлӧмаӧсь ворсны рочӧн, а сэсся вуджӧмаӧсь комиӧ. И кӧть коми кывсӧ режиссёр оз тӧд, гӧгӧрвоӧ ставсӧ, мый вӧчсьӧ сцена вылын. Весиг пӧ эм мӧвп велӧдны комисӧ, мед сэсся водзӧ уджавны. Пасйис, мый кывйыс шылад кодь.
–Кырымалӧмныд сёрнитчӧм куим во кежлӧ. Он каитчӧй?
–Ог. Ме овлі и ыджыд, и ичӧт каръясын. Менӧ нинӧм оз повзьӧд.
–Миян национальнӧй республика. Тӧдмасинныд нин татчӧс йӧзкостса традицияясӧн, вужвойтыр оласногӧн? Коми вӧлӧгаысь мый воис сьӧлӧм выланыд?
–Музейӧ либӧ нӧшта кытчӧкӧ ветлыны эг на слӧймы. Коми вӧлӧга эг жӧ на видлы, пыр на уджӧдісны, эз вердны, – шмонитіс режиссёр.
–Водзӧ вылӧ мыйӧ босьтчанныд?
–Артистъяс ветласны гастрольӧ. А сэсся кутам дасьтыны спектакль-композиция коми гижысьяслӧн – Ванеевлӧн, Жаковлӧн, Чисталёвлӧн, Куратовлӧн – олӧм йылысь. Окота найӧс петкӧдлыны, кутшӧмӧсь вӧлӧмаӧсь быдлунъя олӧмын. Сэсся босьтчам и челядьлы «Алиса в Стране чудес» шылада мойдӧ. Кута дасьтыны спектакльяссӧ сідз, мед позис нулыны и мукӧд кар-районӧ.
<> Екатерина МАКАРОВА. Снимокъясыс Коми Республикаса вужвойтырлӧн шылада-драмаа театрысь.